(ក្រចេះ)៖ លោក វ៉ា ថន អភិបាលខេត្តក្រចេះ អញ្ជើញជួបសំណេះសំណាលសួរសុខទុក្ខ ថ្នាក់ដឹកនាំ មន្ត្រីរាជការ និងមន្ត្រីជាប់កិច្ចសន្យា នៃរដ្ឋបាលខេត្ត នៅក្នុងឱកាសបុណ្យចូលឆ្នាំថ្មី ប្រពៃណីជាតិខ្មែរ ឆ្នាំម្សាញ់ សប្តស័ក ព.ស.២៥៦៩នាពេលខាងមុខ។

ពិធីជួបសំណេះសំណាលនេះធ្វើឡើងនៅរសៀលថ្ងៃទី៤ ខែមេសា ឆ្នាំ២០២៥ ដោយមានការចូលរួម ពីសំណាក់លោក លោកស្រីអភិបាលរងខេត្ត លោក លោកស្រី នាយក-នាយករងរដ្ឋបាលសាលាខេត្ត នាយក-នាយករងទីចាត់ការ ប្រធាន អនុប្រធាន អង្គភាព ប្រធាន-អនុប្រធានការិយាល័យមន្ត្រីរាជការ កងកម្លាំងប្រដាប់អាវុធ និងមន្ដ្រីជាប់កិច្ចសន្យាសាលាខេត្ត។

ក្នុងពិធីនោះ លោក វ៉ា ថន អភិបាលខេត្ត បានសម្តែងនូវការកោតសរសើរ និងវាយតម្លៃខ្ពស់ជូនចំពោះថ្នាក់ដឹកនាំ មន្ដ្រីរាជការ នៃរដ្ឋបាលខេត្តក្រចេះទាំងអស់ ដែលបានខិតខំបំពេញការងារកន្លងមក ប្រកបដោយស្មារតីទំនួលខុសត្រូវខ្ពស់។

លោកអភិបាល បានស្នើឲ្យបន្តខិតខំពង្រឹងការស្នូលទៅតាមការិយាល័យរៀងខ្លួន និងបន្តពង្រឹងសហការសាមគ្គីភាពផ្ទៃក្នុង សំដៅពង្រឹង និងពង្រីកប្រសិទ្ធភាពផ្តល់សេវាសាធារណៈជូនប្រជាពលរដ្ឋ ឆ្លើយតបទៅនឹងគោលនយោបាយរបស់រាជរដ្ឋាភិបាល និងត្រូវបន្តការងារចុះមូលដ្ឋាន ដើម្បីផ្សាភ្ជាប់ទៅនឹងសុខទុក្ខ ជីវភាពរស់នៅរបស់ប្រជាពលរដ្ឋ ដើម្បីដោះស្រាយនូវរាល់បញ្ហា និងគាំទ្រនូវសកម្មភាពការប្រកបមុខរបរប្រចាំថ្ងៃ ប្រកបដោយជំនឿទំនុកចិត្ត និងភាពស្ងប់ចិត្ត៕