(តាកែវ)៖ សកម្មជនគាំទ្រគណបក្សសង្គ្រោះជាតិប្រមាណជាង២០០នាក់ ក្នុងនោះមានសមាជិកគណៈអចិន្ត្រៃយ៍បក្សឃុំ និងសកម្មជនលេចធ្លោនៅតាមភូមិក្នុងឃុំដែលមកពីកូតា សម រង្ស៊ី និងគណបក្សសិទ្ធិមនុស្ស បានស្ម័គ្រចិត្តដោយសុទ្ធចិត្ត ដោះអាវ ដូរអាវ ផ្តាច់ខ្លួនចូលមករួមរស់ក្នុងជីវភាពនយោបាយជាមួយគណបក្សប្រជាជនកម្ពុជា។

ដោយកំហឹង និងការឈឺចាប់ពីព្រោះតែការចាញ់​បោកគណបក្ស​ប្រឆាំងអស់ពេលជាច្រើនឆ្នាំ ដែលមានតែការសន្យាខ្យល់ ភូតកុហក បោកប្រាស់ប្រជាពលរដ្ឋ បាននាំឲ្យមានការឈ្លោះគ្នារវាង​អ្នកជិតខាងនៅក្នុង​ភូមិដោយការប្រកាន់​និន្នាការ និងចុងក្រោយនេះ លេចលឺនូវព័ត៌មាន នៃការបែកបាក់ក្បាល​ម៉ាស៊ីនដឹកនាំបក្ស​ដូចជាករណី​កូនស្រីរបស់លោក កឹម សុខា បកអាក្រាតមេបក្ស និងការប្រកាស​ចាកចេញរបស់ព្រះ​អង្គម្ចាស់ ស៊ីសុវត្ថិ ធម្មិកោ ពីបក្សសង្គ្រោះជាតិ បាននាំឲ្យសកម្មជនបក្សប្រឆាំងនៅក្នុងឃុំកុមារាជា ក្នុងនោះភាគច្រើនជាយុវជន យុវនារី អស់ជំនឿលើបក្សសង្គ្រោះជាតិ បានមកចូលរួមក្នុងជីវភាពនយោបាយជាមួយបក្សប្រជាជនកម្ពុជា ហើយថែមទាំងបានដុតអាវបក្សសង្គ្រោះជាតិចោលទៀតផង។

ការផ្តាច់ខ្លួនរបស់សកម្មជនគាំទ្របក្សសង្គ្រោះជាតិ ចំនួន២១៥នាក់ ដែលបានដោះអាវ និងដុតអាវបក្សប្រឆាំង រួមទាំងបងប្អូនផ្សេងៗ​ទៀតដែលមិនមាននិន្នាការ​គណបក្សនយោបាយណា ហើយបានមក​សុំរួមរស់នៅជាមួយគណបក្សប្រជាជន​កម្ពុជា​ដោយស្ម័គ្រចិត្ត មានគ្នាសរុប៤២០នាក់បានប្រារព្ធពិធីនៅ​ក្នុងឃុំកុមារាជា ស្រុកបាទី ខេត្តតាកែវ នាព្រឹកថ្ងៃទី៣០ ខែតុលា ឆ្នាំ២០១៦នេះ ក្រោមអធិបតីភាពលោក ស្វាយ ស៊ីថា សមាជិកគណៈកម្មាធិការកណ្តាលគណបក្សប្រជាជនកម្ពុជា និងជាប្រធានក្រុមការងារថ្នាក់ជាតិចុះជួយឃុំកុមារាជា  ក្នុងនោះក៏មានការអញ្ជើញចូលរួមពីលោក សុខ ពុទ្ធិវុធ អនុប្រធានបក្សខេត្ត និងជាប្រធានក្រុមការងារជំនាញសម្របសម្រួលជាមួយយុវជន នៃក្រុមការងារថ្នាក់កណ្ដាលចុះជួយខេត្តតាកែវផងដែរ។

