(សៀមរាប)៖ ប្រជាពលរដ្ឋចំនួន១០០គ្រួសារ នៅក្នុងក្រុងសៀមរាប ខេត្តសៀមរាប ទទួលបានកញ្ចប់អាហារស្រាយបួស ពីសមាគមកូប្រាស៊ីមុស្លីមកម្ពុជា ពីធីនេះ ធ្វើឡើងនៅវិហារឥស្លាមដើមៀកនូរោះស៊ូរ៉ែម ស្ថិតនៅក្នុងភូមិតាគង់ សង្កាត់សំបួរ ក្រុងសៀមរាប ខេត្តសៀមរាប នារសៀលថ្ងៃទី០៧ ខែមីនា ឆ្នាំ២០២៥។
ពីធីនេះ មានការចូលរួមពីលោក ស្រេន សុព្រី សមាជិកក្រុមប្រឹក្សាក្រុងសៀមរាប និងអនុប្រធានគណៈចលនាសាសនិកឥស្លាម ខេត្តសៀមរាប, លោក ឆាន ឆាំ ចៅសង្កាត់រងទី១, លោក ស្មាន ហ្សាការីយ៉ា តំណាងសមាគមកូប្រាស៊ីកម្ពុជា ព្រមទាំងគណៈកម្មការវិហារដើមៀកនូរោះស៊ូរ៉ែម, សិស្សានុសិស្ស និងអាណាព្យាបាលសិស្សជាច្រើនចូលរួមផងដែរ។
ក្នុងឱកាសនោះ លោក ស្រេន សុព្រី បានលើកឡើងថា កម្មវិធីចែកកញ្ចប់អាហារស្រាយបួសនេះ គឺពិតជាមានសារៈសំខាន់ណាស់ចំពោះដែលអ្នកកាន់សាសនាឥស្លាមទាំងអស់ ចំពោះដែលមានធនធានគប្បី ត្រូវចែកកញ្ចប់អាហារដល់បងប្អូនឥស្លាមរបស់យើង ដើម្បីឲ្យគាត់យកកញ្ចប់អាហារទាំងនោះ ទៅប្រតិបត្តការបួសរបស់ពួកគាត់នៅក្នុងខែ «រ៉ាម៉ាឌន» ដែលជាខែដែលសាសនិកឥស្លាមទាំងអស់ នៅទូទាំងពិភពលោក ប្រតិបត្តនូវកាតព្វកិច្ចរបស់ខ្លួន ដោយតបអាហារ និងផឹកអ្វីៗទាំងអស់ តាំងពីថ្ងៃរះរហូតដល់ថ្ងៃលិច។
លោកបញ្ជាក់ថា ក្រោមការដឹកនាំប្រកបដោយគតិបណ្ឌិតដ៏ខ្ពស់ខ្ពស់របស់សម្តេចធិបតី ហ៊ុន ម៉ាណែត នាយករដ្ឋមន្រ្តី បានបន្តពង្រឹងសន្តិភាព ស្ថិរភាពនយោបាយ សន្តិសុខ សណ្តាប់ធ្នាប់សាធារណៈ និងសុវត្ថិភាពសង្គម ទើបយើងមានការអភិវឌ្ឍលើគ្រប់វិស័យ។ លោកបន្តថា ការខិតខំរបស់ថ្នាក់ដឹកនាំគ្រប់លំដាប់ថ្នាក់ ក៏បាននាំមកនូវសមិទ្ធផលជាច្រើន នៅក្នុងខេត្តសៀមរាប តួយ៉ាងនៅក្នុងភូមិតាគង់នេះ ក៏មានការអភិវឌ្ឍន៍ច្រើនផងដែរ មានដូចជា៖ វិហារដ៏ស្រស់ស្អាត, សាលារៀន និងសមិទ្ធផលផ្សេងៗជាច្រើនទៀត ដែលកំពុងសាសង់ផងដែរ។
លោក ឆាន ឆាំ បានលើកដែរថា ថ្ងៃនេះលោកពិតជាមានសេចក្តីសប្បាយរីករាយជាខ្លាំង ដែលបានចូលរួមក្នុងកម្មវិធីចែកកញ្ចប់អាហារស្រាយបួសពីសមាគមកូប្រាស៊ីមុស្លីមកម្ពុជា ដល់សាសនិកឥស្លាមក្នុងក្រុងសៀមរាប ចំនួន១០០គ្រួសារ នាពេលនេះ។ លោកបន្តថា យើងទាំងអស់គ្នាត្រូវអរគុណសន្តិភាព ពាក្យថា « សន្តិភាព » មួយម៉ាត់នេះ គឺមានតម្លៃមិនអាចកាត់ថ្លៃបានឡើយ ដោយសារកត្តាសន្តិភាពនេះហើយ ទើបប្រជាពលរដ្ឋយើងរស់នៅបានសុខសាន្ត និងអាចគោរពទៅលើសាសនាផ្សេងៗ ដែលខ្លួនជឿបានផងដែរ។
លោក ស្មាន ហ្សាការីយ៉ា បានលើកឡើងថា អំណោយជាកញ្ចប់អាហារស្រាយបួសនេះវាមិនច្រើនទេ ប៉ុន្តែក៏អាចជួយដោះស្រាយដល់បងប្អូនយើងបានមួយគ្រាផងដែរ។ លោបន្តថា អំណោយទាំងនេះ គឺជាជំនួយរបស់សប្បុរសជននៅប្រទេសអារ៉ាប់ ដែលផ្តល់តាមរយៈ សមាគមកូប្រាស៊ីមុស្លីមកម្ពុជា ដើម្បីចែកជូនដល់សាសនិកឥស្លាមនៅកម្ពុជា ក្នុងខែរ៉ាម៉ាឌននេះ។
លោកសង្ឃឹមថា សាសនិកឥស្លាមទាំងអស់ នឹងប្រតិបត្តិនូវការបួសឲ្យបានត្រឹមត្រូវ តាមក្បួនច្បាប់របស់សាសនាឥស្លាម ដើម្បីទទួលបាននូវផលបុណ្យពី (អល់ឡោះ) ឲ្យបានច្រើននៅក្នុងខែរ៉ាម៉ាឌននេះផងដែរ៕
