(ភ្នំពេញ)៖ ក្នុងរយៈពេលជាង ១ឆ្នាំ ៦ខែ អាណត្ដិទី៧ នៃរដ្ឋសភា ក្នុងនាមក្រសួងសុខាភិបាល ជាសេនាធិការឱ្យរាជរដ្ឋាភិបាល បានផ្ដោតសំខាន់ទៅលើ ៦ចំណុចសំខាន់ៗ គឺ៖ ១) គឺការពង្រឹង និងពង្រីកវិស័យសុខាភិបាល ២) ការលើកកម្ពស់គុណភាពវិស័យសុខាភិបាល ៣) ការពង្រីក និងការគ្រប់ដណ្ដប់នៃគាំពាសុខភាពសង្គម ៤) ការពង្រឹងភាពធន់នូវប្រព័ន្ធសុខាភិបាល ទី៥) ការពង្រឹង និងការធ្វើទំនើបកម្មនូវប្រព័ន្ធសុខាភិបាលទំនើប និង៦) ការសរុបរួមនូវអន្ដរកម្មរវាងវិស័យទាំងឡាយ ធ្វើឱ្យសម្រេចបាននៅក្នុងសុខុមាលភាព និងសុខភាពរបស់ប្រជាពលរដ្ឋ។
នេះតាមការបញ្ជាក់របស់លោកសាស្ដ្រាចារ្យ ឈាង រ៉ា រដ្ឋមន្ដ្រីក្រសួងសុខាភិបាល ក្នុងសន្និសីទសារព័ត៌មាន នៃសន្និបាតសុខាភិបាលលើកទី៤៤ កាលពីដើមសប្ដាហ៍នេះ។
លោកសាស្ដ្រាចារ្យបានថ្លែងបន្ដថា វឌ្ឍនភាពរបស់ក្រសួងសុខាភិបាល ដែលសម្រេចបាននៅឆ្នាំ២០២៤ ក្នុងការបំពេញបេសកកម្មសំខាន់ បង្កើនគុណភាព ប្រសិទ្ធភាពផ្តល់សេវាសុខាភិបាលរួមមាន៖ ករណីសរុបពិនិត្យជំងឺក្រៅ មានចំនួន ១៨,៦៩៤ ៣៩៧ករណី កើនឡើង ២៣%, អ្នកជំងឺសម្រាកពេទ្យ មានចំនួន ១,២៧៦ ៣១៩នាក់ កើនឡើង ១៦% ធៀបនឹងឆ្នាំ២០២៣, អត្រាប្រើប្រាស់គ្រែ កើនឡើង ៧% ស្មើនឹង ១៦, ៦៤៥គ្រែ, ការកាត់បន្ថយអត្រាមរណភាពមាតា និងទារក ២១៨,៤០៩ នាក់, ការចាក់ថ្នាំបង្ការជូនដល់កុមារចំណុច ៣៤១, ៥២៥នាក់, ក្នុងឆ្នាំ២០២៤នេះ ទូទាំងប្រទេសទទួលបានឈាមសរុប ១៧៩,២៥៤ប្លោក ដើម្បីឆ្លើយតបទៅនឹងតម្រូវការចាំបាច់ ក្នុងការសង្គ្រោះបន្ទាន់ ចំពោះអ្នកជំងឺដែលសម្រាកព្យាបាលនៅតាមមន្ទីរពេទ្យនានា។
លោកសាស្ដ្រាចារ្យរដ្ឋមន្ដ្រីបន្ថែមថា ក្នុងនៅឆ្នាំ២០២៤ ករណីជំងឺគ្រុនឈាម មានចំនួនសរុបត្រឹម ១៨,៩៨៧នាក់ គឺមានការថយចុះជាងឆ្នាំមុនចំនួន ១៦,៤០៣នាក់ ឬ ថយ ៤៦% និងករណីស្លាប់ចំនួន៤៦នាក់ គឺមានការថយចុះជាងឆ្នាំមុនចំនួន ៥៣ នាក់ ឬ ថយ ៥៤%។ បើប្រៀបធៀបនឹងចំនួនករណីជំងឺគ្រុនឈាមដែលបានព្យាករណ៍ដោយកម្មវិធីជាតិថាឆ្នាំ ២០២៤ នេះជាឆ្នាំដែលអាចមានការរាតត្បាតជំងឺគ្រុនឈាមចំនួនប្រមាណ ៧៥,០០០ ករណីឈឺ មានន័យថា ឆ្នាំនេះយើងបានកាត់បន្ថយ ករណីឈឺរហូតដល់ប្រមាណ ៥៦,០០០ នាក់ ស្មើនឹងថយចុះប្រមាណជិត ៤ដងធៀបនឹងចំនួនព្យាករណ៍រាតត្បាត។
