(ភ្នំពេញ)៖ បន្ទាប់ពីមានការរិះគន់ធ្ងន់ៗចំពោះលោក សម រង្ស៊ី ប្រធានគណបក្សសង្គ្រោះជាតិ កំពុងក្លាយទៅជាប្រធានបទវាយប្រហារគ្នាយ៉ាងក្តៅគគុក ពេញបណ្តាញសង្គម Facebook រវាងមន្រ្តីគណបក្សសង្គ្រោះជាតិ​ និងសកម្មជនគណបក្សសង្គ្រោះជាតិ ទាំងនៅក្នុងប្រទេស និងក្រៅប្រទេស។

នៅប៉ុន្មានថ្ងៃនេះប្រធានបទក្តៅៗ និងជាទីចាប់អារម្មណ៍របស់អ្នកកាសែតនោះ គឺការរិះគន់បើកចំហររបស់កូនស្រីសំណព្វចិត្តលោក កឹម សុខា ចំពោះលោក សម រង្ស៊ី នៅលើបណ្តាញទំនាក់ទំនងសង្គម។ តួយ៉ាងក្រុមសកម្មជនរបស់គណបក្សសង្រ្គោះជាតិ បានធ្វើលិខិតមួយច្បាប់ផ្ញើជូនគណៈកម្មាធិការអចិន្រ្តៃយ៍ និងគណៈកម្មាធិការវិន័យគណបក្សសង្គ្រោះជាតិ ដោយស្នើឲ្យកញ្ញា កឹម មនោវិទ្យា ដែលជាមន្រ្តីជាន់ខ្ពស់មួយរូបនៅក្នុងគណបក្ស ធ្វើការកែតម្រូវនូវកំហុសរបស់ខ្លួន។

នៅក្នុងលិខិតនោះបានសរសេរថា «ទង្វើរបស់កញ្ញា កឹម មនោវិទ្យា នៅពេលកន្លងមកនេះមានចរិតលក្ខណៈជាការវាយប្រហារ និងប្រមាថមើលងាយ លោក សម រង្ស៊ី ប្រធានគណបក្សសង្គ្រោះជាតិទាំងស្រុង​» នឹងអាចបង្កើតឲ្យមានសញ្ញាណនៃការបែកបាក់នៅថ្ងៃខាងមុខក្នុងជួរគណបក្សសង្គ្រោះជាតិ នៅក្រៅប្រទេស ក្នុងករណីកញ្ញា កឹម មនោវិទ្យា​ មិនធ្វើការកែតម្រូវ​»។

ម្ចាស់ Facebook ឈ្មោះ Sovijaya Saro ដែលគេដឹងថាជាសកម្មជនគាំទ្របក្សប្រឆាំងមានទំនោរគាំទ្រលោក សម រង្ស៊ី បានសរសេររិះគន់កូនស្រីប្រធានស្តីទីបក្ស ប្រឆាំងកញ្ញា កឹម មនោវិទ្យា យ៉ាងដូច្នេះថា៖ «សមរភូមិនៅចំពោះមុខ(២០១៧-១៨) ទ័ពជួរមុខ​(មន្រ្តីមូលដ្ឋាន) កំពុងខិតខំអស់ទាំងកម្លាំងកាយចិត្ត ឯមហាមន្រ្តី មនោវិទ្យា គិតតែពីវាយប្រហារ ដួងព្រលឹងខ្លួនឯង(មេបក្ស)។ បើនិយាយពីសមរភូមិ ត្រូវនិយាយអំពីវិន័យ។ បើអាណាធិបតេយ្យយ៉ាងនេះ ច្បាំង១០០ដង ចាញ់ទាំង១០០ដង។ សូមសរសើរកញ្ញា កឹម មនោវិទ្យា ចេះសំអាងហេតុផលប្រជាធិបតេយ្យ បង្កភាពអាណាធិបតេយ្យ ពេញពិភពខ្មែរ ពូកែជាងឪពុកមារបស់នាង ឈ្មោះ កឹម សុខុន ឆ្ងាយណាស់»។

ចំណែកម្ចាស់ Facebook ឈ្មោះ ប៊ុន រឿន ដែលមានទំនោរគាំទ្រលោក កឹម សុខា ឯណោះវិញបានលើកឡើងវិញថា៖ «ការវាយបកទៅលើ​ ប្អូនស្រី​ គឹម​ មនោវិទ្យា កូនលោកពូ​ គឹម​ សុខា​ មកពីកូតាគណបក្ស​សិទ្ធមនុស្ស​ យ៉ាងចាស់ដៃ​ !!! ការព្រលែងឆ្កែអោយខាំគ្នានេះគ្រាន់តែជាចំណុចចាប់ផ្ដើមទេ​ តែលោកចៅសង្កាត់រង​ អាចនឹងជួបគ្រោះ ច្រើនជាងលាភហើយ​ ព្រោះបច្ចុប្បន្នគណបក្សសង្រ្គោះជាតិ​ សមាជិក៨០ភាគរយ​ គេគាំទ្រនឹងដើរតាមលោកអនុប្រធាន​ កឹម​ សុខា​ ហើយ​ ខ្ញុំប្រាប់លោកឲ្យ ច្បាស់ពីចរឹកលោកពូ​ គឹម​ សុខា​ មួយចុះគឺលោកមិនចូលចិត្តដើរពីក្រោយគេទេ​ ចរឹកហ្ស៊ីតាំងពីនៅស៊ីប៉េខ្មែរក្រហមនៅខេត្តតាកែវមកម្ល៉េះ»។

