(ភ្នំពេញ)៖ កាយវិការរបស់នគរបាលចរាចរណ៍រុញច្រានលោកបណ្ឌិត សុខ ទូច ប្រធានរាជបណ្ឌិត្យសភាកម្ពុជា ពេលគាត់ព្យាយាមអូសវ៉ាលីចេញពីកន្លែងកើតហេតុ បានធ្វើឱ្យសាធារណជនសម្តែងក្តីសង្វេគ និងហួសចិត្តជាពន់ពេក។
វិដេអូនោះក៏បង្ហាញពីមន្រ្តីនគរបាល ជិត១០នាក់ដែលឡោមព័ទ្ធបណ្ឌិត សុខ ទូច និងចាប់រុញលោកបណ្ឌិត ស្ទើរដួលចង់ផ្កាប់មុខ, សាធារណមតិបានលើកឡើងថា មន្រ្តីទាំងនោះមិនគួរត្រូវបានលើកលែងនោះឡើយ !
នៅរសៀលថ្ងៃទី១៨ ខែកុម្ភៈ ឆ្នាំ២០២៥ដដែលនេះ ឧត្តមសេនីយ៍ឯក ជួន ណារិន្ទ ប្រកាសចាត់វិធានការមិនលើកលែង ចំពោះមន្ដ្រីនគរបាលគ្មានសីលធម៌វិជ្ជាជីវៈ !
ខាងក្រោមជាមតិយោបល់មួយចំនួនរបស់អ្នកលេងបណ្តាញសង្គម ដែលបញ្ចេញគាំទ្រលោកបណ្ឌិត សុខ ទូច៖
Vanseang Sok៖ មានគោរម្យងារជាបណ្ឌិតសភាចារ្យ ជាគោរម្យងារបណ្ឌិតថ្នាក់ខ្ពស់ និងជាប្រធានរាជបណ្ឌិត្យសភាកម្ពុជា មានឋានៈស្មើរដ្ឋមន្ត្រី ប៉ុន្តែបែរជាទទួលរងការប្រមាថបែបនេះ ចុះទម្រាំពលរដ្ឋតូចតាចវិញ?
XiChun Sim៖ តម្លៃនៃកិត្យានុភាពរបស់ថ្នាក់ដឹកនាំថ្នាក់ជាតិ ត្រូវបានថមថយដោយសារមន្ត្រីថ្នាក់ក្រោមមួយចំនួនតូចបំពេញតួនាទីពុំមានក្រឹត្យក្រមសីលធម៌ និងវិជ្ជាជីវៈឱ្យបានម៉ត់ចត់ ទើបធ្វើឱ្យប្រជាពលរដ្ឋខឹងសម្បាដោយសារតែមន្ត្រីមួយក្តាប់តូច។ ខ្ញុំមិនជំទាស់នោះទេ ចំពោះគោលការណ៍នៃការអនុវត្តច្បាប់ ព្រោះថាច្បាប់ត្រូវមានការអនុវត្តឲ្យបានត្រឹមត្រូវ និង ប្រកបដោយសមភាព តម្លាភាព ប៉ុន្តែក្នុងករណីដែលប្រើប្រាស់នូវពាក្យសម្តីក្នុងការអនុវត្ត សូមមន្ត្រីគ្រប់រូបប្រកាន់ឱ្យបានខ្ជាប់ខ្ជួននូវក្រមសីលធម៌ និងវិជ្ជាជីវៈនេះតឹងរឹង។
Smeyy៖ ពុទ្ធោ! ចោមរោមគាត់ ធ្វើដូចគាត់ហ្នឹង ភេរវជន ឬពួកភេរវករក្បត់ជាតិទៅហើយ ឱ! លោកអើយ សែនអាសូរអាណិតគោរមងារនៃឯកឧត្តមបណ្ឌិត ដែលគោរមងារត្រូវបានប្រទានដោយព្រះមហាក្សត្រជាទីសក្ការៈដ៏ខ្ពង់ខ្ពស់នៃយើង ស្ទើរស្រក់ទឹកភ្នែក។
មិនគួរណាមានរូបភាពបែបនេះកើតឡើងចំពោះឯកឧត្តមបណ្ឌិតនោះឡើយ សែនសង្វេគ ឯកឧត្តម ជួយប្រទេសជាតិយើងបានច្រើនណាស់ បុគ្គលមួយក្តាប់នេះ គុណសម្បត្តិមានមិនស្មើនឹងរោមជើងរបស់គាត់ផង។
នេះគឺជាសេចក្តីប្រមាទមួយ ដែលយើងខ្ញុំមិនអាចទទួលយកបានពីពួកប៉ូលិសចរាចរណ៍មួយក្តាប់នេះ វីដេអូនេះ អសីលធម៌ហួសពាក្យនឹងថ្លែង វាដូចជាក្រុមហ្វូងចចកមួយក្រុម កំពុងប្រមាញ់តាមខាំហែកស៊ីទន្សាយមួយ ដែលគ្មានវិធីតតាំង។
Seak Leng Chomreun៖ ជាមន្រ្ដីរាជការគួរណាតែមានសុជីវធម៌ ពាក្យសម្ដី អាកប្បកិរិយា មិនមែនត្រូវប្រើទង្វើបែបមនុស្សអត់វិជ្ជាទៅលើបណ្ឌិត សុខ ទូច ដែលតំណាងបញ្ញាវន្ដ័ទូទាំងប្រទេសបែបនេះទេ និយាយតាមត្រង់មន្រ្ដីចរាចរណ៍មួយចំនួនតូចបែបនេះហើយបានជាប្រជាជនមានការខឹងសម្បាដោយទង្វើបែបនេះ។
Koun Geen Socheat៖ បើនិយាយពីគុណសម្បត្តិរបស់លោកបណ្ឌិតក្នុងការបម្រើជាតិ តាំងពីអស់លោកមន្ត្រីនៅជាជនពាលផងមិនដឹង។ ចេញសិក្សាបញ្ហាព្រំដែនតតាំងជាមួយក្រុម សម រង្ស៊ី ឆ្លើយសំនួរតតាំងនៅវិទ្យុអាសុីសេរី ការពារព្រៃនៅតំបន់ព្រៃអភីរក្សតេជោ សិក្សាប្រព័ន្ធអប់រំខ្មែរ បង្កើតរាជបណ្ឌិតសភា បណ្ដុះបណ្ដាលបង្កើតបានបណ្ឌិតរាប់រយនាក់ បែរជាមកត្រូវជនពាលខ្វះការរៀនសូត្រ ចូលធ្វើជាមន្រ្តីតាមអំពើងងឹត មករុញច្រានមើលងាយមិនឲ្យតម្លៃបែបនេះទៅវិញ។
ម៉ាក់ អាហួរ៖ តំណែងប្រធានរាជបណ្ឌិតសភាកម្ពុជា តែបែរជាមន្ត្រីចរិតថោកទាប រុញច្រានដូចក្មេងពាល ទង្វើបែបនេះសរបញ្ជាក់ថា ស្ថាប័នប៉ូលីសប្រហែលមិនបានបង្រៀនក្រមសីលធម៌ វិជ្ជាជីវៈកាងាទេ មួយក្រុមនឹងគួរលុយឈ្មោះចេញពីបញ្ជីតែម្តងទៅ ទុកក៏គ្មានចំនេញជាតិអ្វីដែរ។
ខាងលើគ្រាន់តែ Comment មួយចំនួនប៉ុណ្ណោះ ដែលយកមកចុះផ្សាយ នៅមានមតិយោបល់រាប់ពាន់ Comment ទៀត៕
