(សៀមរាប)៖ លោក លី សំរិទ្ធ ប្រធានក្រុមប្រឹក្សាខេត្តសៀមរាប និងលោក ប្រាក់ សោភ័ណ អភិបាលខេត្តសៀមរាប បានជំរុញដល់អាជ្ញាធរក្រុង ស្រុក ត្រូវបង្កើនការយកចិត្តទុកដាក់ខ្ពស់ លើការងារសន្តិសុខ សណ្តាប់ធ្នាប់សាធារណៈ និងការទន្រ្ទានដីនៅតំបន់៣ ក្នុងឱកាសដែលប្រជាពលរដ្ឋ ភ្ញៀវទេសចរជាតិ និងអន្តរជាតិ មកចូលរួមទស្សនាកម្សាន្តនៅព្រឹត្តិការណ៍អង្គរសង្ក្រាន្តឆ្នាំ២០២៥ ព្រមទាំងចូលរួមថែរក្សាបរិស្ថាន អនាម័យឲ្យបានល្អស្អាត។

ការជំរុញយ៉ាងដូច្នេះរបស់លោក លី សំរិទ្ធ និងលោក ប្រាក់ សោភ័ណ ក្នុងកិច្ចប្រជុំសាមញ្ញលើកទី១១ របស់ក្រុមប្រឹក្សាខេត្តសៀមរាប អាណត្តិទី៤ នាថ្ងៃទី០៣ ខែមេសា ឆ្នាំ២០២៥នេះដោយមានការចូលរួមពីលោក លោកស្រី ជាសមាជិក សមាជិកាក្រុមប្រឹក្សាខេត្ត លោក លោកស្រីជានាយក នាយករងរដ្ឋបាលសាលាខេត្ត ទីចាត់ការ អង្គភាព ចំណុះសាលាខេត្ត កងកម្លាំងទាំង៣ និងអភិបាល ក្រុង ស្រុកចូលរួមផងដែរ។

កិច្ចប្រជុំនេះ មានរបៀបវារៈចំនួន ៣វារៈ ដោយពិនិត្យ ពិភាក្សា អនុម័តលើ កំណត់ហេតុប្រជុំសាមញ្ញលើកទី១០ និងរបាយការណ៍ប្រចាំខែមីនា ស្តីពីការអនុវត្តការងាររដ្ឋបាលខេត្ត និងអនុម័តលើសេចក្តីព្រាងផែនការអភិវឌ្ឍរយៈពេល៥ឆ្នាំ (២០២៥-២០២៩) របស់រដ្ឋបាលខេត្តសៀមរាប។

លោក លី សំរិទ្ធ បានលើកឡើងថា រាល់ការកសាងផែនការ គ្រប់មន្ទីរ អង្គភាព ក្រុង ស្រុក ឃុំសង្កាត់ ត្រូវផ្តោតទៅលើការវិនិយោគធនធានមនុស្ស និងតម្រូវការរបស់ប្រជាពលរដ្ឋនៅតាមមូលដ្ឋាន ព្រមទាំងត្រួតពិនិត្យទៅលើផែនការនីមួយៗរបស់ខេត្តផងដែរ។

លោកបន្តថា ការកសាងផែនការ ក៏ត្រូវផ្តោតទៅលើបញ្ហាប្រឈម ទាំងនៅថ្នាក់ខេត្ត ក្រុង ស្រុក ឃុំ សង្កាត់ ដើមី្បឲ្យស្របទៅតាមយុទ្ធសាស្ត្របញ្ចកោណ របស់រាជរដ្ឋាភិបាល នីតិកាលទី៧ នៃរដ្ឋសភា ដែលមានសម្តេចធិបតី ហ៊ុន ម៉ាណែត ជានាយករដ្ឋមន្ត្រី ក្នុងការបន្សីគ្នាទៅនឹងផែនការដែលខេត្តបានលើកឡើង ដើមី្បឲ្យកម្ពុជាក្លាយជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ និងចំណូលខ្ពស់នៅឆ្នាំ២០៥០។

លោក លី សំរិទ្ធ ក៏វាយតម្លៃខ្ពស់ទៅលើរបាយការណ៍ប្រចាំខែមីនា របស់រដ្ឋបាលខេត្ត ដែលអនុវត្តបាន ព្រមទាំងសូមឲ្យធ្វើការត្រួតពិនិត្យឡើងវិញ នូវរាល់ខ្លឹមសារ អក្ខាវិរុទ្ធ និងតួលេខ នៅក្នុងរបាយការណ៍ មុននឹងដាក់ឆ្លងកិច្ចប្រជុំរបស់ក្រុមប្រឹក្សាខេត្ត។

