(ភ្នំពេញ)៖​ នៅ​រសៀល​ថ្ងៃ​ទី​២៨​ ខែ​តុលា​នេះ​ សាលា​ដំបូង​រាជធានី​ភ្នំពេញ​ បាន​លើក​យក​សំណុំរឿង​អ្នកស្រី​​ ថាក់​ ឡានី​ សមាជិក​ព្រឹទ្ធសភា​គណបក្ស​​ សម​ រង្ស៊ី​ មក​បើក​សវនាការ​ជំនុំជម្រះ​ តាម​បណ្តឹង​​មេធាវី​តំណាង​ដោយ​អាណត្តិ​របស់​សម្ដេច​តេជោ​នាយករដ្ឋមន្ត្រី​។

សវនាការ​នេះ​ ដឹកនាំ​ដោយ​លោក​ អ៉ី​ ថាវរៈ​ ជា​ចៅក្រម​ជំនុំជម្រះ​ និង​ លោក​ លី​ សុផាណា​ ជា​តំណាង​អយ្យការ​។​ លោក​មេធាវី​ គី​ តិច​ តំណាង​ដើម​បណ្ដឹង​ និង​លោក​មេធាវី​ សំ​ សុគង់​ ការពារ​ក្ដី​អ្នក​ស្រី​ ថាក់​ ឡានី​។

អ្នកស្រី​ ថាក់​ ឡានី​ ជាប់​ចោទ​ពី​បទ បរិហារកេរ្តិ៍​ជា​សាធារណៈ​ និងបទញុះញង់ឲ្យប្រព្រឹត្តអំពើបង្កឲ្យមានភាព​វឹកវរ​ធ្ងន់ធ្ងរដល់សន្តិសុខសង្គម ប្រព្រឹត្តនៅភូមិប៉ាតាង ឃុំប៉ាតាង ស្រុកលំផាត់ ខេត្តរតនគិរី កាលពីថ្ងៃទី២៩ ខែកក្កដា ឆ្នាំ២០១៦ តាមមាត្រា ៣០៥ មាត្រា ៤៩៤ និងមាត្រា ៤៩៥ នៃក្រមព្រហ្មទណ្ឌ។

នៅ​ក្នុង​វេទិកា​សាធារណៈ​នៅ​ខេត្ត​រតនគិរី​ អ្នកស្រី​ ថាក់​ ឡានី​ បាន​ចោទប្រកាន់​សម្តេច​តេជោ​ថា​ ជា​អ្នក​សម្លាប់​លោក​បណ្ឌិត​ កែម​ ឡី​។​

ដើម្បី​ស្វែងរក​ភាព​យុត្តិធម៌​ និង​ភាព​ស្អាតស្អំ​ក្នុង​នាម​ជា​មេ​ដឹកនាំ​កំពូល​ ​នៃ​ប្រទេស​ សម្តេច​តេជោ​នាយករដ្ឋមន្ត្រី​ តាម​រយៈ​លោក​មេធាវី​ គី​ តិច​ បាន​ដាក់​ពាក្យ​បណ្ដឹង​ប្តឹង​អ្នកស្រី​ ថាក់​ ឡានី​ ដោយ​សំណូមពរ​ឲ្យ​តុលាការ​ចាត់​ការ​តាម​ច្បាប់​ និង​ទាមទារ​សំណង​ជំងឺ​ចិត្ត​ត្រឹម​១០០រៀល​ប៉ុណ្ណោះ​៕