លោក អ៊ុក ឡេង សមាជិកអចិន្ត្រៃយ៍ គណបក្សសង្គ្រោះជាតិក្នុងឃុំកុមារាជា បានឲ្យដឹងថា មូលហេតុដែលគាត់សម្រេចចិត្តផ្តាច់ខ្លួន ចុះចូលរួមរស់ជាមួយគណបក្សប្រជាជនកម្ពុជា ដោយសារតែការអស់​ជំនឿ មិនអាចគាំទ្របក្សប្រឆាំងបានតទៅទៀត ។ លោក អ៊ុក ឡេង បន្តថា គាត់បានចាញ់បោកការភូតកុហករបស់បក្សប្រឆាំងអស់ពេលជាច្រើនឆ្នាំមកហើយ និងបានដឹងច្បាស់ថា បក្សប្រឆាំង​មានតែការសន្យាខ្យល់ ភូតកុហក បោកប្រាស់ប្រជាពលរដ្ឋតែប៉ុណ្ណោះ តែការពិតបក្សប្រឆាំងមិនបានជួយអ្វីបន្តិចសោះឡើយដល់ប្រជាពលរដ្ឋ គឺមានតែការជំរុញឲ្យរូបគាត់ដើរអូសទាញ ញុះញង់ និងល្បួងឲ្យប្រជាពលរដ្ឋចូលរួមធ្វើបាតុកម្មខុសច្បាប់ជាដើម។

ជាពិសេសជាងនេះទៅទៀតនោះ ការទទួលព័ត៌មានអំពីការបែកបាក់ផ្ទៃក្នុង និងការឈ្លោះប្រកែកគ្នាក្នុងបក្សដូចជា បញ្ហាដែល​កូនស្រីរបស់លោក កឹម សុខា រិះគន់វាយប្រហារចំៗទៅលើលោក សម រង្ស៊ី អំពីការយកលេសបន្តរស់នៅឯក្រៅប្រទេស និងការមិនស្មោះត្រង់ចំពោះប្រជាពលរដ្ឋ ហើយថ្មីៗនេះព័ត៌មានអំពីការប្រកាស​ចាកចេញ​របស់​ព្រះអង្គម្ចាស់ ស៊ីសុវត្ថិ ធម្មិកោ ពីបក្សប្រឆាំង ដូចអ្វីដែលព្រះអង្គម្ចាស់ ស៊ីសុវត្ថិ ធម្មិកោ បានមានបន្ទូលថា សព្វថ្ងៃនេះគណបក្សសង្គ្រោះជាតិមិនបានធ្វើការជាប្រព័ន្ធទេ គឺធ្វើការជា​បក្ខពួកម្នាក់ថា អញ្ចេះ ម្នាក់នោះថាអញ្ចុះ អត់មានដើរទៅមុខរួចទេ និងអួតខ្លួនប្រកាសថា ខ្លួនឯងបង្រួបបង្រួមជំហរទាំងអស់ ប៉ុន្តែការពិតមានតែក្រុមបក្ខពួក ដូច្នេះវាផ្ទុយគ្នា អាហ្នឹងហើយជា​ការភូតភរ​បោកបញ្ឆោតប្រជារាស្ត្រ។

