(ភ្នំពេញ)៖ សមត្ថកិច្ច​នាយកដ្ឋាន​ប្រឆាំង​បទល្មើស​បច្ចេកវិទ្យា​នៃ​ក្រសួង​មហាផ្ទៃ​ កាលពី​វេលា​ថ្ងៃ​ត្រង់​ទី​២៩​ ខែ​តុលា​ បាន​បញ្ជូន​យុវជន​ម្នាក់​មក​អយ្យការ​អម​សាលា​ដំបូង​រាជធានី​ភ្នំពេញ​ ដើម្បី​សាកសួរ​ពី​ដំណើរ​រឿង​បង្ហោះ​វីដេអូ​តាម​ហ្វេសប៊ុក​ដាក់​បណ្តាសា​ប្រមាថ​អាយុ​ជីវិត​សម្តេច​អគ្គ​មហា​សេនាបតី​តេជោ​ហ៊ុន​ សែន​ នាយក​រដ្ឋមន្ត្រី​នៃ​ព្រះរាជាណាចក្រ​។​ បច្ចុប្បន្ន​យុវជន​រូប​នេះ​ កំពុង​ស្ថិត​ក្រោម​ការ​សាកសួរ​របស់​លោក​ សៀង​ សុខ​ ព្រះ​រាជ​អាជ្ញា​រង​អម​សាលា​ដំបូង​រាជធានី​ភ្នំពេញ​។

យុវជន​រូប​នេះ​ ត្រូវ​បាន​នគរបាល​ខេត្ត​ព្រៃវែង​ ឃាត់ខ្លួន​រួច​បញ្ជូន​មក​ក្រសួង​មហាផ្ទៃ​  កាលពី​រសៀល​ថ្ងៃ​ទី​២៧​ ខែ​តុលា​ តាម​ដីកា​បញ្ជា​ឲ្យ​ចូល​ខ្លួន​របស់​​ព្រះ​រាជ​អាជ្ញា​រង​អម​សាលា​​ដំបូង​រាជធានី​ភ្នំពេញ​​។​

យោង​តាម​ដីកា​បញ្ជា​ឲ្យ​ចូល​ខ្លួន​របស់​លោក​ សៀង​ សុខ​ ព្រះ​រាជ​អាជ្ញា​រង​អម​សាលា​​ដំបូង​រាជធានី​ភ្នំពេញ​ បង្គាប់​ឲ្យ​ឈ្មោះ​ សាម​ ភាព​ អាយុ​២៧ឆ្នាំ​ មាន​ទីលំនៅ​ភូមិ​​បឹង​ជ័រ​ ឃុំ​ព្រៃ​ទទឹង​ ស្រុក​ស៊ីធរ​កណ្ដាល​ ខេត្ត​ព្រៃវែង​ ឲ្យ​ចូល​បង្ហាញ​ខ្លួន​នៅ​ នាយកដ្ឋាន​ប្រឆាំង​បទល្មើស​បច្ចេកវិទ្យា​​នៃ​ក្រសួង​មហាផ្ទៃ​ ឲ្យ​បាន​មុន​ថ្ងៃ​ទី​២១​ ខែ​វិច្ឆិកា​ ឆ្នាំ​២០១៦​ ដើម្បី​សាកសួរ​បំភ្លឺ​ ពាក់ព័ន្ធ​នឹង​ករណី​ ប្រើ​ទំព័រ​ហ្វេសប៊ុក​បង្ហោះ​វីដេអូ​ឃ្លីប​ដាក់​បណ្តាសា​ប្រមាថ​អាយុ​ជីវិត​សម្តេច​តេជោ​នាយករដ្ឋមន្ត្រី​ ។

នគរបាល​ខេត្ត​ព្រៃវែង​ បញ្ជាក់​ថា​ សមត្ថកិច្ច​បាន​ឃាត់ខ្លួន​យុវជន​ សាម​ ភាព​ នៅ​ចំណុច​ផ្ទះ​យុវជន​នេះ​តែ​ម្ដង​ ។

នៅ​ដំណាក់កាល​សមត្ថកិច្ច​ យុវជន​រូប​នេះ​ និយាយ​ថា​ «ចាប់ខ្ញុំនេះ ខ្ញុំដឹងតើ ខ្ញុំមិនមែនរកសីុគ្រឿងញៀនទេ គឺចាប់ជេររដ្ឋាភិបាល​»៕