(ភ្នំពេញ)៖ កាកបាទក្រហមកម្ពុជា នៅព្រឹកថ្ងៃទី២៦​ ខែមីនា ឆ្នាំ២០២៥នេះ បានរៀបចំសន្និសីទសារព័ត៌មាន ក្រោមមូលបទ «រួមគ្នាស្ម័គ្រចិត្ដ ដើម្បីសហគមន៍មានសុខភាពល្អ និងមានភាពធន់នឹងអាកាសធាតុ» ដែលប្រព្រឹត្ដទៅនៅទីស្នាក់ការកាកបាទក្រហមកម្ពុជា។

សន្និសីទសារព័ត៌មាននេះ មានការអញ្ជើញជាអធិបតីពីលោកស្រី ម៉ែន នារីសោភ័គ អគ្គលេខាធិការរងទី១ កាកបាទក្រហមកម្ពុជា មន្ដ្រីទីស្នាក់ការកណ្ដាល និងអ្នកសារព័ត៌មានជាច្រើនរូបទៀត។

តាមរយៈសន្និសីទសារព័ត៌មានខាងលើនេះ លោកស្រី ម៉ែន នារីសោភ័គ បានថ្លែងថា សន្និសីទសារព័ត៌មាននេះ ធ្វើឡើងក្នុងគោលបំណង ដើម្បីផ្សព្វផ្សាយអំពីទិវាពិភពលោកកាកបាទក្រហមកម្ពុជា និងអឌ្ឍចន្ទក្រហម ៨ឧសភា ២០២៥ និងផ្សព្វផ្សាយឱ្យបានដឹងពីអ្វីដែលកាកបាទក្រហមកម្ពុជា បាននិងកំពុងធ្វើនៅក្នុងជួយដល់ប្រជាពលរដ្ឋដែលងាយរងគ្រោះ។

លោកស្រីបានបន្ថែមថា «បេសកកម្មមនុស្សធម៌ របស់កាកបាទក្រហមកម្ពុជា បានដំណើរការទៅបានមកដល់បច្ចុប្បន្ននេះ គឺដោយសារតែការចូលរួមឧបត្ថម្ភគាំទ្រពីសប្បុរសជនគ្រប់មជ្ឈដ្ឋាន ជាថវិកា និងស្បៀង សម្ភារៈជាដើម ក្នុងឱកាសទិវាពិភពលោកកាកបាទក្រហមកម្ពុជា និងអឌ្ឍចន្ទក្រហម ៨ឧសភា ជារៀងរាល់ឆ្នាំ ។ដូច្នេះឆ្នាំនេះក៏មិនខុសពីឆ្នាំមុនៗដែរ សូមយកឱកាស ទិវា ៨ឧសភានេះ​ បន្ដកៀរគរមូលនិធិពីសប្បុរសជនជាតិ-អន្ដរជាតិ ដើម្បីបន្ដជួយដល់ប្រជាពលរដ្ឋងាយរងគ្រោះ និងរងគ្រោះបំផុត»៕

ដើម្បីជ្រាបច្បាស់សូមទស្សនាវីដេអូសន្និសីទសារព័ត៌មានដូចតទៅ៖