(ភ្នំពេញ)៖ លោក ហួត ហាក់ រដ្ឋមន្ត្រីក្រសួងទេសចរណ៍ បានអនុញ្ញាតជូនក្រុមផ្ការីកគ្រប់រដូវ ដឹកនាំឱ្យលោក ចែម ចាន់រ៉ា ហៅពាក់មី បានចូលជួបពិភាក្សាការងារអំពីគម្រោងនិងផែនការរបស់ក្រុមផ្ការីកគ្រប់រដូវក្នុងការរៀបចំព្រឹត្តិការណ៍ធំៗនៅកម្ពុជា ដើម្បីលើកស្ទួយ ជំរុញ និងផ្សព្វផ្សាយនូវសក្តានុពលទេសចរណ៍ កសិទេសចរណ៍ និងផលិតផលកម្ពុជាទៅកាន់ភ្ញៀវទេសចរជាតិនិងអន្តរជាតិ ព្រមទាំងស្នើសុំការសហការនិងគាំទ្រពីក្រសួងទេសចរណ៍ដល់គម្រោង និងផែនការដ៏មានសារសំខាន់ ដើម្បីប្រជាជនកម្ពុជា និងទេសចរណ៍កម្ពុជា។
ជំនួបនេះធ្វើឡើងនារសៀលថ្ងៃទី២០ ខែកុម្ភៈ ឆ្នាំ២០២៥ នៅទីស្ដីការក្រសួងទេសចរណ៍។
សូមបញ្ជាក់ជូនថា ក្រុមផ្ការីកគ្រប់រដូវមានសមាជិក៤០នាក់ ដែលជាក្រុមបាល់ទាត់ដ៏លេចធ្លោមួយនៅកម្ពុជា និងជាពិសេសសមាជិកក្រុមនីមួយៗឆន្ទៈ សមត្ថភាព និងធនធានក្នុងការចូលរួមបង្កើតនូវព្រឹត្តិការណ៍ដ៏ល្បីៗ និងទាក់ទាញសម្រាប់ផ្សព្វផ្សាយតំបន់ទេសចរណ៍ វប្បធម៌ និងផលិតផលកម្ពុជា ដែលអាចចាត់ទុកបានថាជាក្រុមសំខាន់ដ៏ធំមួយក្នុងការជួយជ្រោមជ្រែងនៅក្នុងវិស័យទេសចរណ៍កម្ពុជា។
លោករដ្ឋមន្ត្រីបានថ្លែងកោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែងរបស់ក្រុមផ្ការីកគ្រប់រដូវក្នុងការផ្សព្វផ្សាយ ជំរុញ និងលើកស្ទួយពីតម្លៃនៃតំបន់ទេសចរណ៍ វប្បធម៌ និងកេរដំណែលពីដូនតាបានបន្សល់ទុកឱ្យកូនចៅជំនាន់ក្រោយ ជាពិសេសមិនត្រឹមតែផ្សព្វផ្សាយដល់ភ្ញៀវជាតិប៉ុណ្ណោះទេ ថែមទាំងផ្សព្វផ្សាយយ៉ាងទូលំទូលាយដល់ភ្ញៀវអន្តរជាតិផងដែរ។
លោករដ្ឋមន្ត្រីក៏បានគាំទ្រនិងលើកទឹកចិត្តចំពោះគម្រោង និងផែនការរបស់ក្រុម ហើយក្រសួងទេសចរណ៍រីករាយនឹងចូលរួមសហការយ៉ាងខ្ជាប់ខ្ជួនជាប់ជាប្រចាំ និងបានស្នើសុំឱ្យមានការផ្សព្វផ្សាយបែបនេះ និងទូលំទូលាយជាងនេះបន្ថែមទៀត ដើម្បីទេសចរណ៍ និងសង្គមជាតិ៕
