(កំពង់ធំ)៖ លោកស្រី ឃួន ឃុនឌី សមាជិកព្រឹទ្ធសភា នាព្រឹកថ្ងៃទី២ ខែមេសា ឆ្នាំ២០២៥ បានអញ្ជើញជាអធិបតីសម្ពោធសមិទ្ធផលថ្មីក្លោងទ្វារវត្តសីតម្មោពោធិមង្គល (ហៅវត្តពោធ៍បាក់ក) ស្ថិតនៅភូមិពោធិ៍បាក់ក សង្កាត់ដំរីជាន់ខ្លា ក្រុងស្ទឹងសែន ខេត្តកំពង់ធំ។
ថ្លែងនាឱកាសនោះ លោកស្រី ឃួន ឃុនឌី បានផ្ដាំផ្ញើការសាកសួរសុខទុក្ខពីសម្ដេចតេជោ ហ៊ុន សែន ប្រធានព្រឹទ្ធសភា និងបានថ្លែងថា សមិទ្ធផលទាំងអស់នេះកើតចេញពីគំនិតផ្ដួចផ្ដើមរបស់ព្រះតេជគណចៅអធិការវត្ត លោកតាអាចារ្យគណៈកម្មាវត្ត ពុទ្ធបរិស័ទជាច្រើននាក់ទៀតដែលបានកៀរគរ សប្បុរសជននានាជិតឆ្ងាយទាំងក្នុង និងក្រៅប្រទេសដើម្បីជួយកសាងឱ្យលេចចេញជាផ្លែផ្កានៅសមិទ្ធផលផ្សេងៗជាច្រើន សម្រាប់តម្កល់ទុកនៅ ទីវត្តអារាមដើម្បីឲ្យពុទ្ធបរិស័ទបានធ្វើបុណ្យទាន និងរក្សាសីលតាមប្រពៃណីព្រះពុទ្ធសាសនា ទុកជាគុណប្រយោជន៍ដល់ពុទ្ធបរិស័ទទាំងអស់គ្នាទៅថ្ងៃក្រោយ។
លោកស្រី បញ្ជាក់ថា វិស័យព្រះពុទ្ធសាសនា ក៏ដូចជាវិស័យផ្សេងៗទៀត នៅក្នុងប្រទេសកម្ពុជាមានការរីកចម្រើនជាលំដាប់ដោយសារកត្តាសុខសន្តិភាពដែលបានមកពីការខិតខំប្រឹងប្រែងរបស់ប្រមុខរាជរដ្ឋាភិបាលដែលមានសម្ដេចបវធិបតី ហ៊ុន ម៉ាណែត ជានាយករដ្ឋមន្ត្រី។
កត្តាសុខសន្តិភាពនេះ បានធ្វើឲ្យប្រជាពុទ្ធបរិស័ទ មានឱកាសជួបជុំធ្វើបុណ្យទានជួបជុំគ្នាសប្បាយរីករាយ ដោយសារប្រទេសគ្មានសង្រ្គាមមានសន្តិសុខសណ្តាប់ធ្នាប់ល្អ មានអាជ្ញាធរសមត្ថកិច្ចកងកម្លាំងប្រដាប់អាវុធបង្ក្រាបរាល់អំពើបទល្មើសទាំងឡាយ ដើម្បីជួយសម្រួលដល់ការរស់នៅរបស់ប្រជាពលរដ្ឋប្រកបដោយសុខដុមរមនា នឹងមានឱកាសរកទទួលទានបង្កើនជីវភាព គ្រួសារតាមមុខរប រៀងៗខ្លួនឲ្យកាន់តែប្រសើរឡើងផងដែរ។
លោកស្រី ឃួន ឃុនឌី បានថ្លែងអំណរគុណដល់ឧបាសក ជា ឆោម និងឧបាសិកា ចេង ណៃស៊ត រួមទាំងក្រុមគ្រួសារ ព្រមទាំងសប្បុរសជនទាំងអស់បានលះបង់ថវិកាកសាងក្លោងទ្វារ និងសមិទ្ធិផលឲ្យបានរួចរាល់ដើម្បីសម្រាប់ជាប្រយោជន៍រួមទាំងអស់គ្នា។
គួរបញ្ជាក់ថា ក្លោងទ្វារដែលបានសាងសង់រួចរាល់មានកម្ពស់ ៩.៩ម៉ែត្រ ទទឹង ៨.៨ម៉ែត្រ កសាងថ្ងៃទី៣ ខែធ្នូ ឆ្នាំ២០២៤ បញ្ចប់ថ្ងៃទី១ ខែមេសា ឆ្នាំ២០២៥ អស់ថវិកា ២២.០០០ដុល្លារអាមេរិក៕