(ភ្នំពេញ)៖ សម្តេចតេជោ ហ៊ុន សែន ប្រមុខរដ្ឋស្តីទីនៃកម្ពុជា នៅថ្ងៃទី៣ ខែមេសានេះ បានផ្ញើសារលិខិតជូនឯកឧត្តម ថងលូន ស៊ីសូលីត (Thongloun Sisoulith) អគ្គលេខាបក្សបដិវត្តន៍ឡាវ ដើម្បីចូលរួមរំលែកទុក្ខចំពោះមរណភាពលោក ខាំតៃ ស៊ីផាន់ដន អតីតនាយករដ្ឋមន្ត្រី និងប្រធានរដ្ឋ នៃសាធារណរដ្ឋប្រជាធិបតេយ្យប្រជាមានិតឡាវ និងជាអតីតប្រធានគណៈកម្មាធិការមជ្ឈិមនៃបក្សបដិវត្តន៍ឡាវ។
សារលិខិតរបស់សម្តេចតេជោ ហ៊ុន សែន មានខ្លឹមសារដូច្នេះថា «ខ្ញុំមានសេចក្តីសោកសង្រេងយ៉ាងខ្លាំង ដោយទទួលបានដំណឹងពីមរណភាព ឯកឧត្តម ខាំតៃ ស៊ីផាន់ដន អតីតនាយករដ្ឋមន្ត្រី និងអតីតប្រធានរដ្ឋឡាវ និងជាអតីតប្រធានគណៈកម្មាធិការមជ្ឈិមនៃបក្សបដិវត្តន៍ ឡាវ នៅទីក្រុងវៀងចន្ទន៍ នាព្រឹកម្សិលមិញ។
មរណភាព ឯកឧត្តម ខាំតៃ ស៊ីផាន់ដន គឺជាការបាត់បង់ អ្នកដឹកនាំដែលមានទស្សនវិស័យវែងឆ្ងាយ រដ្ឋបុរសដ៏ឧត្តុង្គឧត្តម និងតួអង្គសំខាន់ក្នុងប្រវត្តិសាស្ត្ររបស់ប្រទេសឡាវ ដែលបានរួមចំណែកយ៉ាងសំខាន់ក្នុងការរៀបចំកសាង នូវជោគជ័យនិងនិងភាពលេចធ្លោ របស់ប្រទេសជាតិនាសម័យទំនើប។
ឯកឧត្តម ខាំតៃ ស៊ីផាន់ដន នឹងស្ថិតនៅក្នុងការចងចាំជានិច្ច ក្នុងនាមជាមិត្ត និងដៃគូដ៏ឧត្តុង្គឧត្តមរបស់កម្ពុជា និងប្រជាជនកម្ពុជា ក៏ដូចជាស្ថាបនិកគន្លឹះមួយរូប នៅក្នុងការកសាងនូវចំណងមិត្តភាព និងភាព ដៃគូដ៏យូរអង្វែងរវាងប្រជាជាតិនិងបក្សយើងទាំងពីរ។
ក្នុងនាមគណបក្សប្រជាជនកម្ពុជា ខ្ញុំសូមចូលរួមរំលែកទុក្ខយ៉ាងក្រៀមក្រំបំផុត និងសេចក្តីអាណិត អាសូរយ៉ាងជ្រាលជ្រៅជូនចំពោះ ឯកឧត្តម និងក្រុមគ្រួសារ ក៏ដូចជាប្រជាជនឡាវ និងបក្សប្រជាជន បដិវត្តន៍ឡាវ ចំពោះការបាត់បង់ដ៏ធំធេងនេះ។ សូមវិញ្ញាណក្ខន្ធ ឯកឧត្តម ខាំតៃ ស៊ីផាន់ដន បានទៅកាន់ សុគតិភពកុំបីឃ្លៀងឃ្លាតឡើយ»៕