(ភ្នំពេញ)៖ ក្នុងឱកាសចូលរួមពិធីប្រកួតអំណានភាសាខ្មែរ ដែលបានប្រារព្ធនៅសាលាបឋមសិក្សាសំរោងពែន, លោក នួម សុខុន ប្រធានក្រុមការងារជួយភូមិពែន អមដោយសហការីលោកទូច ថាវរិទ្ធ និងលោក សៅ យេង អនុប្រធានក្រុមការងារ បានលើកទឹកចិត្តដល់សិស្សានុសិស្សឱ្យបង្កើនទម្លាប់ស្រលាញ់ការអានសៀវភៅគ្រប់ៗគ្នា ដើម្បីជាទុននៃចំណេះដឹង សម្រាប់អនាគត។
ពិធីនេះធ្វើឡើងនៅថ្ងៃទី៤ ខែមេសា ឆ្នាំ២០២៥នេះ ដោយមានវត្តមានចូលរួមពីអជ្ញាធរភូមិ-ឃុំ សិស្សានុសិស្ស និងមាតាបិតាសិស្ស ប្រមាណ ១៥០នាក់។
នាឱកាសនោះដែរ លោក នួម សុខុន បានពាំនាំនូវការនឹករលឹក និងការផ្តាំផ្ញើសាកសួរសុខទុក្ខពីសំណាក់លោក ជា សុមេធី រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតីសម្បទា ជាប្រធានក្រុមការងារចុះមូលដ្ឋានជួយស្រុកពាមជ័រ និងលោកបណ្ឌិត ស៊ូនី វង្សវិសិដ្ឋ ប្រធានក្រុមការងារជួយឃុំឬស្សីស្រុក ព្រមទាំងអំណោយជូនដល់សិស្សជ័យលាភី និងសម្ភារសិក្សាមួយចំនួន សរុបថវិកាប្រមាណ២លាន ប្រាំសែនរៀល។
គោលបំណងសំខាន់ គឺចូលរួមជំរុញលើកទឹកចិត្តបណ្តុះអំណានរបស់សិស្សានុសិស្ស និងផ្សារភ្ជាប់ទំនាក់ទំនងរវាងក្រុមការងារជាមួយមាតាបិតាសិស្សជាម្ចាស់ឆ្នោត និងអាជ្ញាធរមូលដ្ឋានជាអង្គបោះឆ្នោត និងការសាកសួរសុខទុក្ខក្នុងឱកាសចូលឆ្នាំខ្មែរប្រពៃណីជាតិដែលនឹងខិតចូលមកដល់នាពេលខាងមុខ៕
