(តូក្យូ, ជប៉ុន)៖ ក្នុងបេសកកម្មការងារថ្ងៃដំបូងរបស់លោក វ៉ាន់ សារាយ អគ្គនាយករង​របស់បណ្តាញព័ត៌មាន Fresh News នាថ្ងៃចន្ទ ទី៣ ខែមីនា ឆ្នាំ២០២៥ ត្រូវបានមន្ត្រីក្រសួងការបរទេសជប៉ុន​រៀបចំឱ្យទស្សនកិច្ចនៅទីស្នាក់ការកណ្តាលរបស់ NHK ដែលជាបណ្តាញផ្សព្វផ្សាយ​សារធារណៈតែមួយគត់របស់ជប៉ុន។

NHK ត្រូវបានបើកការផ្សាយលើកដំបូងនៅឆ្នាំ១៩២៥ ដោយផ្សាយតាមវិទ្យុ ដើម្បីផ្តល់ព័ត៌មានដល់ប្រជាពលរដ្ឋ។ ការចាប់ផ្តើមដំណើរការផ្សាយនេះ បន្ទាប់ពីជប៉ុនរងការវាយប្រហារ​ដោយគ្រោះមហន្តរាយរញ្ជួយដី។

NHK បានចាប់ផ្តើមដំណើរការផ្សាយតាមទូរទស្សន៍នៅឆ្នាំ១៩៥៣។ បច្ចុប្បន្ន NHK មានពីរប៉ុស្តិ៍ គឺជា GTV និង ETV។ GTV ផ្សាយព័ត៌មានទូទៅមាននយោបាយ សង្គម សេដ្ឋកិច្ចជាដើម។ ដោយឡែក ETV ផ្សាយផ្តោតជាសំខាន់លើការអប់រំ។

ក្រៅពីផ្សាយជាភាសាជប៉ុនហើយនោះ NHK ក៏បានផ្សាយគ្រប់ដណ្តប់ទៅលើសកលលោកដោយផ្សាយជាភាសាអង់គ្លេស និង២០ភាសាផ្សេងទៀត។ ក្រៅពីការផ្សាយតាម​វិទ្យុ និងទូរទស្សន៍​ហើយនោះ NHK ក៏បានផ្សាយតាមឌីជីថលមានជាវេបសាយ និង App ផងដែរ។

លោក Wataru FUJISHITA ជាអ្នកអត្ថាធិប្បាយ និងជាអ្នកគ្រប់គ្រងការផ្សាយអន្តរជាតិ បានឱ្យដឹងថា ការផ្សាយរបស់ NHK ផ្សាយដោយគោរពទៅតាមច្បាប់ស្តីពីរបបសារព័ត៌មានរបស់ជប៉ុន ជាពិសេសការពង្រឹងសុខុមាលភាពរបស់សង្គម។ មាតិកាព័ត៌មាន ឬកម្មវិធីផ្សាយនានា ត្រូវបានផលិតឡើងដោយគោរពតាមក្រមសីលធម៌វិជ្ជាជីវៈ ហើយផ្នែកនយោបាយ ក៏ត្រូវបានផ្សព្វផ្សាយប្រកបដោយសមធម៌។

លោក Wataru FUJISHITA បានឱ្យដឹងផងដែរថា បច្ចុប្បន្ន NHK មានបុគ្គលិកសរុប​ជាង១ម៉ឺននាក់ មានការិយាល័យនៅតាមខេត្តចំនួន៥៤កន្លែង និងមានការិយាល័យ​នៅក្រៅប្រទេសចំនួន២៩កន្លែង។

បើតាម លោក Wataru FUJISHITA ការចំណាយសម្រាប់ប្រតិបត្តិការផ្សាយរបស់ NHK នាពេលបច្ចុប្បន្នខ្ទង់ប្រមាណជា ៤ពាន់លានដុល្លារអាមេរិក។ ក្នុងនោះថវិកាប្រមាណជា៩៦ភាគរយ ស្មើប្រមាណ ៣.៨ពាន់លានដុល្លារ បានពីការបង់សេវាប្រចាំខែរបស់ប្រជាពលរដ្ឋប្រមាណ ៤១លានខ្នងផ្ទះ និង ៣.៥ភាគរយ ស្មើនឹងប្រមាណ ០.២ពាន់លានដុល្លារបានពីរាជរដ្ឋាភិបាល។

