(តាកែវ)៖ រថយន្ដមួយគ្រឿងសង្ស័យជាប្រភេទបែនដឹកខ្សាច់ (កង់៦) បានបុកអ្នកជិះកង់បណ្ដាលឲ្យស្លាប់ភ្លាមៗនៅកន្លែងកើតហេតុ នាវេលាម៉ោង៥៖១០នាទីព្រឹក ថ្ងៃទី១៥ ខែកុម្ភៈ ឆ្នាំ២០២៥ ចំណុចភូមិស្នោ ឃុំស្នោ ស្រុកព្រៃកប្បាស ខេត្តតាកែវ។
បើតាមក្រុមគ្រួសារសាច់ញាតិ បានឲ្យដឹងថា មុនពេលកើតហេតុជនរងគ្រោះឈ្មោះ ម៉ម ឈីម ភេទប្រុស អាយុ៦៦ឆ្នាំ បានជិះកង់ហាត់ប្រាណនៅតំបន់ខាងលើ ហើយក៏ជួបគ្រោះថ្នាក់ចរាចរណ៍ដោយសាររថយន្ដបង្កបុក បណ្ដាលឲ្យរងរបួសធ្ងន់ និងស្លាប់ពេលបញ្ជូនតាមផ្លូវទៅមន្ទីរពេទ្យ។ ដោយឡែក អ្នកបើកបររថយន្ដបង្កបានបើករត់គេចខ្លួនបាត់ស្រមោល។
រហូតមកដល់ថ្ងៃទី១៩ ខែកុម្ភៈ ឆ្នាំ២០២៥នេះ សមត្ថកិច្ចនៃស្នងការដ្ឋាននគរបាលខេត្តតាកែវ មិនទាន់ស្រាវជ្រាវរកឃើញរថយន្ដ និងអ្នកបើកបរនៅឡើយទេ។ ផ្អែកតាមការឆែកកាមេរ៉ារបស់ក្រុមគ្រួសារសាច់ញាតិ បានឃើញថា រថយន្ដដែលសង្ស័យជាប្រភេទរថយន្ដបែនដឹកខ្សាច់កង់៦ ពណ៌ស មិនឃើញផ្លាកលេខ (ពេលកើតហេតុកំពុងដឹកខ្សាច់)។
តាមរយៈការប្រដេញកាមេរ៉ាសុវត្ថិភាព បានប្រទះឃើញរថយន្ដនេះបន្ដដំណើរដល់ចំណុចភូមិចារ ឃុំចារ ស្រុកព្រៃកប្បាស ហើយឆ្ពោះទៅភូមិក្រាំងយ៉ូវ ឃុំក្រាំងយ៉ូវ ស្រុកស្អាង ខេត្តកណ្ដាល (តំបន់កំពុងជួសជុលផ្លូវ) ចន្លោះម៉ោង០៥៖៣០នាទីព្រឹក (ក្រោយកើតហេតុ)។
ជាមួយគ្នានេះ ក្រុមគ្រួសារសាច់ញាតិ បានអំពាវនាវដល់លោក វ៉ី សំណាង អភិបាលខេត្តតាកែវ និងលោកឧត្តមសេនីយ៍ទោ ម៉ែន លី ស្នងការនគរបាលខេត្តតាកែវ ជួយស្រាវជ្រាវដើម្បីស្វែងរកចាប់ខ្លួនអ្នកបើកបររថយន្ដ បង្កមកផ្ដន្ទាទោសតាមផ្លូវច្បាប់។ ក្នុងករណីត្រូវការជួយសហការជាមួយក្រុមគ្រួសារ ដើម្បីបន្ដឆែកកាមេរ៉ាសុវត្ថិ ពួកគាត់ត្រៀមខ្លួនដើម្បីសហការជានិច្ច។
លោកឧត្តមសេនីយ៍ទោ ម៉ែន លី ស្នងការនគរបាលខេត្តតាកែវ បានបញ្ជាក់ថា «ករណីនេះអធិការនគរបាលស្រុក និងជំនាញខេត្តកំពុងប្រឹងប្រែងហើយ ដើម្បីស្វែងរកចាប់អ្នកបើកឡានបង្ក»៕
