(សៀមរាប)៖ លោក សាយ សំអាល់ រដ្ឋមន្ត្រីក្រសួងបរិស្ថាន បានណែនាំឲ្យក្រុមការងារ ខិតខំបំពេញភារកិច្ច និងចូលរួមសហការឲ្យបានជិតស្និទ្ធ ជាមួយគ្រប់ភាគីពាក់ព័ន្ធ ជាពិសេស អាជ្ញាធរមូលដ្ឋាន ដើម្បីរួមគ្នាដោះស្រាយបញ្ហាប្រឈមនានា នៅក្នុងតំបន់ភ្នំគូលែន សំដៅធានារក្សាឲ្យបាននូវតុល្យភាពនៃប្រព័ន្ធអេកូឡូស៊ី និងមុខងាររួមទាំងសេវាកម្មសំខាន់ៗនៃតំបន់ភ្នំគូលែន ក្នុងលក្ខណៈជារបៀងជីវៈចម្រុះផ្នែកខាងជើងបឹងទន្លេសាប។
ការលើកឡើងរបស់ លោក សាយ សំអាល់ រដ្ឋមន្ត្រីក្រសួងបរិស្ថាន បានធ្វើឡើងខណៈលោក បានដឹកនាំកិច្ចប្រជុំក្រុមការងារ រៀបចំកម្មវិធីគ្រប់គ្រងឧទ្យានជាតិ ព្រះជ័យវរ្ម័ន- នរោត្តម «ភ្នំគូលែន» នៅព្រឹកថ្ងៃទី២៧ ខែតុលា ឆ្នាំ២០១៦។
រដ្ឋមន្ត្រីក្រសួងបរិស្ថាន បានបញ្ជាក់ឲ្យដឹងថា កិច្ចប្រជុំនេះ ធ្វើឡើងដើម្បីផ្តល់នូវទស្សនវិស័យ និងគោលការណ៍ណែនាំ សម្រាប់ការរៀបចំផែនការគ្រប់គ្រងលំអិត ឆ្លើយតបទៅនឹងតម្រូវការចំពោះមុខក្នុងការរក្សាការពារធនធានធម្មជាតិ អភិរក្សបេតិកភណ្ឌវប្បធម៌ និងជំរុញការអភិវឌ្ឍសហគមន៍មូលដ្ឋាន ស្របតាមគោលដៅអភិវឌ្ឍន៍ទេសចរណ៍ប្រវត្តិសាស្រ្ដ វប្បធម៌ និងធម្មជាតិ៕
