(ឧត្តរមានជ័យ)៖ រដ្ឋបាលខេត្តឧត្ដរមានជ័យ នារសៀលថ្ងៃទី៤ ខែមេសា ឆ្នាំ២០២៥នេះ បានរៀបចំពិធីសូត្រមន្តសុំសេចក្តីសុខ សេចក្តីចម្រើន នាឱកាសនៃពិធីបុណ្យចូលឆ្នាំថ្មី ប្រពៃណីជាតិខ្មែរ ឆ្នាំម្សាញ់ ដែលនឹងឈានចូលមកដល់នៅពេលដ៏ខ្លីខាងមុខនេះ។ ពិធីនេះប្រព្រឹត្តធ្វើឡើងស្ថិតក្រោមវត្តមានលោក សុី ប្រាសិទ្ធ ប្រធានក្រុមប្រឹក្សាខេត្ត និងលោក មាន ចាន់យ៉ាដា អភិបាលខេត្តឧត្ដរមានជ័យ ដោយមានការចូលរួមពីថ្នាក់ដឹកនាំខេត្ត មន្ដ្រីរាជការចំណុះរដ្ឋបាលខេត្ត មេបញ្ជាការកងកម្លាំងប្រដាប់អាវុធទាំង៣ មន្ទីរ អង្គភាព ជុំវិញខេត្ត អាជ្ញាធរក្រុង ស្រុក និងអង្គភាពពាក់ព័ន្ធជាច្រើនទៀត។
ពិធីនេះបានរៀបចំធ្វើឡើងតាមបែបប្រពៃណីសាសនា ដោយបាននិមន្ត្រព្រះសង្ឃសូត្រមន្តចម្រើនព្រះបរិត្ត ប្រោះព្រំប្រសិទ្ធពរជ័យ សិរីសួស្តី ជ័យមង្គលមហាប្រសើរ ជូនដល់ថ្នាក់ដឹកនាំ មន្ត្រីរាជការ ឲ្យមានសេចក្តីសុខ សេចក្តីចម្រើន ប្រាជ្ញាឈ្លាសវៃ ដើម្បីបន្តបំពេញតួនាទី ភារកិច្ចជូនរដ្ឋបាលខេត្តឧត្តរមានជ័យ ឲ្យទទួលបានជោគជ័យថ្មីៗបន្ថែមទៀត។
ជាពិសេសពិធីនេះដែរ បានបង្ហាញឲ្យឃើញពីការគោរពប្រតិបត្តិប្រពៃណីទំនៀមទម្លាប់ជាតិ និងបង្ហាញពីភាពសុខសាន្ដរបស់ប្រជាពលរដ្ឋ ស្របពេលដែលប្រទេសជាតិ កំពុងមានសុខសន្តិភាពពេញលេញ ក្រោមម្លប់នៃសុខសន្ដិភាព ដែលរក្សាបាននូវខឿនសេដ្ឋកិច្ច វឌ្ឍនភាពសង្គម ដ៏ល្អប្រសើរ និងការអភិវឌ្ឍលើគ្រប់វិស័យនៃប្រជាជាតិកម្ពុជាទាំងមូលរបស់យើង។
ពិធីសូត្រមន្តសុំសេចក្តីសុខ សេចក្តីចម្រើន នាឱកាសពិធីបុណ្យចូលឆ្នាំ ប្រពៃណីជាតិខ្មែរ ឆ្នាំម្សាញ់ សប្ពស័ក ព.ស២៥៦៨ គ.ស២០២៥នេះ គឺជាការជួបជុំគ្នាក្នុងរូបភាពជាលក្ខណៈមហាគ្រួសារដ៏ធំមួយ នៃក្រុមគ្រួសារមន្ត្រីរាជការរដ្ឋបាលសាលាខេត្តឧត្ដរមានជ័យ និងមន្ទីរអង្គភាពជុំវិញខេត្ត ដែលបានបំពេញភារកិច្ចការងាររបស់ខ្លួន រយៈពេលមួយឆ្នាំមកនេះផងដែរ។
ដើម្បីអបអរសាទរពិធីបុណ្យចូលឆ្នាំថ្មី ប្រពៃណីជាតិខ្មែរ ដែលនឹងឈានមកដល់នៅពេលដ៍ខ្លីខាងមុខនេះ លោក មាន ចាន់យ៉ាដា អភិបាលខេត្ត បានអំពាវនាវដល់មហាជនទូទាំងប្រទេស ពិសេសប្រជាពលរដ្ឋក្នុងខេត្តឧត្ដរមានជ័យ កុំភ្លេចមកលេងសប្បាយនៅ «សង្ក្រាន្ដឧត្តរ» ដែលកំពុងមមាញឹករៀបចំឡើងនៅសួនច្បារផ្លូវភ្លោះបឹងស្នោរ មុខសាលាខេត្ត ចាប់ពីថ្ងៃទី១៤-១៦ ខែមេសា ឆ្នាំ២០២៥ ក៏ដូចជាលេងកម្សាន្ដនៅតាមតំបន់រមណីយដ្ឋាន វត្តអារ៉ាម និងសង្ក្រាន នៅតាមក្រុង ស្រុកទាំង៥ផងដែរ។
«សង្ក្រាន្ដឧត្តរ» ដែលរដ្ឋបាលខេត្តឧត្តរមានជ័យ កំពុងរៀបចំតុបតែងនាពេលនេះ មានភាពទាក់ទាញកាន់តែប្រសើរឡើងជាងឆ្នាំកន្លងមក បើទោះបីជាមិនទាន់រួចរាល់ជាស្ថាពរ១០០% ប៉ុន្តែបានលេចចេញនូវរូបរាង និងទិដ្ឋភាពយ៉ាងស្រស់ស្អាតនាពេលរាត្រី ដោយមានពន្លឺភ្លើងពណ៌ចម្រុះ និងការតុបតែងជាច្រើនបែបច្រើនយ៉ាង តាមរចនាបទប្រពៃណីដូនតាខ្មែរ ដែលបានបន្សល់ទុកឲ្យដែលជាស្នាដៃដ៏មហាអស្ចារ្យមិនអាចកាត់ថ្លែបាន៕