(ភ្នំពេញ)៖ អាជ្ញាធរខណ្ឌកំបូល តំណាងឲ្យសាលារាជធានីភ្នំពេញ និងមន្ទីររៀបចំដែនដី នគរូបនីយកម្ម និងសំណង់ រាជធានីភ្នំពេញ បានប្រកាសបិទបញ្ចប់ការចុះបញ្ជីដីធ្លីលក្ខណ:ជាប្រព័ន្ធ និងបានប្រគល់ប័ណ្ណកម្មសិទ្ធិជូនប្រជាពលរដ្ឋរួចហើយ នៅថ្ងៃទី៤ ខែមេសា ឆ្នាំ២០២៥នេះ។ ការប្រកាសបិទបញ្ចប់នេះ គឺបានធ្វើឡើងក្នុងពិធីប្រគល់ប័ណ្ណសម្គាល់អចលនវត្ថុចុងក្រោយ ជូនប្រជាពលរដ្ឋនៅភូមិត្រាញ់តាបាញ់ ភូមិភ្លើងឆេះរទេះលិច និងភូមិភ្លើងឆេះរទេះកើត ក្នុងសង្កាត់ភ្លើងឆេះរទេះ ដែលមានសរុប២,២៦៣ប័ណ្ណ។

លោក ប៉ុក បញ្ញាធិ ប្រធានការិយាល័យរៀបចំដែនដី នគរូបនីយកម្ម សំណង់ និងភូមិបាលខណ្ឌកំបូល បានលើកឡើងថា ការចុះបញ្ជីដីធ្លីលក្ខណៈជាប្រព័ន្ធជូនប្រជាពលរដ្ឋនៅក្នុងខណ្ឌកំបូលកន្លង រហូតមកដល់ពេលនេះ គឺសម្រេចបាន១០០%ហើយ ក្នុងចំណោមសង្កាត់ទាំង៧ ដែលមានភូមិសរុបចំនួន៩៣ភូមិ។ ក្នុងនោះ បានប្រមូលទិន្នន័យ និងបិទផ្សាយក្បាលដីសរុបជាង៤២,០០០ក្បាលដី និងបានចេញប័ណ្ណកម្មសិទ្ធិជូនប្រជាពលរដ្ឋសរុប ជាង៣៩,០០០ប័ណ្ណ។ ដោយឡែក ការផ្តល់ប័ណ្ណជូនប្រជាពលរដ្ឋចំនួន៣ ភូមិចុងក្រោយនៅក្នុងសង្កាត់ភ្លើងឆេះរទេះនាពេលនេះ គឺសរុបចំនួន២,២៦៣ប័ណ្ណ និងប្រើពេលវេលាចែកចំនួន៩ថ្ងៃ ដោយគិតចាប់ពេលនេះទៅ។

ជាមួយគ្នានេះ លោក ឃឹម ស៊ុនសូដា អភិបាលខណ្ឌកំបូល បានថ្លែងការសាទរ និងអរគុណចំពោះក្រុមការងារទាំងអស់ ដែលបានខិតខំប្រឹងប្រែងបញ្ចប់ការចុះបញ្ជីលក្ខណៈជាប្រព័ន្ធទាំងស្រុង ជូនប្រជាពលរដ្ឋក្នុងខណ្ឌ ព្រោះការចុះបញ្ជីលក្ខណៈជាប្រព័ន្ធនេះ មានសារសំខាន់ណាស់សម្រាប់ពួកគាត់ទាំងការប្រើប្រាស់ និងការគ្រប់គ្រងដីធ្លី ជាពិសេសអំឡុងពេលដែលក្នុងមូលដ្ឋានខណ្ឌ កំពុងមានការអភិវឌ្ឍដ៏សម្បូរបែប ដូចជា រោងចក្រ សហគ្រាសជាដើម ដែលប្រជាពលរដ្ឋអាចជួលដី ឬជួលផ្ទះ និងអគារក្នុងសមរម្យបាន។

តាមរបាយការណ៍របស់ លោក ប៊ិន សូឈី អនុប្រធានមន្ទីររៀបចំដែនដី រាជធានីភ្នំពេញ បានឲ្យដឹងថា ការចុះបញ្ជីដីធ្លីជាលក្ខណៈប្រព័ន្ធនៅក្នុងរាជធានីភ្នំពេញ រហូតមកដល់ពេលនេះ សម្រេចបានប្រមាណជាង៤៥ម៉ឺនក្បាលដីហើយ ក្នុងចំណោមក្បាលដីសរុបចំនួន៥០ម៉ឺន។ ក្នុងនោះ បានបិទផ្សាយសាធារណៈជាង៤៣ម៉ឺនក្បាលដី និងបានចែកប័ណ្ណជូនពលរដ្ឋ ជាង២៩ម៉ឺនក្បាលដី។ ជារួមនៅក្នុងរាជធានីទាំងមូល ដែលមានចំនួន១៤ខណ្ឌ គឺបានចុះបញ្ជី និងចែកប័ណ្ណបានចំនួន៧ខណ្ឌហើយ និងកំពុងគ្រោងបញ្ចប់ជាបន្តបន្ទាប់ទៀត, ខណៈទិសដៅរបស់ក្រសួង គឺត្រូវបិទបញ្ចប់ទាំងស្រុងនៅត្រឹមដំណាច់ឆ្នាំ២០២៥នេះ។

ចំណែកប្រជាពលរដ្ឋដែលបានមកទទួលប័ណ្ណកម្មសិទ្ធិចុងក្រោយនេះ បានសម្តែងការសប្បាយរីករាយ និងអរគុណជាអនេកដល់ក្រុមការងារ ក៏ដូចអាជ្ញាធរដែនដី ជាពិសេសអរគុណដល់រាជរដ្ឋាភិបាល ដែលបានផ្តល់សិទ្ធិកាន់កាប់ដីធី្លពេញលេញដល់ពួកគាត់ ព្រោះប័ណ្ណកម្មសិទ្ធនេះ គឺមានសារសំខាន់ណាស់សម្រាប់ពួកគាត់ ក្នុងការប្រើប្រាស់ និងការកាន់កាប់ដោយភាពកក់ក្តៅ៕