(ប៉ៃលិន​)៖ កាលពីយប់​ថ្ងៃទី២៧​ ខែតុលា ឆ្នាំ២០១៦ មានករណីគ្រោះថ្នាក់ចរាចរណ៍​ រវាង​ម៉ូតូ​​​ និង​ត្រាក់ទ័រ​ នៅចំណុចស្ថិតក្នុងភូមិ​អូរប្រើស សង្កាត់​អូរតាវ៉ៅ ក្រុង​ ប៉ៃលិន ខេត្ត​ប៉ៃលិន បណ្តាលឲ្យមនុស្សរងរបួសធ្ងន់ចំនួន៣នាក់ និងស្រាលចំនួន៣នាក់ ។

កម្លាំងនគរបាល​ចរាចរណ៍បានឲ្យដឹងថា អ្នកបើកបរ​ត្រាក់ទ័រមានឈ្មោះ​ ធី រ៉ា​ ភេទប្រុស​ អាយុ ៤៨ឆ្នាំ​ (គ្មានរបួស)​ មានទីលំនៅ​ ភូមិ​អូរពឺត​ សង្កាត់ទួលល្វា ក្រុង​ ប៉ៃលិន ខេត្តប៉ៃលិន។ ចំណែកម៉ូតូមានគ្នាចំនួន ៦នាក់ ដែលមានឈ្មោះទី១ ប៉ែន​ សារុំ​ ភេទប្រុស​ មុខរបរអាជីវករ ជាអ្នកបើកបរម៉ូតូ​ (រងរបួស​ធ្ងន់ បែកចង្ការ​ និងបាក់ម្រាមដៃ)  ទី២ ស្រី មុំ​ អាយុ ៣០ឆ្នាំ​ (រងរបួស​ បាក់ខ្ទង់ច្រមុះ​) ទី៣ លក្ខិណា​ អាយុ ២៨ឆ្នាំ​ (រងរបួស​ បែកថ្ងាសខាងមុខ​ និង​ប៉ោងក្បាលពីក្រោយ) រួមនឹងកូន​ក្មេង ចំនួន ​៣នាក់​ រងរបួស​ស្រាល រស់នៅភូមិ​ប៉ាងរលឹម​ សង្កាត់អូរតាវ៉ៅ ក្រុង​- ខេត្ត​ប៉ៃលិន។

កម្លាំងនគរបាល​បន្តថា​ មូលហេតុបណ្តាលមកពីភាគី ខាងម៉ូតូដឹកមនុស្សលើសចំណុះ និងខ្វះការប្រុងប្រយ័ត្ន​ទើបបណ្តាលអោយគ្រោះថ្នាក់​បែបនេះ។
បច្ចុប្បន្ន វត្ថុតាងរក្សាទុកនៅការិយាល័យចរាចរណ៍ផ្លូវគោក ដើម្បីរងចាំការដោះស្រាយ៕