(ស្លូវេនី)៖ ក្រុមអ្នកឃ្លាំមើលការនេសាទត្រីបាឡែន​របស់ពិភពលោក នៅថ្ងៃសុក្រនេះ​បានចេញវិធានការក្តៅ ដើម្បីកាត់បន្ថយការប្រមាញ់ត្រី​បាឡែនជារៀងរាល់ឆ្​នាំរបស់ប្រទេសជប៉ុន ដែលបានប្រព្រឹត្តទៅក្រោម អាជ្ញាប័ណ្ណស្រាវជ្រាវផ្នែកវិទ្យាសាស្រ្ត ប៉ុន្តែវាបានទទួលរងការរិះគន់​យ៉ាងចាស់ដៃថាជា​ការសម្លាប់យកសាច់ ធ្វើពាណិជ្ជកម្មដែលប្រជាជន​ជប៉ុនពេញនិយមបរិភោគ។ នេះបើតាមការចេញផ្សាយដោយសារព័ត៌មាន Channel News Asia នៅមុននេះបន្តិច នាព្រឹកថ្ងៃសុក្រ ទី២៨ ខែតុលា ឆ្នាំ២០១៦។

គណកម្មការតាមដានការនេសាទត្រីបាឡែនអន្តរជាតិ ឬហៅកាត់ថា IWC បានសម្រេចចិត្តបង្កើតក្រុមការងារ អចិន្រ្តៃយ៍មួយដើម្បីជួយដល់ IWC និងគណកម្មាធិការឯកទេសវិទ្យាសាស្រ្ត ក្នុងការវាយតម្លៃនិងត្រួតពិនិត្យ តាមដានទៅលើ​កម្មវិធីនេសាទត្រី​បាឡែននានា ដែលត្រូវបានធ្វើឡើង​ក្រោមឈ្មោះស្លាក​ឈ្មោះ​វិទ្យាសាស្រ្ត។

កាលពីឆ្នាំ២០១៤ តុលាការយុត្តិធម៌អន្តរជាតិ (ICJ) បានរកឃើញថា​លិខិតអនុញ្ញាតការនេសាទត្រី​បាឡែន ដែលត្រូវបានចេញ​ដោយរដ្ឋាភិបាល​ជប៉ុនខ្លួនឯងនោះ គឺមិនមែនសម្រាប់បម្រើគោលបំណង​នៃការស្រាវជ្រាវ ផ្នែកវិទ្យាសាស្រ្តនោះឡើយ ហើយ ICJ បានបញ្ជាឲ្យបញ្ឈប់កម្មវិធីនេសាទឈ្មោះ JARPA II ជាបន្ទាន់ ប៉ុន្តែប្រទេសជប៉ុនបានលុបចោល ការប្រមាញ់របស់ខ្លួនតែមួយឆ្នាំ ប៉ុណ្ណោះគឺនៅ២០១៤-២០១៥ ហើយក៏បាន បន្តធ្វើការប្រមាញ់ត្រីឡែន​នៅឆ្នាំបន្ទាប់ក្រោមឈ្មោះ​កម្មវិធីនេសាទថ្មី​មួយទៀត​គឺ NEWREP-A។

គួរបញ្ជាក់ដែរប្រទេសជប៉ុនបានចេញអាជ្ញាប័ណ្ណ ដែលអនុញ្ញាតឲ្យប្រទេសខ្លួនសម្លាប់ត្រីបាឡែនយ៉ាងរង្គាល អស់ជាង១៥,០០០ក្បាល នៅក្រោមស្លាកឈ្មោះវិទ្យាសាស្រ្ត គិតចាប់តាំងពីឆ្នាំ១៩៨៦មក។ ប្រជាជនជប៉ុន រាប់ជំនាន់គឺជាអ្នកបរិភោគសាច់ត្រីសមុទ្រ ជាពិសេសត្រីបាឡែក ដែលជាអាហារប្រពៃណីពិបាកនឹងកាត់ផ្តាច់ បានខ្លាំងណាស់ ហើយវាក៏ជាអាហារដ៏ល្បីល្បាញមួយ​របស់ពិភពលោកផងដែរ៕