(កណ្ដាល)៖ ចាប់តាំងពីថ្ងៃទី៣១ ខែមីនា ឆ្នាំ២០២៥ មកដល់បច្ចុបន្ន គេសង្កេតឃើញក្រុមនគរបាលចរាចរណ៍ នៃអធិការដ្ឋាននគរបាលក្រុងតាខ្មៅ បានធ្វើយុទ្ធនាការរឹតបន្តឹងច្បាប់ចរាចរណ៍នៅតាមគោលដៅនានា ពិសេសនៅមុខសាលារៀន។

ឆ្លើយតបនឹងសំណួរភ្នាក់ងារព័ត៌មាន Fresh News ប្រចាំខេត្តកណ្ដាល នៅថ្ងៃទី៣ ខែមេសា ឆ្នាំ២០២៥នេះ, លោកវរសេនីយ៍ឯក យី វណ្ណដា អធិការនគរបាលក្រុងតាខ្មៅ បានប្រាប់ថាដោយគោរពតាមការណែនាំពី លោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្ត ក្រុមការងារបានចុះទៅអនុវត្តន៍ច្បាប់ចរាចរណ៍ និងអប់រំ នៅតាមគោលដៅនានាក្នុងក្រុងតាខ្មៅ ពិសេសគឺនៅពីមុខសាលារៀនតែម្ដងបដើម្បីរឹតបន្តឹងច្បាប់ និងចង់ឱ្យក្មេងៗសិស្សសាលារួមគ្នាគោរពច្បាប់ចរាចរណ៍ឱ្យបានគ្រប់គ្នា។

តបនឹងសំណួរលើចំណុចសំខាន់ដែលក្រុមការងារដាក់គោលដៅមុខសាលារៀន, លោកអធិការតបទៀតថា ដោយសារកន្លងទៅ ឃើញថាសិស្សាសាលា ហាក់មិនបានចូលរួមក្នុងការគោរពច្បាប់ឡើយ បើកបរដោយគ្មានមួកសុវត្ថិភាព ហើយខ្លះបើកលឿនៗជាដើម ដែលជាហេតុបង្កើតឱ្យមានបញ្ហាចរាចរណ៍មួយចំនួនកើតឡើង ដូច្នេះ ដើម្បីដាស់តឿនក្រើនរម្លឹកដល់ពួកគាត់ឱ្យគោរពច្បាប់ ក្រុមការងារបានចុះអប់រំផង និងផាកពិន័យផងថោយមានចេញវិកយបត្រត្រឹមត្រូវ សំដៅដល់ការកាត់បន្ថយគ្រោះថ្នាក់ចរាចរណ៍ និងសុវត្ថិភាពលើដងផ្លូវ។

លោកអធិការបានបន្ថែមថា គោលដៅនានានៅក្នុងក្រុងក៏ដាក់ក្រុមការងារដែរ ដើម្បីអនុវត្តន៍ទៅលើការល្មើសច្បាប់ចរាចរណ៍ ដូច្នេះស្នើដល់ប្រជាពលរដ្ឋទាំងអស់ សូមរួមគ្នាគោរពច្បាប់ចរាចរណ៍ទាំងអស់គ្នា៕