(ភ្នំពេញ)៖ ដោយឃើញទុក្ខលំបាករបស់ប្រជាពលរដ្ឋក្នុងធ្វើដំណើរតាមផ្លូវលេខ៦១៨ ស្ថិតក្នុងភូមិលេខ១៨ សង្កាត់បឹងកក់២ ខណ្ឌទួលគោក រាជធានីភ្នំពេញ ក្រុមហ៊ុន យូខេ បានធ្វើការជួសជូល ដោយចំណាយថវិកាផ្ទាល់ខ្លួនប្រមាណជិត១ម៉ឺនដុល្លារ ដើម្បីសម្រួលផ្លូវដល់ប្រជាពលរដ្ឋ ឆ្លងកាត់ឲ្យមានភាពងាយស្រួលឡើងវិញ។
នាយកក្រុមហ៊ុន យូខេខុនដូរ លោក ឌី រ៉ាដា បានឲ្យដឹងនៅថ្ងៃទី២៧ ខែតុលានេះថា ផ្លូវដែលក្រុមហ៊ុនលោក ជួសជុលនោះ ស្ថិតក្នុងគម្រោងអភិវឌ្ឍន៍របស់រាជធានីភ្នំពេញ ប៉ុន្តែដោយឃើញកាលំបាកធ្វើដំណើរនោះ ក្រុមហ៊ុនបានធ្វើកាជួសជុលផ្លូវនេះឡើង ។
លោកនាយក្រុមហ៊ុនឲ្យដឹងថា «ផ្លូវដែលជួសជុលមានប្រហែលជាង២០០ម៉ែត្រ និងទទឹង៨ម៉ែត្រ ហើយសម្រាប់ការជួសជុល ក្រុមហ៊ុនចំណាយថវិកាផ្ទាល់ខ្លួន ហើយយើងជួសជុលផ្លូវដោយ កាយយកដីចាស់ចេញ ហើយដាក់ថ្មបង្ហាប់គ្រោះល្អិតៗ រួចកិនបង្ហាប់ដើម្បីងាយស្រួលធ្វើដំណើរ របស់បងប្អូនតាមផ្លូវនេះ »។
ជាមួយគ្នានោះដែរនាយកក្រុមហ៊ុនបានឲ្យដឹងថាក្រុមហ៊ុន នឹងបន្តចូលរួមសកម្មភាពសង្គមបន្ថែមទៀត ពិសេសនោះការជួសជុលផ្លូវតាមលទ្ធភាពដែលក្រុមហ៊ុនធ្វើបាន។
លោកប៉ែន ស្រឿង មេភូមិ១៨ សង្កាត់បឹងកក់២ ខណ្ឌទួលគោក រាជធានីភ្នំពេញបានឲ្យដឹងថា «ផ្លូវដែលក្រុមហ៊ុនកំពុងជួសជុលមានខូចអស់រយៈពេលមួយឆ្នាំមកហើយ និងពិបាកធ្វើដំណើរណាស់ ព្រោះផ្លូវ៦១៨ មានទឹកដក់ ភក់ ខ្លាំងណាស់បងប្អូន ប្រជាជនយើងរអ៊ូមិនឈប់ទេ។ ប៉ុន្តែឥលូវនេះបងប្អូនយើងអរណាស់នៅពេលក្រុមហ៊ុនធ្វើនេះ »។
គួរបញ្ជាក់ថាក្រុមហ៊ុនUK condo បានចូលរួមសកម្មភាពសង្គមជាច្រើនាពេលកន្លងមក ដូចជា ការចែកអង្កដល់ប្រជាពលរដ្ឋក្រក្រី ការលក់អង្កតម្លៃថោក ចែកបាយដល់អ្នកជំងឺ នៅបន្ទីរពេទ្យគន្ធបុប្ផា ទាំងផ្តល់សម្ភារៈ និងថវិកាផងដែរ៕
