(ព្រះសីហនុ)៖ នាព្រឹកថ្ងៃទី៣ ខែមេសា ឆ្នាំ២០២៥ ឧត្តមសេនីយ៍ឯក ស រដ្ឋា អគ្គស្នងការរង និងជាស្នងការនគរបាលខេត្តព្រះសីហនុ បានចាត់ឱ្យលោកវរសេនីយ៍ទោ នី ចាន់ណារ៉ា នាយការិយាល័យនគរបាលចរាចរណ៍ផ្លូវគោក ដឹកនាំកម្លាំងសហការជាមួយមន្ទីរសាធារណការ និងដឹកជញ្ជូនខេត្ត ចុះផ្សព្វផ្សាយច្បាប់ស្តីពីចរាចរណ៍ផ្លូវគោក ដល់សិស្សានុសិស្ស និងអ្នកបើកបររថយន្តដឹកជញ្ជូនទំនិញធន់ធ្ងន់ និងដឹកកុងតឺន័រចំនួន៦៩នាក់ លើផ្លូវជាតិលេខ៤ ចន្លោះគីឡូម៉ែត្រ២១៩-២២០ ស្ថិតនៅសង្កាត់លេខ១ ក្រុងព្រះសីហនុ ខេត្តព្រះសីហនុ។

ការចុះអនុវត្តនាព្រឹកនោះ នាយការិយាល័យ បានណែនាំនូវចំណុចសំខាន់ៗដូចខាងក្រោម៖

*សុវត្ថិភាពក្នុងការបើកបរយានយន្តលើដងផ្លូវ ការប្រើប្រាស់កន្លងផ្លូវរថយន្តធុនធ្ងន់ កុំឱ្យបើកបរខុសកន្លងផ្លូវបន្តទៅទៀត។
*ការគោរពច្បាប់ចរាចរណ៍ផ្លូវគោក មិនបើកបរបញ្ច្រាស់ទិសចរាចរណ៍ មិនវ៉ាជែងក្នុងស្ថានភាពគ្រោះថ្នាក់ គោរពផ្លាកសញ្ញា-ភ្លើងសញ្ញាចរាចរណ៍ មិនបើកបរមានល្បឿនលឿន មិនបើកបរក្នុងស្ថានភាពស្រវឹង ឬងងុយដេក ចៀសវាងពីការប្រើប្រាស់គ្រឿងញៀន ជាដាច់ខាត ជាពិសេសពេលថ្ងៃឈប់សម្រាកក្នុង ឱកាសបុណ្យចូលឆ្នាំថ្មីប្រពៃណីជាតិខ្មែរ សូមបងប្អូនទាំងអស់គ្នា ជួយផ្សព្វផ្សាយបន្តដល់អ្នកបើកបររថយន្ត ដឹកជញ្ជូនទាំងអស់បើកបរ ដោយការ ប្រុងប្រយ័ត្នឱ្យបានខ្ពស់បំផុតដើម្បីជៀសផុតពីករណីគ្រោះថ្នាក់ចរាចរណ៍កើតឡើងជាយថាហេតុ។

ក្នុងឱកាសនោះលោក និងមន្ត្រីជំនាញបានចែកនូវសៀវភៅ និងមាតុដ្ឋានគតិយុទ្ធដល់អ្នកបើកបរថយន្តតូចធំ រថយន្តតាក់ស៊ី ឲ្យចូលរួមគោរពច្បាប់ មុនបើកបរត្រូវពិនិត្យមើលលើបច្ចេកទេសឲ្យបានត្រឹមត្រូវ ក្នុងការដឹកជញ្ជូនទំនិញ រថយន្តធុនធំពិសេសរថយន្តតាក់ស៊ី ជាពិសេសក្នុងឱកាសបុណ្យចូលឆ្នាំខាងមុខ សូមកុំតម្លើងថ្លៃ សូមឲ្យគិតដូចថ្ងៃធម្មតា មួយវិញទៀតកុំដឹកមនុស្សលើសកំរិត ពិសេសក្បែរតៃកុងហាមដាច់ខាតចង់ចំណេញពេញបន្ថែម មនុស្សម្នាក់ក្បែរតៃតុង ព្រោះវាអាចបង្កភាពលំបាកក្នុងការបើកបរ និងបង្កគ្រោះថ្នាក់ជាយថាហេតុ៕