(តាកែវ)៖ កាកបាទក្រហមកម្ពុជា និងក្រុមការងារឥស្សរជនឆ្នើមថ្នាក់ជាតិ នៃទីស្នាក់ការកណ្តាល និងថ្នាក់សាខាខេត្តតាកែវ សហការជាមួយក្លឹបយុវជនកាកបាទក្រហមកម្ពុជា នៃសាកលវិទ្យាល័យវិទ្យាសាស្ត្រសុខាភិបាល បានរៀបចំពិធីសំណេះសំណាលសួរសុខទុក្ខ អប់រំសុខភាព និងពិនិត្យផ្ទៃពោះជូនស្ត្រីជាមាតាចំនួន ៥០នាក់ នៅមណ្ឌលសុខភាពពត់សរ ស្ថិតក្នុងឃុំពត់សរ ស្រុកបាទី ខេត្តតាកែវ។
ពិធីនេះប្រព្រឹត្តទៅនៅថ្ងៃទី២២ ខែកុម្ភៈ ឆ្នាំ២០២៥ ក្រោមអធិបតីភាព លោកជំទាវ ម៉ែន នារីសោភ័គ អគ្គលេខាធិការរងទី ១ កាកបាទក្រហមកម្ពុជា និងជាអនុប្រធានអចិន្ត្រៃយ៍ក្រុមការងារឥស្សរជនឆ្នើមថ្នាក់ជាតិ និងលោក វ៉ី សំណាង ប្រធានគណៈកម្មាធិការសាខាកាកបាទក្រហមកម្ពុជា ខេត្តតាកែវ និងក្រុមការងារ ព្រមទាំងមានយុវជនកាកបាទក្រហមកម្ពុជា ១៨នាក់ ដែលជានិស្សិតនៃសាកលវិទ្យាល័យវិទ្យាសាស្ត្រសុខាភិបាល ចុះពិនិត្យផ្ទៃពោះជូនស្ត្រីជាមាតាចំនួន ៥០នាក់។
ជាមួយនឹងសារអប់រំសុខភាព និងការពិនិត្យផ្ទៃពោះ ស្ត្រីជាមាតាទាំង៥០នាក់ ក៏ទទួលបានអំណោយក្នុងម្នាក់ៗទទួលបាន កន្សែងពោះគោធំ១, ក្រមា១, សារុង១, ភួយ១, មុង១, សាប៊ូដុំ ២ដុំ និងថវិកា ២ម៉ឺនរៀលផងដែរ។ ដោយឡែក និស្សិត ទាំង១៨នាក់ ទទួលបានប័ណ្ណសរសើរពី កាកបាទក្រហមកម្ពុជា។
ក្នុងឱកាសអបអរទិវាជាតិសុខភាពមាតា ទារក និងកុមារ ឆ្នាំ២០២៥នេះផងដែរ លោកស្រី ម៉ែន នារីសោភ័គ និងក្រុមការងារបានបន្តចុះសួរសុខទុក្ខ ក៏បានបន្ដដំណើរចុះអប់រំផ្សព្វផ្សាយពីសារអប់រំសុខភាពដល់ស្ត្រីមានកូនតូចចំនួន ២០គ្រួសារ រស់នៅឃុំពត់សរ ស្រុកបាទី ខេត្តតាកែវ។ ជាមួយនឹងការទទួលបានសារអប់រំសុខភាព ស្ត្រីជាមាតាទាំង ២០នាក់ ក៏ទទួលបានអំណោយក្នុងម្នាក់ៗទទួលបាន កន្សែងពោះគោធំ១, ក្រមា១, សារុង១, ភួយ១, មុង១, សាប៊ូដុំ ២ដុំ និងថវិកា ២ម៉ឺនរៀល។
បន្ទាប់ពីបញ្ចប់កិច្ចសំណេះសំណាលខាងលើនេះ លោកស្រីបានបន្ដចុះសួរសុខទុក្ខ និងនាំយកអំណោយមនុស្សធម៌ជូនចាស់ឥតទីពឹង និងជនពិការ ចំនួន ១៨គ្រួសារ រស់នៅឃុំពត់សរ និងឃុំក្រាំងធ្នង់ ស្រុកបាទី ខេត្តតាកែវ ដោយគ្រួសារនីមួយៗទទួលបាន អង្ករ ២៥គីឡូក្រាម, មី ១កេស, ត្រីខ ១យួរ (១០កំប៉ុង), ទឹកស៊ីអ៊ីវ ១យួរ, ឃីត (ក្រមា សារុង មុង ភួយ) ១កញ្ចប់, និងថវិកា ៥ម៉ឺនរៀល៕
