(ភ្នំពេញ)៖ សាលាអប់រំពិសេសនៃការលូតលាស់ (GSES) នៅថ្ងៃទី០២ ខែមេសា ឆ្នាំ២០២៥នេះ បានប្រារឰទិវាអូទីស្សឹមពិភពលោកឆ្នាំ ២០២៥ ជាមួយនឹងការអំពាវនាវ ការគាំទ្រការកសាងសាលារៀនថ្មី ពីសំណាក់ស្ថាបនិក និងនាយិកា ដោយលើកឡើងពីដំណើរ និងបេសកកម្មបន្តរបស់សាលាក្នុងការជួយដល់កុមារអូទីស្សឹម។
កម្មវិធីនេះ រៀបចំឡើងនៅព្រះវិហារព្រះកុមារយេស៊ូ នៃព្រះសហគមន៍កាតូលិកនៅបឹងទំពុន រាជធានីភ្នំពេញ ដោយមានការអញ្ជើញចូលរួមពីភ្ញៀវកិត្តិយស មាតាបិតាសិស្ស និងអ្នកគាំទ្រ បានផ្តោតសំខាន់លើតម្រូវការបន្ទាន់សម្រាប់សាលាថ្មី ដើម្បីបំពេញការអប់រំ និងការព្យាបាលឯកទេស។
ចាប់តាំងពីការបង្កើតឡើងក្នុងឆ្នាំ ២០១៧ ដោយអ្នកស្រី ភោគ ម៉ានី ជាម្តាយរបស់កុមារអូទីស្សឹមសាលា GSES គឺជាសញ្ញានៃក្តីសង្ឃឹមសម្រាប់គ្រួសារ ដែលជួបការលំបាកក្នុងការស្វែងរកឱកាសសិក្សាសមរម្យសម្រាប់កូនរបស់ពួកគេ។
អ្នកស្រី ម៉ានី បានចែករំលែកថា «សាលានេះ មិនគ្រាន់តែជាកន្លែងសិក្សាប៉ុណ្ណោះទេ វាគឺជានិមិត្តសញ្ញានៃក្តីសង្ឃឹម និងសមភាពសម្រាប់កុមារអូទីស្សឹម ដែលជារឿយៗ ត្រូវបានបដិសេធនៅតាមសាលារៀនរដ្ឋ និងជនឯកជាច្រើន។ វាជាការផ្តល់ឱកាសដល់កុមារទាំងនេះដើម្បីរីកចម្រើន»។
ដោយចាប់ផ្តើមពីសិស្សត្រឹមតែប្រាំមួយនាក់ សាលា GSES បានពង្រីកខ្លួនដើម្បីបម្រើសិស្សចំនួន៣៤៥នាក់ នាពេលបច្ចុប្បន្នដោយមានក្មេងស្រីចំនួន៥៩នាក់ និងបុគ្គលិកចំនួន ១១៦នាក់ (ស្រី៧៨នាក់)។
ទោះជាយ៉ាងណាក៏ដោយ ដោយសារតម្រូវការសេវាកម្មបន្តកើនឡើង សាលារៀនកំពុងខិតខំប្រឹងប្រែងក្នុងការពង្រីកខ្លួន និងពង្រឹងសមត្ថភាពក្នុងការផ្ដល់ការអប់រំ និងបំណិនជីវិតដល់ពួកគេ។
នៅខែមិថុនា ឆ្នាំ២០២៤ គណៈកម្មាធិការព្រះវិហារព្រះកុមារយេស៊ូ នៃព្រះសហគមន៍កាតូលិក បានផ្តល់ដីដល់សាលា GSES នៅលើបរិវេណរបស់ខ្លួន ដើម្បីសាងសង់សាលា ១០ ជាន់សម្រាប់កុមារអូទីស្សឹម។
អគារថ្មីកម្ពស់ ១០ ជាន់ គឺជាគម្រោងផ្លាស់ប្តូរដែលនឹងមានបន្ទប់ចំនួន ៥០ រួមទាំងថ្នាក់រៀន បន្ទប់ព្យាបាលផ្នែកចលនា បន្ទប់ព្យាបាលផ្នែកញាណ បន្ទប់ថែទាំ និងសូម្បីតែអាងហែលទឹក។
រចនាសម្ព័ន្ធទំនើបនេះ នឹងមិនត្រឹមតែបំពេញតម្រូវការអប់រំប៉ុណ្ណោះទេ ប៉ុន្តែថែមទាំងផ្តល់នូវបរិយាកាសចិញ្ចឹមបីបាច់សម្រាប់ការបណ្តុះបណ្តាលបំណិនជីវិត និងការអភិវឌ្ឍន៍ប្រកបដោយបរិយាប័ន្នផងដែរ។