លោក ប្រាក់ សោភ័ណ បានធ្វើការវាយតម្លៃខ្ពស់ចំពោះលទ្ធផល ដែលរដ្ឋបាលខេត្ត អនុត្តបានប្រចាំខែមីនា ព្រមទាំងបានធ្វើការណែនាំមួយចំនួន ដល់រដ្ឋបាលក្រុង ស្រុក ក្នុងការអនុវត្តទៅតាមទិសដៅនៃអង្គសន្និបាតរបស់រដ្ឋបាលខេត្ត ដែលបានដាក់ចេញក្នុងឆ្នាំ២០២៥ ឲ្យសម្រេចបានជោគជ័យ។

លោកបន្តថា កត្តាសំខាន់ ត្រូវយកចិត្តទុកដាក់លើការងារសន្តិសុខ សណ្តាប់ធ្នាប់សាធារណៈ បំបាត់ឲ្យបានក្រុមក្មេងទំនើង ករណីគ្រឿងញៀន និងគោរពច្បាប់ចរាចរណ៍ផ្លូវគោក ព្រមទាំងបង្រ្កាបឲ្យខាងតែបានចំពោះបទល្មើសព្រៃឈើ និងជលផល ព្រមទាំងគ្រប់គ្រងឲ្យបាននូវព្រៃលិចទឹកបឹងទន្លេសាប(តំបន់៣) ហើយចំពោះបុគ្គលណា នៅតែបំពានរានដីព្រៃលិចទឹកតំបន់បី ត្រូវធ្វើការផ្តន្ទាទោសទៅតាមច្បាប់។

លោកបានបន្តថា នៅថ្ងៃខាងមុខនេះ ក្រសួងរៀបចំដែនដីនគរូបនីយកម្ម សំណង់ និងសុរិយោដី នឹងធ្វើការប្រគល់ប័ណ្ណកម្មសិទ្ធិដីធ្លី ប្រមាណជា ៣ម៉ឺនប័ណ្ណ ព្រមទាំងធ្វើពិធីប្រកាសបិទយុទ្ធនាការវាស់វែងដីធ្លី ជាលក្ខណៈប្រព័ន្ធ និងធ្វើការចុះពិនិត្យរាល់ដីដែលពាក់ព័ន្ធបុរាណដ្ឋានផងដែរ។ ម៉្យាងទៀត ខេត្តសៀមរាបនឹងផ្តល់អត្តសញ្ញាណប័ណ្ណជូនប្រជាពលរដ្ឋ មិនឲ្យមានការយឺតយ៉ាវដូចមុនឡើយ។

លោកបន្ថែមថា ក្នុងនាមប្រធានគណៈបញ្ជាការឯកភាពរដ្ឋបាលខេត្ត បានដាក់នូវបទបញ្ជាដល់អាជ្ញាធរមានសមត្ថកិច្ចទាំងអស់ ត្រូវធ្វើការត្រួតពិនិត្យ នូវគ្រប់យានយន្តកែច្នៃ ដែលតែរំខានដល់អារម្មណ៍ប្រជាពលរដ្ឋ ភ្ញៀវទេសចរជាតិ និងអន្តរជាតិ ព្រមទាំងរថយន្តដែលដឹកសំពីងសំពោងលើសចំណុះ ដែលធ្វើឲ្យប៉ះពាល់ដល់អ្នកធ្វើដំណើរតាមដងផ្លូវ និងធ្វើឲ្យប៉ះពាល់ដល់បរិស្ថានតាមដងផ្លូវ ដូចជា៖ រថយន្តដឹកខ្សាច់ ដឹកដី និងដឹកអង្កាម ជាដើម។

ជាមួយនេះ លោកបញ្ជាក់ថា ដោយខេត្តសៀមរាបជាខេត្តដែលរៀបចំព្រឹត្តិការណ៍អង្គរសង្ក្រាន្តឆ្នាំ២០២៥ ដូច្នេះហើយ គ្រប់មន្ទីរ អង្គភាព ក្រុង ស្រុក ត្រូវបង្កើនយកចិត្តទុកដាក់ការងារសន្តិសុខ សណ្តាប់ធ្នាប់សាធារណៈនៅតាមមូលដ្ឋានខ្លួន ក្នុងពេលប្រជាពលរដ្ឋចូលរួមសប្បាយសាទរ បុណ្យចូលឆ្នាំថ្មី ប្រពៃណីខ្មែរខាងមុខ ពិសេសនៅតាមបណ្តាក្រុង ស្រុក ដែលមានភ្ញៀវទេសចរឆ្លងកាត់ ត្រូវធ្វើអនាម័យ សម្អាតនៅតាមដងផ្លូវឲ្យបានស្អាត ក្នុងការទទួលស្វាគមន៍ភ្ញៀវទេសចរជាតិ និងអន្តរជាតិ៕