(ភ្នំពេញ)៖ រងើកភ្លើងដែលឆេះងំជាយូរមកហើយ នៅក្នុងគណបក្សសង្គ្រោះជាតិ រវាងម្ខាងក្រុមលោកសម រង្ស៊ី និងម្ខាងទៀត ក្រុមលោកកឹម សុខា ដែលពួកគេទាំងពីរ ក្រុមនេះបានផ្គុំគ្នាចេញជាគណបក្សសង្គ្រោះជាតិ នៅមុនការបោះឆ្នោតឆ្នាំ២០១៣នោះ ឥឡូវរងើកភ្លើងនេះបានបង្កាត់ចេញ ជាអណ្ដាតភ្លើងបណ្ដើរៗ ហើយនៅប៉ុន្មានថ្ងៃនេះ ខណៈភាគីទាំងពីរក្រុមចាប់ផ្ដើមបញ្ចេញ សកម្មភាពរិះគន់វាយប្រហារគ្នា ជាសាធារណៈទៅវិញទៅមករួចមក។

អ្នកយកផ្លិតទៅបក់លើរងើកឲ្យកាត់ចេញជាអណ្ដាតភ្លើង ដែលកំពុងតែឆេះងំក្នុងទីស្នាក់ការគណបក្សសង្គ្រោះជាតិនៅចាក់អង្រែ ត្រូវបានគេទំលាក់ទៅលើកញ្ញា កឹម មនោវិទ្យា អនុប្រធានផ្នែកកិច្ចការសាធារណៈ របស់គណបក្សសង្គ្រោះជាតិ និងត្រូវជាកូនស្រីលោក កឹម សុខា ប្រធានស្ដីទីគណបក្ស ខណៈដែលកញ្ញាប្រើប្រាស់សំដី សរសេរវាយប្រហារទៅលើមេដឹកនាំកំពូលគឺលោក សម រង្ស៊ី ជាប្រធានគណបក្សដែលកំពុង និរទេសខ្លួនឯង នៅក្រៅប្រទេសមិនហ៊ានចូលមកប្រឈមមុខ ចំពោះមុខច្បាប់តាមរយៈសរសេរបង្ហោះតាម Twitter របស់នាងថា «វាមានរយៈពេល១ឆ្នាំហើយ ហើយពេលនេះគាត់អាចអះអាងនិរទេសខ្លួនជាផ្លូវការ បានហើយ និងមានហេតុផលស្របច្បាប់ដើម្បីនៅបរទេសបន្តទៀត។ រដ្ឋាភិបាលនឹងហៅស្ថានភាពបែបនេះថាឈ្នះឈ្នះ គឺគណបក្សប្រជាជនក៏ឈ្នះ លោក សម រង្ស៊ី ក៏ឈ្នះ។ រដ្ឋាភិបាលឃាត់លោក សម រង្ស៊ី ឲ្យនៅបរទេសបានដោយជោគជ័យតាមរយៈការផ្ដល់លេសមួយ។ លោក សម រង្ស៊ី មានពេល១ឆ្នាំមុននឹងមានបម្រាមនេះ»។

កាលពីសប្តាហ៍មុនកញ្ញា កឹម មនោវិទ្យា ក៏បានរិះគន់លោក សម រង្ស៊ី ផងដែរ ចំពោះបំណងចង់ជាប់ពន្ធនាគារជំនួសសកម្មជន និងមន្រ្តី។ កញ្ញាបានសរសេរនៅលើ Twitter អមដោយអត្ថបទរបស់កាសែតខេមបូឌា ដេលី ស្តីអំពីសំណើសុំដោះដូរអ្នកទោសថា «មានមនុស្សមើលទូរទស្សន៍ ច្រើនណាស់នៅពេលទំនេរ ប្រសិនបើលោកគោរពទស្សនិកជន យ៉ាងហោចណាស់លោក គួរតែធ្វើឲ្យការភូតកុហករបស់លោកមើលទៅគួរទុកចិត្តបានផង»។

