(ភ្នំពេញ)៖ បណ្តាញព័ត៌មាន Fresh News ដែលជាស្ថាប័នព័ត៌មានឈានមុខមួយនៅកម្ពុជា នៅព្រឹកថ្ងៃទី០២ ខែមេសា ឆ្នាំ២០២៥នេះ បានទទួលបណ្ណសរសើរ ពីអង្គភាពអ្នកនាំពាក្យរាជរដ្ឋាភិបាល ក្នុងការចូលរួមយ៉ាងសកម្មក្នុងការផ្សព្វផ្សាយពីគោលនយោបាយ និងសមិទ្ធផលនានារបស់រាជរដ្ឋាភិបាល នីតិកាលទី៧ នៃរដ្ឋសភា ព្រមជាមួយសកម្មភាពប្រតិកម្ម និងបុរេសកម្មនានារបស់ អង្គភាពអ្នកនាំពាក្យរាជរដ្ឋាភិបាល (អ.អ.រ.)។

ពិធីទទួលបណ្ណសរសើរ និងបាយសាមគ្គីអបអរសាទរបុណ្យចូលឆ្នាំប្រពៃណីខ្មែរ ធ្វើឡើងក្រោមអធិបតីភាព លោក ប៉ែន បូណា រដ្ឋមន្រ្តីប្រតិភូអមនាយករដ្ឋមន្រ្តី និងជាប្រធានអង្គភាពអ្នកនាំពាក្យរាជរដ្ឋាភិបាល បានប្រគល់ដោយផ្ទាល់នូវបណ្ណសរសើរមកកាន់បណ្ដាញព័ត៌មាន Fresh News ដែលមានលោក ម៉ារ យ៉ារិទ្ធិ ទីប្រឹក្សាជាន់ខ្ពស់របស់ Fresh News ជាតំណាង។ នៅក្នុងកម្មវិធីក៏មានការចូលរួមពី ថ្នាក់ដឹកនាំ នៃស្ថាប័នព័ត៌មានជាតិ និងអន្តរជាតិជាច្រើនទៀត។

សូមជម្រាបថា គិតមកដល់ពេលបច្ចុប្បន្ននេះ បណ្តាញព័ត៌មាន Fresh News បាននឹងកំពុងចូលរួមយ៉ាងសកម្ម ក្នុងការផ្សព្វផ្សាយនូវព័ត៌មានពិតជារៀងរាល់ថ្ងៃ និងលើព័ត៌មានគ្រប់វិស័យដើម្បីបញ្ជ្រាបចំណេះដឹងដល់សាធារណជន ជាពិសេសអង្គភាពព័ត៌មាន បានក្លាយជាអង្គភាពព័ត៌មានមួយ ដែលបានបញ្ជូនព័ត៌មានពិតរហ័ស ជាទីទុកចិត្ត ជូនដល់ដៃមិត្តអ្នកអានរបស់ខ្លួន ដើម្បីចូលរួមចំណែកលប់បំបាត់នូវព័ត៌មានក្លែងក្លាយផងដែរ៕