នៅក្នុងជំនួបនេះ លោក វ៉ាន់ សារាយ និងលោក Wataru FUJISHITA បានចែករំលែកបទពិសោធន៍នៃការផ្សព្វផ្សាយព័ត៌មានរវាងប្រទេសទាំងពីរ ហើយក៏មានការជជែក​ដល់ការជះឥទ្ធិពលនៃការផ្សាយបណ្តាញសង្គមទៅលើបណ្តាញផ្សព្វផ្សាយ និងការជះឥទ្ធិពលនានាទៅលើសង្គម ជាពិសេសការផ្សាយព័ត៌មានមិនពិតផងដែរ។

មិនខុសពីកម្ពុជានោះឡើយ បើតាមការបញ្ជាក់របស់លោក Wataru FUJISHITA ពលរដ្ឋរបស់ជប៉ុន ក៏ពេញនិយមការប្រើប្រាស់បណ្តាញសង្គមដូចគ្នាផងដែរ។ កំណើននៃការប្រើប្រាស់បណ្តាញសង្គមក៏បានជះឥទ្ធិពលមិនល្អដល់បណ្តាញផ្សព្វផ្សាយនៅក្នុង ប្រទេស​ជប៉ុន ដូចជាការធ្លាក់ចុះចំណូលពីការផ្សព្វផ្សាយពាណិជ្ជកម្ម និងការជះឥទ្ធិពលទៅលើសង្គមតាមរយៈការផ្សាយព័ត៌មានមិនពិត។

ដើម្បីដោះស្រាយការផ្សាយព័ត៌មានមិនពិតនេះ NHK បានបង្កើតក្រុមការងារតាមដានព័ត៌មានលើបណ្តាញសង្គម ហើយត្រូវឆ្លើយតបបន្ទាន់តាមរយៈការស្វះស្វែងរកប្រភពច្បាស់លាស់ផ្សាយត្រឡប់ទៅវិញ។ លោក លោក Wataru FUJISHITA បានអះអាង​ថា តាមរយៈការផ្សាយព័ត៌មានពិតច្បាស់លាស់នេះ បានធ្វើឱ្យប្រជាពលរដ្ឋជប៉ុន ជឿទុកចិត្តចំពោះការផ្សាយរបស់ NHK ហើយនៅពេលមានព័ត៌មានសំខាន់ៗណាមួយកើតឡើង អ្នកទស្សនាអ្នកអាន តែងចូលផ្ទៀតផ្ទាត់ជាមួយ NHK។

សូមបញ្ជាក់ថា លោក Wataru FUJISHITA ធ្លាប់បានធ្វើជាអ្នកឆ្លើយសារព័ត៌មាននៅកម្ពុជាអំឡុង​ទសវត្សរ៍៩០។ កាលពីឆ្នាំ២០២០ ពេលនាវាវេស្ទើដាមចូលចតនៅខេត្ត​ព្រះសីហនុ ដើម្បីសង្គ្រោះអ្នកដំណើរលើនាវាពីជំងឺកូវីដ១៩នោះ លោក Wataru FUJISHITA បានធ្វើដំណើរទៅកាន់កម្ពុជាជាថ្មី។ ធ្លាប់បំពេញការងារនៅកម្ពុជា ក្នុងពេលមានវិបត្តិ និងទើបងើបពីគំនរផេះផង់នៃសង្គ្រាម និងការធ្វើដំណើរដល់កម្ពុជាថ្មីនៅឆ្នាំ២០២០ លោក Wataru FUJISHITA បានបង្ហាញការកត់សម្គាល់ពីការប្រែប្រួល និងការអភិវឌ្ឍន៍ដ៏គួរឱ្យចាប់អារម្មណ៍៕