ក្រោយមានការរិះគន់ជាបន្តបន្ទាប់របស់កញ្ញា កឹម មនោវិទ្យា ទៅលើលោកសម រង្ស៊ី រួចមក មួយថ្ងៃពីរនេះគេសង្កេតឃើញនៅតាមបណ្ដាញទំនាក់ទំនង សង្គមហ្វេសប៊ុក និងតាមប្រព័ន្ធផ្សព្វផ្សាយអនឡាញផ្សេងៗទៀត គេបានចាប់ផ្ដើមឃើញមានម្ចាស់អាខោនមួយចំនួនចាប់ផ្ដើមធ្វើការវាយប្រហារទៅលើកញ្ញា កឹម មនោវិទ្យា វិញជាបន្តបន្ទាប់ទាំងសរសេររិះគន់ និងការរិះគន់តាមរយៈថតជាវីដេអូបង្ហោះជាដើម។

នៅយប់ថ្ងៃទី២៦ ខែតុលា ឆ្នាំ២០១៦នេះ ក្រុមយុវជនគណបក្សសង្រ្គោះជាតិ បានចេញសេចក្តីថ្លែងការណ៍មួយប្រឆាំងនឹង កញ្ញា កឹម មនោវិទ្យា ដែលហ៊ានរិះគន់ដល់ លោក សម រង្ស៉ី ដែលជាប្រធានគណបក្សសង្រ្គោះជាតិ។ ក្រុមយុវជនគណបក្សសង្រ្គោះជាតិ បានទាមទារឱ្យ គណៈកម្មាធិការអចិន្រ្តៃយ៍របស់គណបក្សសង្រ្គោះជាតិ ដាក់ពិន័យចំពោះ កូនស្រីរបស់ លោក កឹម សុខា ម្នាក់នេះ។

សេចក្តីថ្លែងការណ៍របស់ ក្រុមយុវជនគណបក្សសង្រ្គោះជាតិ ដែលបង្ហាញនៅយប់ថ្ងៃទី២៦ ខែតុលានេះ បានធ្វើឡើងបន្ទាប់ពី កញ្ញា កឹម មនោវិទ្យា អនុប្រធា​នផ្នែកកិច្ចការសាធារណៈរបស់គណបក្សសង្រ្គោះជាតិ បានរិះគន់ លោក សម រង្ស៉ី ជាបន្តបន្ទាប់ នៅរយៈពេល២សប្តាហ៍ក្រោយនេះ។ កញ្ញា កឹម មនោវិទ្យា បានរិះគន់លោក សម រង្ស៉ី ចំពោះការលើកឡើងដែលចង់ជាប់ពន្ធនាគារជំនួសសកម្មជន និងមន្រ្តីគណបក្សនៅកម្ពុជា។

ស្របពេលកូនស្រីសំណព្វចិត្តរបស់លោក កឹម សុខា បាននឹងកំពុងទទួលរងនូវការវាយប្រហារតបត ពីក្រុមសកម្មជនគណបក្សសង្គ្រោះជាតិ ទាំងនៅក្នុង និងក្រៅប្រទេស កញ្ញាបានរិះគន់ធ្ងន់ៗចំពោះលោក​ សម រង្ស៊ី នោះ, នៅរសៀលថ្ងៃទី២៦ ខែតុលា ឆ្នាំ២០១៦នេះ លោក កឹម សុខា បានបង្ហាញសារ ហាក់មានកំហឹងនៅក្នុងចិត្ត ដោយលើកឡើងថា យើងត្រូវតែធ្វើ! យើង​ត្រូវតែហ៊ានប្រឈម! យើងមិនត្រូវគេចវេះ ឬខ្លាចរអាឡើយ ទីបំផុតគេនឹងទទួលស្គាល់ និងឲ្យតម្លៃយើង ថាយើងបានធ្វើនោះត្រឹមត្រូវ។

