(ភ្នំពេញ)៖ បន្ទាប់ពីបើកសវនាការជំនុំជម្រះ នៅថ្ងៃទី២៦ ខែតុលា ឆ្នាំ២០១៦នេះ សាលាដំបូងរាជធានីភ្នំពេញ បានសម្រេចប្រកាស សាលក្រម សំណុំរឿង លោក ហុង សុខហួរ អតីតសមាជិកព្រឹទ្ធសភាគណបក្សសមរង្ស៊ី នៅថ្ងៃទី៧ ខែវិច្ឆិកា ឆ្នាំ២០១៦ ខាងមុខនេះ។

លោក ហុង សុខហួរ ដែលកំពុងជាប់ឃុំនៅពន្ធនាគារព្រៃស ត្រូវបានតុលាការចោទប្រកាន់ពីបទក្លែងបន្លំឯកសារសាធារណៈបទប្រើប្រាស់ ឯកសារសាធារណៈក្លែង និងបទញុះញង់បង្កឲ្យមានភាពវឹកវរធ្ងន់ធ្ងរដល់សន្តិសុខសង្គម ដែលចែងឲ្យផ្ដន្ទាទោសតាមមាត្រា ៦២៩ មាត្រា ៦៣០ និងមាត្រា ៤៩៥ នៃក្រមព្រហ្មទណ្ឌ ពាក់ព័ន្ធការក្លែងសន្ធិសញ្ញាព្រំដែនកម្ពុជា-វៀតណាម ហើយយកឯកសារក្លែងនេះទៅបង្ហោះក្នុង ផេកហ្វេសប៊ុករបស់ លោក សម រង្ស៊ី ។

ក្នុងករណីដែលតុលាការរកឃើញថា លោក ហុង សុខហួរ ពិតជាបានប្រព្រឹត្តដូចការចោទប្រកាន់មែននោះ លោក ហុង សុខហួរ អាចប្រឈម មុខនឹងការជាប់ពន្ធនាគារចន្លោះពី៥ឆ្នាំទៅ១០ឆ្នាំ៕