ដើម្បីជួយរៃអង្គាសថវិកាចាំបាច់ សាលា GSES បានចាប់ផ្តើមយុទ្ធនាការ «មួយដុល្លារ មួយសុបិន» ហើយបានរៃអង្គាសប្រាក់បានចំនួន ៥១,៣៣៥ដុល្លាររហូតមកដល់ពេលនេះ។
អ្នកស្រី ម៉ានី បានឱ្យដឹងថា៖ «អគារនេះនឹងផ្លាស់ប្តូរជីវិត មិនត្រឹមតែសម្រាប់កុមារអូទីស្សឹមប៉ុណ្ណោះទេ ប៉ុន្តែសម្រាប់គ្រួសាររបស់ពួកគេ ដែលជារឿយៗ តស៊ូជាមួយភាពតានតឹង ក្នុងការចិញ្ចឹមកូនដែលមានតម្រូវការពិសេស»។
អ្នកស្រី បានថ្លែងថា «យើងត្រូវការជំនួយពីសំណាក់ទ្រង់ ឯកឧត្ដម លោកអ្នកឧកញ៉ា អ្នកឧកញ៉ា ឧកញ៉ា លោក លោកស្រី និងសប្បុរសជនទាំងអស់ ដើម្បីធ្វើឱ្យសុបិននេះក្លាយជាការពិត»។
អគារសិក្សាថ្មីនេះ គឺជាការសហការគ្នារវាងសាលា GSES និងព្រះសហគមន៍កាតូលិក ដែលឆ្លុះបញ្ចាំងពីការប្តេជ្ញាចិត្តយូរអង្វែងរបស់ព្រះវិហារចំពោះការគាំទ្រ និងការធ្វើបរិយាប័ន្នក្នុងសហគមន៍។
ចាប់តាំងពីការបង្កើតឡើងមក ព្រះវិហារបានក្លាយជាសសរស្តម្ភសម្រាប់សលាអប់រំពិសេស GSES ហើយការសម្រេចចិត្តបែងចែកដីសម្រាប់សាលាថ្មីនេះ បង្ហាញពីចក្ខុវិស័យរួមគ្នា ក្នុងការលើកកម្ពស់សេចក្តីថ្លៃថ្នូរ និងការអប់រំសម្រាប់កុមារទាំងអស់ ដោយមិនគិតពីសាវតារបស់ពួកគេ។ គម្រោងនេះ មិនត្រឹមតែសម្រាប់កុមារដែលកំពុងចូលរៀន GSES ប៉ុណ្ណោះទេ ប៉ុន្តែសម្រាប់មនុស្សជំនាន់ក្រោយផងដែរ។
អ្នកស្រី ម៉ានី បាននិយាយថា «សាលារៀននេះ នឹងក្លាយជាមរតកដ៏យូរអង្វែងនៃក្តីមេត្តា និងក្តីសង្ឃឹមសម្រាប់កុមារទាំងអស់ដែលមានពីការភាពអូទីស្សឹម ហើយវានឹងផ្តល់ឱ្យគ្រួសារនូវអារម្មណ៍ ដែលទទួលបានការមើលថែ និងការអប់រំ»។
កម្មវិធីអបអរទិវាអូទីស្សឹមនេះ មានការគោរពភ្លេងជាតិ របាំជូនពរ សុន្ទរកថា និងសង្ឃដិកាអប់រំផ្លូវចិត្តដែលទាក់ទងទៅនឹងផ្លូវនៃប្រាជ្ញា មេត្តា និងធម្មជាតិពិតនៃ ជីវិត សម្ដែងដោយព្រះភិក្ខុ វជិរប្បញ្ញោបណ្ឌិត គូ សុភាព។ ទិវានេះបានបញ្ចប់ដោយការប្រគល់វិញ្ញាបនបត្រនៃការដឹងគុណដល់សិស្សគំរូ និងអាហារថ្ងៃត្រង់អបអរសាទរ។
សាលាអប់រំពិសេសនៃការលូតលាស់ (GSES) នៅតែប្តេជ្ញាចិត្តក្នុងការលើកកម្ពស់ភាពចម្រុះ និងបរិយាប័ន្នកុមារអូទីស្សឹម។ សម្រាប់ព័ត៌មានបន្ថែម ឬចូលរួមចំណែកក្នុងយុទ្ធនាការ «មួយដុល្លារ មួយសុបិន្ដ» សូមទាក់ទង GSES តាមរយៈ [email protected] ឬទូរស័ព្ទមកលេខ ០១២ ៧១ ៣១ ៨៨ / ០១២ ៧៤១ ៥៥៦៕
