(ព្រះវិហារ)៖​ លោកឧត្ដម​សេនីយ៍​ទោ​ ច័ន្ទ​ សុភ័ក្រា​ មេបញ្ជាការ​តំបន់​ប្រតិបត្តិការ​សឹក​រងព្រះវិហារ​ នៅថ្ងៃទី០២ ខែមេសា ឆ្នាំ២០២៥ បានដឹកនាំនាយទាហាន នាយទាហានរង អញ្ជើញចុះ​សួរសុខទុក្ខ និងនាំអំណោយដ៍ថ្លៃថ្លារបស់សម្តេចបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា និងលោកជំទាវ​បណ្ឌិត ប្រគល់ជូនគ្រួសារនាយទាហាន១គ្រួសារ ដែលរងគ្រោះដោយភ្លើងឆេះផ្ទះ នៅស្រុកជាំក្សាន្ត ខេត្តព្រះវិហារ​។​

នៅក្នុងឱកាសនោះដែរ លោកឧត្តមសេនីយ៍ទោ ច័ន្ទ សុភ័ក្ត្រា បានថ្លែងនូវការចូលរួមសោកស្តាយចំពោះហេតុការណ៍គ្រោះអគ្គីភ័យ ដែលបណ្តាលឱ្យឆេះផ្ទះ និងខូចខាតទ្រព្យសម្បត្តិអស់ជាច្រើន។​

លោកមេបញ្ជាការបានថ្លែងលើកទឹកចិត្តដល់នាយទាហាន និងក្រុមគ្រួសាររងគ្រោះ សូមកុំមានការអស់សង្ឃឹមឱ្យសោះ ក្នុងនាមនាយទាហាន នាយទាហានរង និងពលទាហាន ក្នុងអង្គភាពផ្នែកសឹករងស្រុកជាំក្សាន្ត ក៏ដូចជាតំបន់ប្រតិបត្តិការសឹករងខេត្ត មិនមើលនឹងភ្នែកនោះទេ និងនៅចាំជួយជានិច្ច លើសពីនេះទៅទៀតពេលនេះ ថ្ងៃនេះ លោកបាននាំអំណោយដ៍ថ្លៃថ្លារបស់សម្តេចនាយករដ្ឋមន្ត្រី និងលោកជំទាវ​បណ្ឌិត យកមកប្រកល់ជូនថែមទៀតផង។​

សូមបញ្ជាក់ថា នាយទាហានដែលរងគ្រោះដោយអគ្គីភ័យភ្លើងឆេះផ្ទះ មានឈ្មោះ ហេង ធារិទ្ធ ឋានៈអនុសេនីយ៍​ទោ​ បម្រើការងារនៅអង្គភាពផ្នែក​សឹក​រងជាំក្សាន្ដ​ តំបន់​ប្រតិបត្តិការ​សឹក​រងព្រះវិហារ​ បានរងគ្រោះ​ដោយភ្លើង​ឆេះផ្ទះ​ទាំងស្រុង​ នៅថ្ងៃទី២៨​ ខែមីនា​ ឆ្នាំ​២០២៥​ ស្ថិត​នៅភូមិ​តេជោ​បុស្សស្បូវ​ ឃុំ​ស្រអែម ស្រុកជាំក្សាន្ដក្នុង​ ខេត្ត​ព្រះ​វិហារ​។​

អំណោយ​ដែលនាំមកប្រគល់ជូន ដល់គ្រួសាររងគ្រោះ​នាពេលនេះរួម​មាន​៖​ អង្ករ​ ចំនួន០២បេ​ ទឹកត្រី​ ចំនួន០២យួរ​ មី​ ចំនួន០២កេស​ ត្រីខ​ ចំនួន០២យួរ តង់​ ៣គុណ៤​ ចំនួន​០១​ និងថវិកា​ចំនួន​ ៣០០,០០០រៀល​ផងដែរ​៕