(កំពង់ឆ្នាំង)៖ លោក អ៊ុយ សំអាត នាយកនៃនាយកដ្ឋានគ្រប់គ្រងគ្រោះមហន្តរាយ របស់កាកបាទក្រហមកម្ពុជា រួមដំណើរដោយ លោក អ៊ុន សំអុល ប្រធានគណ:កម្មាធិការសាខា ព្រមទាំងសមាជិក សមាជិកាគណៈកម្មាធិកាសាខា ក្រុមប្រតិបត្តិសាខា នៃអនុសាខាស្រុកកំពង់លែង បានធ្វើពិធីប្រគល់អណ្តូងស្នប់ទឹកស្អាតចំនួន៣អណ្តូង ដែលមានលេខរៀងទី១៥៤ មានទីតាំងស្ថិតនៅក្នុងសាលាបឋមសិក្សាថ្មរៀង អណ្ដូងលេខរៀងទី១៥៥ ស្ថិតនៅក្នុងសាលាបឋមសិក្សាត្រងិល និងអណ្ដូងលេខរៀងទី ១៥៦ ស្ថិតនៅក្នុងសាលាបឋមសិក្សាពោធិ៍។
ក្នុងឱកាសប្រគល់អណ្ដូងស្នប់ទឹកនៅថ្ងៃទី២៤ ខែតុលា ក៏បានផ្ដល់នូវបាសាំងទឹកចំណុះ២០ម៉ែត្រគូប នៅក្នុងសាលាបឋមសិក្សាពោធិ៍ ១កន្លែង សាលាបឋមសិក្សាថ្មរៀង សាលាបឋមសិក្សាកង្កែប និងអនុវិទ្យាល័យត្រងិល ដែលនេះជាអំណោយដ៏ថ្លៃថ្លារបស់ សម្តេចកិត្តិព្រឹទ្ធបណ្ឌិតប៊ុន រ៉ានី ហ៊ុនសែន ប្រធានកាកបាទក្រហមកម្ពុជា។ បាសាំងទឹក និងអណ្តូងទឹកស្អាត ទាំងនេះបានជួយសម្រួលដល់លោកគ្រូ អ្នកគ្រូ សិស្សានុសិស្ស និងប្រជាពលរដ្ឋ ឲ្យមានទឹកប្រើប្រាស់នៅរដូវប្រាំងដែលជួបការខ្វះខាតទឹកការប្រើប្រាស់ប្រចាំថ្ងៃ ចំពោះអ្នកទទួលផលពីការប្រើប្រាស់អណ្ដូង និងបាសាំងទឹកសរុបចំនួន ២២៩១នាក់ ដែលរស់នៅក្នុងសហគមន៍ខាងលើនេះ។
ក្នុងឱកាសនោះ លោក អ៊ុយ សំអាត បានពាំនាំនូវប្រសាសន៍ផ្តាំផ្ញើរសាកសួរសុខទុក្ខពីសំណាក់សម្តេចទាំងពីរ ដែលជានិច្ចជាកាល សម្តេចកិត្តិព្រឹទ្ធប្រធាន និងសម្តេចតេជោ នាយករដ្ឋមន្រ្តី តែងតែយកចិត្តទុកដាក់ចំពោះបញ្ហាសុខភាពរបស់ប្រជាពលរដ្ឋ នៅទូទាំងប្រទេស ជាពិសេសបញ្ហាអនាម័យទឹកស្អាត។ ជាមួយគ្នានោះ លោក អ៊ុយ សំអាត បានជម្រាបជូនបងប្អូនប្រជាពលរដ្ ឋនូវអនុសាសន៍មួយចំនួនដែលសម្តេចកិត្តិព្រឹទ្ធបណ្ឌិត តែបានថ្លែងទៅកាន់ប្រជាជននៅគ្រប់ទីកន្លែងគឺ៖
១. ទឹកចិត្តរបស់ សម្តេចកិត្តិព្រឹទ្ធបណ្ឌិត នៅជាប់ជាមួយបងប្អូន និងគិតគូរដល់ជីវភាពរស់នៅរបស់បងប្អូន នៅតាមបណ្ដាលខេត្ត រឺទីជនបទដាច់ស្រយ៉ាលនៅទូទាំងប្រទេស ជាពិសេសបងប្អូនអ្នកផ្ទុកមេរោគអេដស៍ និងជំងឺអេដស៍ កុមារកំព្រា ជនពិការ ចាស់ជរាគ្មានទីពឹង និងគ្រួសារទីទ័លក្រ។ល។
២. សម្តេចកិត្តិព្រឹទ្ធបណ្ឌិត បានជម្រាបថា ប្រធានគណៈកម្មាធិការសាខា អាជ្ញាធរគ្រប់លំដាប់ថ្នាក់ ក្រុមប្រិតបតិ្តសាខា អ្នកស្ម័គ្រចិត្ត និងយុវជនកាកបាទក្រហមកម្ពុជា នៅរង់ចាំជួយជានិច្ចនូវការសម្រេចចិត្ត និងការស្នើសុំរបស់បងប្អូនដែលមានតម្រូវការឲ្យជួយ។
៣. សូមឲ្យបងប្អូនធ្វើជាម្ចាស់នៃសមិទ្ធិផលអណ្តូងទឹកស្អាតទាំងនេះ និងកែច្នៃជីវភាពរស់នៅឲ្យបានល្អប្រសើរ ចូលរួមសហការមើលថែទាំអំណោយដ៏ថ្លៃថ្លានេះ ដើម្បីជាប្រយោជន៍ក្នុងការប្រើប្រាស់ ដ៏យូរអង្វែង និងមានទឹកស្អាតប្រើប្រាស់បានគ្រប់គ្រាន់ទាំងនៅរដូវប្រាំងនិងរដូវវស្សា ហើយត្រូវខិតខំឧស្សាហ៍ព្យយាមដាំដំណាំបន្លែបង្ការរួមផ្សំផ្សេងៗ ដើម្បីធ្វើឱ្យជីវភាពបងប្អូនបានធូរធារថែមទៀត។
ក្នុងដំណើរចុះដល់ទីតាំងប្រគល់អណ្តូងទឹកស្អាត និងបាសាំងទឹក លោក អ៊ុយ សំអាត ក៏បាននាំយកអំណោយដ៏ថ្លៃថ្លារបស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ផ្តល់ជូនដល់ លោកតា លោកយាយចំនួន២៥នាក់ ដែលក្នុងម្នាក់ៗទទួលបាន៖ មី ត្រីខកំប៉ុង កន្សែង និងក្រមា ក្នុងនោះផងដែរ យុវជនកាកបាទក្រហមកម្ពុជា ចំនួន៥នាក់ សិស្សានុសិស្សចំនួន២៥នាក់ បានទទួលថវិកាមួយចំនួនផងដែរ។
ប្រជាពលរដ្ឋ ដែលជាអ្នកទទួលផលមានសេចក្តីរំភើបរីករាយយ៉ាងក្រៃលែង និងសូមថ្លែងអំណរគុណចំពោះ សម្តេចដែលបានឆ្លើយតបចំពោះពួកគាត់ទាំងអស់គ្នា នៅបញ្ហាកង្វះខាតទឹកស្អាតប្រើប្រាស់ នារដូវប្រាំងខាងមុខនេះ និងសូមសម្តេចទាំងពីរទទួលបាននូវពុទ្ធពរ៤ គឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ៕