ក្រុមអ្នកវិភាគបានមើលឃើញថា ការផ្ទុះជំលោះឆ្លើយឆ្លងគ្នាជាសាធារណៈរវាងម្ខាងនៅខាងលោក កឹម សុខា និងម្ខាងទៀតនៅខាងលោក សម រង្ស៊ី នេះ វាជាសញ្ញាមួយឈានទៅរកការចែកចានចែកឆ្នាំងគ្នាហើយ។ ក្នុងនោះជំលោះអាចនឹងផ្ទុះឡើងថែមទៀតនៅពេលដែល សកម្មជនរបស់គណបក្សសង្គ្រោះជាតិ គាំទ្រខាងលោក សម រង្ស៊ី នាំគ្នាធ្វើញត្តិសូមអោយប្រធានគណៈកម្មាធិការវិន័យ ដាក់វិន័យទៅលើកញ្ញា កឹម មនោវិទ្យា ខណៈប្រធានគណៈកម្មាធិការនេះគឺលោកញ៉ែម បុញ្ញឬទ្ធិជាមនុស្សរបស់លោក កឹម សុខា តាំងពីនៅគណបក្សសិទ្ធិមនុស្សជាមួយគ្នានោះ តើលោកហ៊ានដាក់វិន័យដែលឬអត់?។

ក្រុមអ្នកវិភាគ និងតាមដាននយោបាយនៅកម្ពុជា បានលើកឡើងថា ទង្វើបែបនេះរបស់ ឪកូន កឹម សុខា គឺបង្ហាញថា បាននឹងកំពុងសហការគ្នា លេបត្របាក់យកគណបក្សសង្រ្គោះជាតិតែម្តង។​ ហើយកាលដែរលោក កឹម សុខា បង្ហាញសារនោះ ហាក់មានកំហឹងនៅក្នុងចិត្តចំពោះលោក សម រង្ស៊ី ថា «យើងត្រូវតែធ្វើ! យើងត្រូវតែហ៊ានប្រឈម! យើងមិនត្រូវគេចវេះ ឬខ្លាចរអាឡើយ» ស្របពេលកូនស្រីរបស់លោក កំពុងទទួលរងការវាយប្រហារពីក្រុមសកម្មជនបក្សសង្គ្រោះជាតិ បន្ទាប់ពីកញ្ញា កឹម មនោវិទ្យា រិះគន់ធ្ងន់ៗលើ សម រង្ស៊ី ។

អ្នកតាមដានស្ថានការណ៏នយោបាយនៅក្នុងប្រទេស បាននាំគ្នារង់ចាំមើលថា តើដំណើរការវិវត្តនយោបាយផ្ទៃក្នុងរបស់គណបក្សសង្គ្រោះជាតិ នឹងឈានដល់ កម្រិតណាទៀត? អាចជានាសុខស្រួលគ្នាវិញ ឬមួយក៏ត្រូវចែកចានចែកឆ្នាំងទៅរកស៊ីរៀងៗខ្លួនវិញ? តែអ្នកដឹងរឿងបានបែកធ្លាយព័ត៌មានអោយដឹងថា តាមពិត លោក កឹម សុខា មិនឆោតល្ងង់ទៅចែកចានចែកឆ្នាំងគ្នាវិញនោះទេ ព្រោះពេលលើកសិទ្ធិមនុស្សមកចូលហ៊ុនជាមួយលោក សម រង្ស៊ី គាត់មានតែប៉ុន្មានកៅអីនៅក្នុងសភាប៉ុណ្ណោះ។ ឥឡូវគាត់មានម៉ាគគោកហើយ រឿងអីអោយរបូតងាយៗនៅពេលលោកសម រង្ស៊ី កំពុងផុងខ្លួនមិន ហ៊ានចូលមកវិញវាគឺជាឱកាសល្អសំរាប់ លោក កឹម សុខា ស៊ីដាច់សង្គ្រោះជាតិតែម្នាក់ឯងដោយស្រួលទៅហើយ៕