(ព្រះសីហនុ)៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានថ្លែងថា ការសម្ពោធសមិទ្ធផលទំនើបកម្ម និងមជ្ឈមណ្ឌលភស្តុភារ និងហ្វឹកហ្វឺនរួមគ្នា កម្ពុជា-ចិន ផែរាម នៅថ្ងៃទី០៥ ខែមេសា ឆ្នាំ២០២៥នេះ បានបង្ហាញថា ការអភិវឌ្ឍនៅមូលដ្ឋានសមុទ្ររាម មិនមានអាថ៌កំបាំងនោះឡើយ។
មជ្ឈមណ្ឌលភស្តុភារ និងហ្វឹកហ្វឺនរួមគ្នា កម្ពុជា-ចិន និងផែរាម ត្រូវបានសាងសង់រួចរាល់ជាស្ថាពរ និងរៀបចំសម្ពោធដាក់ឱ្យប្រើប្រាស់ជាផ្លូវការ នាព្រឹកថ្ងៃទី០៥ ខែមេសា ឆ្នាំ២០២៥នេះ ក្រោមមអធិបតីភាពដ៏ខ្ពង់ខ្ពស់ របស់សម្តេចមហាបវរធិបតី ហ៊ុន ម៉ាណែត។
សម្តេចបវរធិបតី ហ៊ុន ម៉ាណែត បានបញ្ជាក់យ៉ាងដូច្នេះថា «ថ្ងៃនេះ មកធ្វើកម្មវិធីសម្ពោធជាផ្លូវការ បើយើងចង់លាក់ យើងមិនចាំបាច់សម្ពោធនោះទេ បើយើងចង់លាក់ យើងធ្វើរបងបិទជិត [...] អ្វីដែលយើងឃើញជាក់ស្ដែង នៅថ្ងៃនេះ គឺយើងធ្វើពិធីសម្ពោធ»។
បន្ថែមពីនោះទៀត សម្តេចបវរធិបតី ហ៊ុន ម៉ាណែត បានលើកឡើងថា ការធ្វើពិធីសម្ពោធនេះ គឺចង់ឲ្យប្រជាពលរដ្ឋ ទាំងប្រជាពលរដ្ឋកម្ពុជា ទាំងប្រជាពលរដ្ឋ និងកងទ័ព នៅលើពិភពលោកទាំងអស់ កុំឲ្យមានការមន្ទិលសង្ស័យអ្វីតទៅទៀត ហើយកម្ពុជា មិនមានអ្វីលាក់លៀមនោះទេ។
ទន្ទឹមគ្នានេះ សម្តេចបវរធិបតី ហ៊ុន ម៉ាណែត ក៏សូមឲ្យប្រជាពលរដ្ឋ សូមជឿទុកចិត្ដ មកលើរាជរដ្ឋាភិបាល ហើយរាជរដ្ឋាភិបាល មិនមានធ្វើសកម្មភាពណា ដែលរំលោភទៅលើរដ្ឋធម្មនុញ្ញខ្លួនឯងនោះទេ។
សូមជម្រាបថា មូលដ្ឋានសមុទ្ររាម ត្រូវបានបង្កើតឡើងនៅឆ្នាំ១៩៥៤ បន្ទាប់ពីកម្ពុជា ទទួលបានឯករាជ្យពីអាណានិគមនិយមបារាំង ដោយមានឈ្មោះដើមថា «មូលដ្ឋាន សមុទ្រកងទ័ពជើងទឹក»។ លុះថ្ងៃទី១៣ ខែកុម្ភៈ ឆ្នាំ២០២៤ សម្តេចមហាបវរធិបតី ហ៊ុន ម៉ាណែត បានសម្រេចប្តូរឈ្មោះទៅជា «មូលដ្ឋានសមុទ្ររាមកងជើងទឹក»។
មូលដ្ឋានសមុទ្ររាម គឺជាមូលដ្ឋានមួយនៃកងទ័ពជើងទឹក ប្រើប្រាស់សម្រាប់កិច្ចការគ្រប់គ្រងសន្តិសុខ លើលំហសមុទ្ររបស់កម្ពុជា៕
