(ឧត្តរមានជ័យ)៖ លោក តាំង សុខឃី ឧត្តមទីប្រឹក្សាពុទ្ធិកសមាគមកម្ពុជរដ្ឋ និងលោកស្រី ទ្រី ចិន្តា នៅព្រឹកថ្ងៃទី០៣ ខែមេសា ឆ្នាំ២០២៥ បានដឹកនាំសមាជិក-សមាជិកា ពុទ្ធិកសមាគមកម្ពុជរដ្ឋ ព្រមទាំងបងប្អូន សហការី នៃក្រុមហ៊ុន ឃី ចិន្តា ឌីវេឡុបម៉ិន គ្រុប ចុះជួបសំណេះសំណាលសួរសុខទុក្ខ ជាមួយនាយទាហាន នាយទាហានរង ពលទាហាន នាយនគរបាល ពលនគរបាល ដែលកំពុងឈរជើងតាមបន្ទាត់ព្រំដែនកម្ពុជា-ថៃ ទិសប្រាសាទតាមាន់ ក្នុងស្រុកបន្ទាយអំពិល ខេត្តឧត្តរមានជ័យ ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ។
លោក តាំង សុខឃី បានសម្តែងនូវមនោសញ្ចេតនារីករាយ អបអរសារទរជាមួយលោកមេបញ្ជាការ មេបញ្ជាការរង នាយទាហាន ពលទាហាន និងនាយនគរបាល ពលនគរបាលទាំងអស់ ដែលកំពុងឈរជើងនៅទិសប្រាសាទតាមាន់ ព្រំដែនកម្ពុជា-ថៃ នៃស្រុកបន្ទាយអំពិល ខេត្តឧត្តរមានជ័យ។ លោកសូមសម្តែងនូវការកោតសរសើរដោយស្មោះចំពោះសកម្មភាពដ៏រស់រវើក និងស្មោះត្រង់រួមចំណែកអភិវឌ្ឍន៍កម្ពុជា នាពេលកន្លងមកនេះ ប្រកបដោយស្មារតីទទួលខុសត្រូវខ្ពស់ អង់អាចក្លាហាន មោះមុត មានវិន័យ សណ្ដាប់ធ្នាប់ សេចក្តីថ្លៃថ្នូរ ហើយនូវគ្រប់កាលៈទេសៈតែងតែទ្រទ្រង់ការពារបានយ៉ាងរឹងមាំ នូវបូរណភាពទឹកដី និងចូលរួមចំណែកថែរក្សាសុខសន្តិភាព ស្ថិរភាពជាតិ និងសណ្តាប់ធ្នាប់សង្គម ស័ក្តិសមជាទីពឹងរបស់ប្រជាជន និងសង្គមជាតិទាំងមូល។
លោក តាំង សុខឃី បានថ្លែងថា កម្លាំងទិសប្រាសាទតាមាន់ ជាកម្លាំងស្នូលមួយក្នុងការការពារបូរណភាពទឹកដី នៅតាមបណ្តោយខ្សែបន្ទាត់ព្រំដែនកម្ពុជា-ថៃ និងជាកម្លាំងរក្សាសន្តិសុខសណ្តាប់ធ្នាប់សាធារណៈ នៅក្នុងសង្គមដ៏ល្អដែលមិនអាចខ្វះបាន។ លោកក៏បានផ្តាំផ្ញើរសាកសួរសុខទុក្ខដោយក្តីនឹករលឹកពីសំណាក់សម្តេចតេជោ ហ៊ុន សែន, សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន, សម្តេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ជូនដល់នាយ និងពលទាហាន នាយ និងពលនគរបាល និងសូមជូនពរក្នុងឱកាសឆ្នាំថ្មីប្រពៃណីជាតិខ្មែរខាងមុខនេះ ជូនដល់មេបញ្ជាការ មញ្ជាការរង នាយ និងពលទាហាន នាយនិងពលនគរបាល។
ក្នុងដំណើរទស្សនកិច្ច សួរសុខទុក្ខកងទ័ពឈរជើងនៅប្រាសាទមាន់ លោក តាំង សុខឃី និងលោកស្រី ទ្រី ចិន្តា ឧត្តមទីប្រឹក្សាពុទ្ធិកសមាគមកម្ពុជរដ្ឋ ដែលបានដឹកនាំសមាជិក-សមាជិកា ពុទ្ធិកសមាគមកម្ពុជរដ្ឋ ព្រមទាំងបងប្អូន សហការី នៃក្រុមហ៊ុន ឃី ចិន្តា ឌីវេឡុបម៉ិន គ្រុប បាននាំយកនូវអំណោយរួមមាន៖ មី ៥០កេស, ទឹកត្រី ២៥យួរ, ទឹកស៊ីអ៊ីវ ២៥យួរ, ត្រីខ ៥០កេស, អង្ករចំនួន១តោន, សរុបគិតជាថវិកាអស់ ៥០, ៧៥០,០០០រៀល និងបានបរិច្ចាគជាប្រាក់១០លានរៀលបន្ថែមទៀត (ក្នុងនាមពុទ្ធិកសមាគមកម្ពុជរដ្ឋ)៕