ដោយសារកើតមាននូវបញ្ហានៃការដឹកនាំរញ៉េរញ៉ៃក្នុងបក្ស គ្មានការកែទម្រង់ ដូចព្រះអង្គម្ចាស់ ធម្មិកោ បានមានបន្ទូល និងបានចាត់ទុកការលើកឡើងរបស់កញ្ញា កឹម មនោវិទ្យា បង្ហាញពីភាព​ជាគំរូ​ក្នុង​បក្សដែលហ៊ាននិយាយការពិត បាននាំឲ្យប្រជាពលរដ្ឋក្នុងឃុំយល់កាន់តែច្បាស់ថា បក្សប្រឆាំងកំពុងស្ថិតនៅក្នុងវិបត្តិបែកបាក់ក្បាលម៉ាស៊ីន ការដឹកនាំគ្មានមេកើយច្បាស់លាស់ ដូចរទេះភ្លើង​ដាច់ក្បាល អាចនឹងនាំឲ្យសកម្មជនជួបគ្រោះថ្នាក់ ដូច្នេះហើយ ទើបពួកគាត់ត្រូវតែចាកចេញមករួមរស់នៅជាមួយគណបក្សប្រជាជនកម្ពុជានៅក្នុងថ្ងៃនេះ។ ប្រជាពលរដ្ឋដែលបាន​ចុះចូលសមាជិកថ្មីរបស់​បក្សប្រជាជនកម្ពុជាមួយចំនួនទៀត បានឡើងបញ្ចេញមតិយោបល់ប្រហាក់ប្រហែលគ្នា អំពីការឈឺចាប់របស់ខ្លួន​ដោយសារចាញ់បោកបក្សប្រឆាំង​នាពេលកន្លងមក។

លោកតា ថាន់ នាង អតីតសកម្មជនគាំទ្របក្សសង្គ្រោះជាតិ បានថ្លែងទាំងក្តុកក្តួលក្នុងចិត្តពីការលំបាកវេទនាដែលរូបគាត់ និងក្រុមគ្រួសារគាត់ជួបប្រទះនាពេលកន្លងមក គឺបក្សសង្គ្រោះជាតិ​មិនដែលយកចិត្តទុកដាក់ពីសុខទុក្ខគាត់ឡើយ គឺមានតែការបោកប្រើទាំងយប់ទាំងថ្ងៃ រហូតដល់គាត់ខាតបង់ទ្រព្យសម្បត្តិអស់លុយកាក់ជាច្រើនដើម្បីយកទៅជួយបក្ស តែទីបំផុតគាត់ធ្លាក់ខ្លួនឈឺ មិនដែលថ្នាក់ដឹកនាំ​បក្សសង្គ្រោះជាតិអើពើជួយដោះស្រាយឡើយ។ ថ្ងៃនេះលោកតា ថាន់ នាង គាត់សម្រេចចិត្តដោះអាវ និងដុតអាវបក្សសង្គ្រោះជាតិចោលដើម្បីបញ្ជាក់ថា បក្សនោះមាន​តែការបោកប្រាស់ប៉ុណ្ណោះ ខុសពីមន្ត្រីខាងបក្សប្រជាជនកម្ពុជាដែលគាត់បានដឹងបានស្គាល់ គឺតែងតែចុះមកសួរសុខទុក្ខ និងជួយដោះស្រាយបញ្ហាជាច្រើននៅក្នុងមូលដ្ឋាន ។

លោក មាស ហាក់ សកម្មជនបក្សសង្គ្រោះជាតិមួយរូប នៅភូមិត្រពាំងផ្លុង ដែលបានចុះចូលជាមួយ CPP ថ្ងៃនេះ  បានកត់សម្គាល់នូវការយកចិត្តទុកដាក់ខ្ពស់របស់ក្រុមការងារគណបក្សប្រជាជនកម្ពុជា ដែលមិនចេះសន្យាទេ តែមានតែការអនុវត្តជាក់ស្តែង និងលេចចេញជាសមិទ្ធផលជាច្រើនជូនប្រជាពលរដ្ឋ នោះហើយដែលធ្វើឲ្យរូបគាត់ចាកចេញពីបក្សប្រឆាំង និងត្រូវតែចូលរួម​ជាមួយគណបក្សប្រជាជនកម្ពុជា។ លោក មាស ហាក់ ក៏បានមើលឃើញយ៉ាងជាក់ច្បាស់ពីការរួមចំណែក ជួយដោះស្រាយផ្ទាល់របស់ក្រុមការងារគណបក្សប្រជាជនកម្ពុជានៅក្នុងឃុំ ដែលដឹកនាំដោយ​លោក ស្វាយ ស៊ីថា បានជួយអភិវឌ្ឍភូមិឃុំឲ្យរីកចម្រើនស្ទើរគ្រប់វិស័យ ដូចជាការកសាងហេដ្ឋារចនាសម្ព័ន្ធ ផ្លូវ សាលារៀន វត្តអារាម ផែនការកសាងមណ្ឌលសុខភាព ការជួយស្តារស្រះ ជីក ស្តារប្រឡាយ និងដោះស្រាយទុក្ខកង្វល់របស់ប្រជាពលរដ្ឋជាច្រើន ក្នុងឃុំដោយមិនប្រកាន់និន្នាការគណបក្សនយោបាយឡើយ ជាពិសេសការពង្រឹងអនុវត្តគោលនយោបាយភូមិឃុំមានសុវត្ថិភាព បាននាំឲ្យប្រជាពលរដ្ឋ​សប្បាយចិត្តដែលក្នុង​មូលដ្ឋាន កាត់បន្ថយបាននូវក្រុម​បងតូចបងធំ ចោរកម្ម ល្បែងស៊ីសង គ្រឿងញៀនជាដើម។ល។ ហើយលោកគិតថា ទៅថ្ងៃមុខទៀត នឹងមានចរន្តនៃការចាក​ចេញកាន់តែច្រើនថែម​ទៀត​ពីបក្សប្រឆាំង។

