(បាត់ដំបង)៖ លោក អ៊ុយ រី ប្រធានក្រុមប្រឹក្សាខេត្តបាត់ដំបង និងលោក សុខ លូ អភិបាលខេត្ត បានដឹកនាំមន្ត្រីរាជការ មន្ទីរ អង្គភាពជុំវិញខេត្ត និងសប្បុរសជន នៅព្រឹកថ្ងៃទី៣ ខែមីនា ឆ្នាំ២០២៥ បានអញ្ជើញចុះ សំណេះសំណាល សួរសុខទុក្ខ កងកម្លាំងដែលកំពុងឈរជើងនៅតាមខ្សែបន្ទាត់ព្រំដែនគោក ក្នុងភូមិសាស្រ្ដ ស្រុកសំឡូត មុនឱកាសពិធីបុណ្យចូលឆ្នាំថ្មីប្រពៃណីជាតិ នាពេលខាងមុខនេះ។
ការចុះសំណេះសំណាលសួរសុខទុក្ខកងកម្លាំងដែលឈរជើងនៅតាមបន្ទាត់ព្រំដែនកម្ពុជា-ថៃ ក្នុងភូមិសាស្រ្ដ ស្រុកសំឡូតខេត្តបាត់ដំបង រួមមាន៖ កងពលតូចថ្មើរជើងលេខ៥២ ស្រុកសំឡូត, វរសេនាតូចនគរបាល ការពារព្រំដែនគោកលេខ៣១០ ស្រុកសំឡូត, កងការពារព្រំដែនលេខ៥០២ ស្រុកសំឡូត, វរសេនាតូចនគរបាលការពារព្រំដែនគោកលេខ៨២៣ ស្រុកសំឡូត។
ក្នុងឱកាសនោះ ថ្នាក់ដឹកនាំខេត្ត បាននាំយកអំណោយរបស់រដ្ឋបាលខេត្តមួយចំនួនដូចជា៖ ភេសជ្ជៈ ចំនួន៣០កេស, ទឹកសុទ្ធ៥០កេស, នំ អន្សមជ្រូក១ស្លឹក, សាច់ជ្រូកស្រស់៦០ គីឡូក្រាម, បន្លែស្រស់ ៥០គីឡូក្រាម, ម៉ាស់២០ប្រអប់ និងថវិកា៦លានរៀល ដើម្បីធ្វើការចែកជូនដល់កងកម្លាំងដែលការពារនៅតាមបន្ទាត់ព្រំដែនកម្ពុជា-ថៃ៕
