(ភ្នំពេញ)៖ ​លោក​ មាជ​ សុវណ្ណារ៉ា​ មន្ត្រី​ជាន់ខ្ពស់​គណបក្ស​ប្រឆាំង​ទទួល​បន្ទុក​ផ្នែក​ព័ត៌មាន​ ត្រូវ​បាន​តុលាការ​កំពូល​សម្រេច​នៅ​ព្រឹក​ថ្ងៃ​ទី​២៦​ ខែ​តុលា​នេះ​ ដោយបដិសេធ​ចំពោះ​ការ​ស្នើ​សុំ​នៅ​ក្រៅ​ឃុំ​បណ្តោះអាសន្ន​។​ កន្លង​ទៅ​លោក​ មាជ​ សុវណ្ណារ៉ា​ ស្នើ​សុំ​ចេញ​ទៅ​ក្រៅ​ប្រទេស​ដើម្បី​ព្យាបាល​ជំងឺ​។

ការ​សម្រេច​នេះ​ធ្វើ​ឡើង​ដោយ​កំបាំង​មុខ​លោក​ មាជ​ សុវណ្ណារ៉ា​ ដោយសារ​លោក​ មាជ​ សុវណ្ណារ៉ា​ ស្នើ​សុំ​មក​តុលាការ​កំពូល​ មិន​ចូលរួម​ការ​ស្តាប់​សាលដីកា​។

ប្រធាន​ក្រុមប្រឹក្សា​ជំនុំជម្រះ​តុលាការ​កំពូល​ លោក​ស្រី​ គិម​ សត្ថាវី​ ​ សម្រេច​បែប​នេះដោយ​សំអាង​ថា​ សំណុំ​រឿង​លោក​ មាជ​ សុវណ្ណារ៉ា​ បាន​ធ្លាក់​ដល់​រឿង​អង្គសេចក្តី​រួចហើយ​ ណាមួយ​លោក​ មាជ​ សុវណ្ណារ៉ា​ ត្រូវ​តុលាការ​ថ្នាក់​ក្រោម​ផ្តន្ទា​ទោស​២០ឆ្នាំរួចហើយ​ដែរ​។​ ដូច្នេះ​ការ​សម្រេច​មិន​អនុញ្ញាត​ឲ្យ​លោក​ មាជ​ សុវណ្ណារ៉ា​ នៅ​ក្រៅ​ឃុំ​បណ្តោះអាសន្ន​ជា​រឿង​ត្រឹមត្រូវ​។

លោក​ ជូង​ ជូងី​ មេធាវី​ការពារ​ក្ដី​លោក​ មាជ​ សុវណ្ណារ៉ា​ ថ្លែង​ប្រាប់​ក្រុម​អ្នក​សារព័ត៌មាន​ថា​ ការ​សម្រេច​របស់​តុលាការ​កំពូល​ ជា​រឿង​មិន​ត្រឹមត្រូវ​ ព្រោះ​ការ​សម្រេច​មិន​អនុញ្ញាត​ឲ្យ​លោក​ មាជ​ សុវណ្ណារ៉ា​ ចេញ​ទៅ​ក្រៅ​ប្រទេស​ មុន​ពេល​តុលាការ​ផ្តន្ទា​ទោស​។​ ទោះបី​យ៉ាងណា​ លោក​មេធាវី​ ជូង​ ជូងី​ នឹង​ពិភាក្សា​ជាមួយ​កូន​ក្ដី​ ដើម្បី​ធ្វើ​យ៉ាងណា​ទៀត​ចំពោះ​ករណី​នេះ​។

គួរ​រំលឹក​ថា​ លោក​ មាជ​ សុវណ្ណារ៉ា​ ជាប់​ចោទ​ពី​បទ​ «ដឹកនាំ​កុបកម្ម​ និង​អំពើ​ចូលរួម​ចលនា​កុបកម្ម​»​ ប្រព្រឹត្ត​នៅ​ចំណុច​ទីលាន​ប្រជាធិបតេយ្យ​ ក្នុង​សង្កាត់​វត្តភ្នំ​ ខណ្ឌ​ដូនពេញ​ កាលពី​ថ្ងៃទី​១៥​ ខែ​កក្កដា​ ឆ្នាំ​២០១៤​។​ កន្លង​ទៅ​ លោក​ មាជ​ សុវណ្ណារ៉ា​ ធ្លាប់​ត្រូវ​បាន​សាលា​ដំបូង​រាជធានី​ភ្នំពេញ​ ផ្តន្ទា​ទោស​រយៈពេល​២០ឆ្នាំ​រួច​មក​ហើយ​ចំពោះ​បទល្មើស​នេះ​៕