(កណ្ដាល)៖ លោក គួច ចំរើន អភិបាលខេត្តកណ្ដាល បានលើកទឹកចិត្តប្រជាកសិករស្រុកស្អាងទាំងអស់ ត្រូវនាំគ្នាបង្កើនការផលិតបន្លែសុវត្ថិភាព (គ្មានគីមី) ឲ្យបានច្រើនៗស្របទៅតាមទីផ្សារ និងស្នើពលរដ្ឋយើង ពិសេសអ្នកជំនួញ ខាងបន្លែសុវត្ថិភាពដូចជាផ្សារទំនើប សណ្ឋាគារជាដើម ជួយគ្នាទិញបន្លែសរីរាង្គខ្មែរយើងពិសារ និងបម្រើដល់អតិថិជនវិញ ទើបមានសុវត្ថិភាពល្អ មិនប៉ះពាល់ដល់សុខភាពឡើយ។

នៅគ្រាដែលលោកអភិបាលដឹកនាំមន្ត្រីជំនាញ និងអាជ្ញាធរស្រុកស្អាង ចុះពិនិត្យការដំណាំបន្លែសុវត្ថិភាពរបស់ប្រជាកសិករ នៅឃុំស្វាយប្រទាល ស្រុកស្អាង ខេត្តកណ្តាល រសៀលថ្ងៃទី៤ ខែមីនា ឆ្នាំ២០២៥,លោកបានកោតសរសើរ ការដាំបន្លែសុវត្ថិភាព ប្រកបដោយគុណភាព ដោយប្រើប្រាស់នូវជីកំប៉ុស្ត ជីទឹក ដែលផ្សំពីបន្លែផ្លែឈើ ប្រើប្រាស់ថ្នាំកម្ចាត់សត្វល្អិតផ្សំពីរុក្ខជាតិ ដែលប្រជាពលរដ្ឋអាចផលិតបានដោយខ្លួនឯង ធ្វើឱ្យបន្លែរបស់យើងជាបន្លែ ដែលសុវត្ថិភាព ប្រកបដោយគុណភាព ហើយអ្នកដែលបរិភោគបន្លែសុវត្ថិភាព មិនប៉ះពាល់ដល់សុខភាព ដោយពោថា «ប្រសិនបើយើងប្រើប្រាស់ជីគីមី ថ្នាំគីមីសម្លាប់សត្វល្អិត មិនត្រឹមតែធ្វើឱ្យប៉ះពាល់ដល់អ្នកបរិភោគបន្លែនោះទេ ពិសេសអ្នកដាំផ្ទាល់ដែលជាអ្នកនៅផ្ទាល់ជាមួយថ្នាំរាល់ថ្ងៃ ប្រឈមនឹងបញ្ហាសុខភាពខ្លាំងផងដែរ»។

ជាមួយគ្នានេះ លោកអភិបាលខេត្ត បានស្នើប្រជាកសិករទាំងអស់ រៀបចំចងក្រងបង្កើតជាបណ្ដុំអាជីវកម្ម ឬចូលរួមជាមួយសហគមន៍កសិកម្ម ដើម្បីចុះកុងត្រាជាមួយក្រុមហ៊ុន មានន័យថា បន្លែរបស់យើងដែលដាំបាន មានតម្លៃមួយតាមកិច្ចសន្យា មិនមានការធ្លាក់ថ្លៃ ឬគ្មានទីផ្សារឡើយ។

លោកបានបញ្ជាក់បន្ថែមថា ខេត្តកណ្តាល គឺជាខេត្តដែលមានសក្តានុពលលើវិស័យកសិកម្ម ជាច្រើនរួមមាន៖ ដំណាំ ការចិញ្ចឹមសត្វ និងវារីវប្បកម្ម ដោយឡែក ដំណាំបន្លែ ផ្លែឈើ ជាដំណាំផ្តល់នូវប្រាក់ចំណូលខ្ពស់ និងមានសក្តា នុពលក្នុងការលើកកម្ពស់ ជីវភាពរស់នៅរបស់ប្រជាពលរដ្ឋ ដែលត្រូវបានធ្វើការដាំដុះនៅគ្រប់រដូវកាលទាំងប្រាំង និងវស្សា ផងដែរ ដោយសារដីមានជីជាតិល្អ និងមានប្រភពទឹកគ្រប់គ្រាន់ពីទន្លេ បឹង និងព្រែក។

ទន្ទឹមនឹងនេះលោក ប៊ុនទួន ស៊ីម៉ូណា ប្រធានមន្ទីរកសិកម្ម រុក្ខាប្រមាញ់ និងនេសាទខេត្តកណ្ដាល បានឲ្យដឹងថា ដើម្បីរួមចំណែកក្នុងការជំរុញកំណើនវិស័យកសិកម្ម ស្របតាមទស្សនវិស័យ និងផែនការយុទ្ធសាស្ត្រ មន្ទីរបានរៀបចំ កសាង «ផែនទីបង្ហាញផ្លូវស្តីពីការអភិវឌ្ឍមាសបៃតងខេត្តកណ្តាល ២០២៣-២០៣០» ក្រោមយុទ្ធសាស្ត្រសំខាន់ៗ៣ រួមមាន៖

*ជំរុញផលិតកម្មប្រកបដោយសុវត្ថិភាព និងគុណភាព
*ការសម្របសម្រួល និងសហប្រតិបត្តិការ
*ទីផ្សារ ដោយបានរៀបចំចងក្រងបង្កើតបណ្ដុំអាជីវកម្មបន្លែសុវត្ថិភាពចំនួន ៦បណ្ដុំ ស្រុកស្អាង៥បណ្ដុំ និងក្រុងសំពៅពូន១បណ្ដុំ សរុបកសិករ១៨០គ្រួសារ
*បើកវគ្គបណ្តុះបណ្តាល និងពង្រឹងសមត្ថភាពបច្ចេកទេសផលិតកម្មដែលធន់ នឹងការប្រែប្រួលអាកាសធាតុ ដែលអាចជួយដល់កសិករអាចផលិត ធាតុចូលកសិកម្ម បានដោយខ្លួនឯង និងអាចកាត់បន្ថយ បាននូវថ្លៃដើមផលិត និងពង្រឹងសហគមន៍កសិកម្មដែលមានស្រាប់ និងឧបត្ថម្ភជីធម្មជាតិដល់សហគមន៍កសិកម្ម៕