ការឆ្លើយតបរបស់លោក ប៊ុន រឿន នៅលើ Facebook នាថ្ងៃទី២៦ ខែតុលានេះ ធ្វើឡើងបន្ទាប់ពី ចៅសង្កាត់រងម្នាក់ (មិនបញ្ចេញឈ្មោះ) បានចេញវិដេអូរិះគន់ កញ្ញា កឹម មនោវិទ្យា បន្ទាប់ពីកូនស្រីលោក កឹម សុខា រូបនេះ បានធ្វើការរិះគន់ចំៗនិងធ្ងន់ៗចំពោះលោក សម រង្ស៊ី រយៈពេលថ្មីៗនេះ។

នៅរសៀលថ្ងៃនេះទី២៦ ខែតុលានេះ ស្របពេលកូនស្រីរបស់សំណព្វចិត្តរបស់លោក កឹម សុខា បាននឹងកំពុងទទួលរងនូវការវាយប្រហារតបត ពីក្រុមសកម្មជនគណបក្សសង្គ្រោះជាតិ ទាំងនៅក្នុង និងក្រៅប្រទេស ក្រោយពេលកញ្ញាបានរិះគន់ធ្ងន់ៗចំពោះលោក​ សម រង្ស៊ី នោះ, នៅរសៀលថ្ងៃទី២៦ ខែតុលា ឆ្នាំ២០១៦នេះ លោក កឹម សុខា បានបង្ហាញសារហាក់មានកំហឹងនៅក្នុងចិត្ត ដោយលើកឡើងថា យើងត្រូវតែធ្វើ! យើង​ត្រូវតែហ៊ានប្រឈម! យើងមិនត្រូវគេចវេះ ឬខ្លាចរអាឡើយ ទីបំផុតគេនឹងទទួលស្គាល់ និងឲ្យតម្លៃយើង ថាយើងបានធ្វើនោះត្រឹមត្រូវ។

លោក​ កឹម សុខា បានសរសរនៅលើ Facebook ផ្លូវការរបស់លោកយ៉ាងដូច្នេះថា «តើបងប្អូនដឹងទេថា កាលពីថ្ងៃទី២៦ ខែតុលា ឆ្នាំ២០១៥ មានអ្វីកើតឡើង? ជាធម្មតា យើងធ្វើដំណើរកាត់ភ្លៀងតែងតែទទឹកហើយ ក៏ប៉ុន្ដែ​បើពេលវេលាចាំបាច់តម្រូវឲ្យយើងទៅឲ្យដល់គោលដៅនោះ ​​យើងត្រូវតែធ្វើ! យើង​ត្រូវតែហ៊ានប្រឈម! យើងមិនត្រូវគេចវេះ ឬខ្លាចរអាឡើយ (No Risk No Change)។ សំខាន់យើងត្រូវស្គាល់ខ្លួនយើង ជឿជាក់លើខ្លួនយើង ថាយើងត្រូវធ្វើដំណើរទៅណា? ដើម្បី​អ្វី? ទីបំផុតគេនឹងទទួលស្គាល់ និងឲ្យតម្លៃយើង ថាយើងបានធ្វើនោះត្រឹមត្រូវ ដែលជាផលប្រយោជន៍រួមសម្រាប់ប្រទេសជាតិ និងប្រជាពលរដ្ឋខ្មែរមែន»។

ការបង្ហាញសាររបស់លោក កឹម សុខា នៅពេលនេះ បានកើតឡើងបន្ទាប់ពីក្រុមសកម្មជនបក្សសង្គ្រោះជាតិ ទាំងនៅលើបណ្តាញសង្គម និងនៅក្រៅប្រទេស រួមនឹងលោក យ៉ែម បុញ្ញឫទ្ធិ អ្នកនាំពាក្យគណបក្សសង្រ្គោះជាតិ នៅថ្ងៃទី២៦ ខែតុលា ឆ្នាំ២០១៦នេះ បានច្រានចោលព័ត៌មាន ដែលថា គណបក្សប្រឆាំងធំជាងគេនៅកម្ពុជាមួយនេះ កំពុងមានការបែកបាក់ផ្ទៃក្នុងយ៉ាងខ្លាំង។

ការរិះគន់យ៉ាងចាស់ដៃ របស់កញ្ញា កឹម មនោវិទ្យា កូនស្រីសំណព្វចិត្តរបស់លោក កឹម សុខា ដែលជាប្រធានស្តីទីគណបក្សប្រឆាំងនាពេលនេះ តើគណៈកម្មាធិការវិន័យរបស់គណបក្ស ហ៊ានដាក់ពិន័យចំពោះកូនស្រីលោក កឹម សុខា ដែរឬយ៉ាងណា​? ៕