(តាកែវ)៖ ក្រុមមន្ត្រីការិយាល័យផលិតកម្ម និងបសុព្យាបាល នៃមន្ទីរកសិកម្ម រុក្ខាប្រមាញ់ និងនេសាទខេត្តតាកែវ បានចុះអន្តរាគមន៍បាញ់ថ្នាំសម្លាប់មេរោគជំងឺផ្ដាសាយបក្សី និងតាមដានសុខភាពសត្វ នៅព្រឹកថ្ងៃទី៤ ខែមេសា ឆ្នាំ២០២៥ នៅក្នុងក្រុងដូនកែវ និងនៅផ្សារកំពង់ជ្រៃ ស្ថិតនៅក្នុងស្រុកទ្រាំងមុនពិធីបុណ្យចូលឆ្នាំប្រពៃណីយ៍ខ្មែរ។
លោក អ៊ី សុភិន អនុប្រធានការិយាល័យផលិតកម្ម និងបក្សសុព្យាបាល ដែលបានដឹកនាំមន្រ្តីចុះបាញ់ថ្នាំ បានឲ្យដឹងថា យុទ្ធនាការចុះបាញ់ថ្នាំសម្លាប់មេរោគជំងឺផ្ដាសាយបក្សីនៅពេលនេះ បានធ្វើឡើងនៅកន្លែងបោចមាន់ និងនៅតាមផ្សារ។
នៅក្នុងយុទ្ធនាការនេះ មន្ដ្រីក៏បានធ្វើការណែនាំដល់ប្រជាពលរដ្ឋ និងអាជីវករលក់ដូរមាន់ និងសាច់សត្វទាំងអស់ពីជំងឺផ្ដាសាយបក្សី និងការឆ្លងរីករាលដាលជំងឺពីសត្វមកមនុស្ស និងវិធីទប់ស្កាត់កុំឲ្យឆ្លងដោយបានធ្វើការណែនាំដល់អ្នកដឹកជញ្ជូនសត្វ និងម្ចាស់ទីតាំងបោចមាន់លក់ អាជីវករលក់មាន់ និងសាច់សត្វ ត្រូវរៀបចំទីតាំងប្រកបដោយអនាម័យ និងពាក់ម៉ាស់ជៀសវាងការឆ្លងជំងឺផ្ដាសាយបក្សី។
លោកក៏បានអំពាវនាវដល់ប្រជាពលរដ្ឋ និងអាជីវករលក់មាន់ និងលក់សាច់សត្វទាំងអស់ នៅពេលដែលសត្វមាន់របស់ខ្លួនមានបញ្ហា ត្រូវរាយការណ៍មកអាជ្ញាធរមូលដ្ឋាន ឬមន្ត្រីផលិតកម្មបសុព្យាបាលឲ្យបានដឹង ដើម្បីយកសំណាកសត្វទៅពិនិត្យ និងត្រូវជៀសវាងដាច់ខាតយកសត្វមាន់ ដែលមានជំងឺទៅហូប ឬយកទៅលក់នៅលើទីផ្សារ ដែលនាំឲ្យប៉ះពាល់ដល់សុខភាពរបស់ប្រជាពលរដ្ឋ។
សូមជម្រាបថា ខេត្តតាកែវ គឺជាខេត្តដែលមានការចិញ្ចឹមបក្សីច្រើនជាងគេបង្អស់នៅក្នុងប្រទេសកម្ពុជា ក្នុងនោះប្រជាពលរដ្ឋខេត្តតាកែវ ចិញ្ចឹមសត្វបក្សីមានចំនួនជាង២លានក្បាល៕