សម្រាប់ការប្រយុទ្ធនឹងជំងឺរបេងនៅកម្ពុជា ទទួលបានជោគជ័យគួរឱ្យកត់សំគាល់។ អត្រាស្លាប់ដោយសារ ជំងឺរបេងនៅកម្ពុជាបានធ្លាក់ចុះពីកំរិត ៤២ ករណីក្នុងចំណោមប្រជាជន ១០០ ០០០នាក់ ក្នុងឆ្នាំ២០០០ មកនៅត្រឹម ២១ករណី ក្នុងចំណោម១០០ ០០០នាក់ នៅឆ្នាំ២០២៣ (ស្មើនឹងការធ្លាក់ចុះ ៥០%)។ គោលដៅរហូតដល់ឆ្នាំ២០៣០ គឺកាត់បន្ថយអត្រាស្លាប់ និងអត្រាអាំងស៊ីដង់ នៃជំងឺរបេង ស្របតាមផែនការយុទ្ធសាស្ត្រជាតិ និងទិសដៅអន្តរជាតិ ពោលគឺ នៅតែថែរក្សាអត្រាព្យាបាលជោគជ័យយ៉ាងតិច៩០% និងខិតខំស្រាវជា្រវរកករណីរបេងអោយបានច្រើនថែមទៀត នៅឆ្នាំបន្តៗខាងមុខ។
លើសពីនោះកម្ពុជាកំពុងស្ថិតការឈានឆ្ពោះទៅសម្រេចបានគោលដៅសកល ៩៥%-៩៥%-៩៥% ដែលជាមូលដ្ឋានឆ្ពោះទៅបញ្ចប់មេរោគអេដស៍ នៅឆ្នាំ ២០៣០។ នៅឆ្នាំ២០២៣ កម្ពុជាសម្រេចបាន៩៥%ទី១ ស្មើ ៨៩% ៩៥%ទី២ បាន ៩៨% និង ៩៥%ទី៣ បាន ៩៨%។ ជំងឺគ្រុនចាញ់ នៅឆ្នាំ២០២៤ មានចំនួនសរុប ៣១២ករណី និងគ្មានស្លាប់ បើធៀបនឹងឆ្នាំ២០២៣ គឺគ្រុនចាញ់ សរុបបានថយចុះ ៧៤% (៣៥៥/១៣៨៤ករណី)។ ប្រទេសកម្ពុជា បានបញ្ចប់លែងមានករណីស្លាប់ដោយ សារជំងឺគ្រុនចាញ់តាំងពីឆ្នាំ២០១៨។ ស្ថានភាពស្លាប់ដោយសារជំងឺគ្រុនចាញ់ប្រចាំឆ្នាំ បានថយចុះពី៩៣នាក់ក្នុងឆ្នាំ២០១១ មកនៅ ០នាក់ ចាប់តាំងពីឆ្នាំ២០១៨ រហូតដល់បច្ចុប្បន្ន នឹងឈានឆ្ពោះទៅលុបបាត់ជំងឺគ្រុនចាញ់ ឆ្នាំ២០២៥។
ក្នុងនោះលោកសាស្ដ្រាចារ្យរដ្ឋមន្ដ្រីរដ្ឋ ក៏បានបង្ហាញពីការផ្ដល់សេវាសុខភាពផ្លូវចិត្ដផងដែរ។ ដើម្បីជ្រាបច្បាស់ពីសមិទ្ធផលការងាររបស់ក្រសួងសុខាភិបាល ក្នុងរយៈពេល ជាង១ឆ្នាំកន្លះនៅក្នុងអណត្ដិទី៧ សូមអញ្ជើញទស្សនាវីដេអូទាំងស្រុង៖