ថ្លែងសំណេះសំណាលនៅក្នុងពិធីនោះ លោក ស្វាយ ស៊ីថា ក្នុងនាមសម្តេចតេជោ ហ៊ុន សែន ប្រធានគណបក្សប្រជាជនកម្ពុជា និងបណ្ឌិតសភាចារ្យ សុខ អាន ប្រធានក្រុមការងារ​ថ្នាក់ជាតិចុះមូលដ្ឋាន​ខេត្តតាកែវ បានសម្តែងនូវការអបអរសាទរ និងស្វាគមន៍យ៉ាងកក់ក្តៅបំផុតចំពោះការចូលរួមដោយស្ម័គ្រចិត្តរបស់អតីតសមាជិក អ្នកគាំទ្រគណបក្សសង្គ្រោះជាតិ មកចូលរួមជីវភាព​នយោបាយជាមួយ គណបក្សប្រជាជនកម្ពុជាថ្ងៃនេះ ដោយលោក ស្វាយ ស៊ីថា ចាត់ទុកថា ការចូលរួមរបស់អតីតអ្នកគាំទ្របក្សប្រឆាំងនេះ គឺមានសារៈសំខាន់ណាស់ ជាការទទួល​ស្គាល់នូវសច្ចធម៌​របស់គណបក្សប្រជាជនកម្ពុជា និងបង្ហាញនូវកម្លាំងរួបរួមសាមគ្គីគ្នា ដើម្បីថែរក្សាស្ថិរភាព ការជឿជាក់ និងក៏ជាការផ្តល់នូវយុត្តិធម៌​ជូនគណបក្សប្រជាជនកម្ពុជា ដែលខិតខំគ្រប់បែប​យ៉ាងដើម្បីការពារ​សន្តិភាព ស្ថិរភាពនយោបាយ ហើយការចូលរួមរបស់ប្រជាពលរដ្ឋ នឹងបានជាកម្លាំងបន្ថែមទៀត ដើម្បីការពារ និងចូលរួមអភិវឌ្ឍឲ្យកាន់តែរីកចម្រើនថែមទៀតនៅក្នុងភូមិឃុំ។

លោក ស្វាយ ស៊ីថា ក៏បានសំណូមពរផងដែរដល់ក្រុមការងារនៅមូលដ្ឋានផ្ទាល់ ទាំងសមាជិកចាស់ និងទើបបញ្ចូលថ្មីរបស់គណបក្សប្រជាជនកម្ពុជានៅថ្ងៃនេះ សូមបញ្ចប់ទាំងស្រុង​នូវការលាប​ពណ៌គ្នា។ លោកបានបញ្ជាក់ថា «ការលាបពណ៌គ្នា គឺជាគ្រាប់បែកដ៏គ្រោះថ្នាក់បំផុតដែលវា នឹងបំផ្លិចបំផ្លាញសង្គមជាតិ និយាយជារួម និងភូមិឃុំ និយាយដោយឡែក»។ ជាមួយគ្នានេះលោក ស្វាយ ស៊ីថា ក៏បានអំពាវនាវឲ្យសមាជិកគ្រប់រូប ត្រូវចេះរួមរស់ និងសហការគ្នា ដើម្បីកសាងនិងអភិវឌ្ឍមូលដ្ឋានឲ្យបានខ្លាំងក្លា ធ្វើយ៉ាងណាឲ្យជីវភាពប្រជាពលរដ្ឋបានកាន់តែប្រសើរឡើង។

លោក សុខ ពុទ្ធិវុធ អនុប្រធានបក្សខេត្ត និងជាប្រធានក្រុមការងារជំនាញសម្របសម្រួលជាមួយយុវជន នៃក្រុមការងារថ្នាក់កណ្ដាលចុះជួយខេត្តតាកែវ ដែលបានចូលរួមក្នុងពិធីនោះ បានលើកឡើងថា ការចូលរួមរស់នៅជាមួយគ្នារបស់ប្រជាពលរដ្ឋដែលធ្លាប់គាំទ្របក្សប្រឆាំងជាមួយបក្សប្រជាជនកម្ពុជា គឺប្រៀបបាននឹងចង្កឹះមួយបាច់ដ៏រឹងមាំ ច្របាច់បញ្ចូលគ្នា ធ្វើការជាមួយគ្នាដើម្បីបុព្វហេតុកសាងជាតិ និងការអភិវឌ្ឍឲ្យប្រទេសកាន់តែរីកចម្រើន។

បន្ទាប់ពីធ្វើពិធីដោះអាវ ប្តូរអាវ ចូលបក្សរួចមក លោក ស្វាយ ស៊ីថា និងក្រុមការងារ បានរួមដំណើរជាមួយអតីតអ្នកគាំទ្របក្សសង្គ្រោះជាតិដែលបានផ្តាច់ខ្លួនមករួមរស់នៅជាមួយ ទៅលើកស្លាក​គណ​បក្សប្រជា​ជនកម្ពុជា​នៅខាងមុខគេហដ្ឋានរបស់ពួកគាត់រៀងៗ​ខ្លួន។ នាឱកាសជួបជុំទទួលសមាជិកថ្មីកាលពីព្រឹក​មិញ លោក ស្វាយ ស៊ីថា ក៏បានចុះទៅពិនិត្យផ្ទាល់ និងសួរសុខទុក្ខ​នៅតាម​ខ្នងផ្ទះ​ប្រជាពលរដ្ឋ​មួយចំនួនដែលរងការខូចខាតដោយសារខ្យល់​បក់ខ្លាំងកាលថ្មីៗនេះ និងបានឧបត្ថម្ភនូវថវិកា​មួយចំនួនជូន​ប្រជាពលរដ្ឋ។ ក្រៅពីនេះលោក ស្វាយ ស៊ីថា ក៏បានឧបត្ថម្ភថវិកា​មួយ​ចំនួនទៀតជូន​ប្រធានក្រុមប្រឹក្សាឃុំកុមារាជា ដើម្បីធ្វើការជួសជុលផ្លូវនៅក្នុងឃុំផងដែរដែលរងការបាក់ដាច់ខូចខាតដោយសារជំនន់ទឹកភ្លៀងនាពេលកន្លងទៅនេះ។ បន្ទាប់ពីនោះសមាជិកដែល​ទើបផ្តាច់ខ្លួនចុះចូល និងសមាជិកដែលទើបនឹងបញ្ចូលថ្មី និងអ្នកចូលរួមទាំងអស់ប្រមាណជាង៥០០នាក់បានជួបជុំពិសារនំបញ្ចុកសម្លការីនំបុ័ងរួមគ្នា ក្នុងបរិយាកាសរីករាយ និងជាភាតរៈបំផុត៕