(ភ្នំពេញ)៖ លោក នុត ពុធដារ៉ា អភិបាលខណ្ឌដង្កោ បានដឹកនាំលោកអភិបាលរង មន្ត្រីរាជការខណ្ឌ ក្រុមយុវជនក្រុមសហភាពសហព័ន្ធយុវជនកម្ពុជា សង្កាត់ ភូមិ នៅព្រឹកថ្ងៃទី២៤ ខែតុលា ឆ្នាំ២០១៦ បន្តចុះសួរសុខទុក្ខ និងនាំយកអំណោយជាគ្រឿងឧបភោគបរិភោគ ទៅចែកជូនដល់បងប្អូន ប្រជាពលរដ្ឋដែលរងគ្រោះដោយសារទឹកជំនន់ នៅសណ្តរស្ទឹងព្រែកត្នោត ចំនួន ១០០គ្រួសារទៀត ក្នុងភូមិដូង ភូមិហា និងភូមិស្វាយមានលក្ខណ៍ សង្កាត់ស្ពានថ្ម ខណ្ឌដង្កោ។

​លោកអភិបាលខណ្ឌ ក៏បាន​នាំការសាកសួរសុខទុក្ខពីសំណាក់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា និងសម្តេចកិត្តិព្រឹទ្ធបណ្ឌិត ដែលជានិច្ចកាលសម្តេចទាំងពីរ តែងយកចិត្តទុកដាក់ ​គិតគូរពីសុខទុក្ខ និងការលំបាកនានារបស់បងប្អូនប្រជាពលរដ្ឋទាំងអស់​ នៅតាមមូលដ្ឋាន និងតែងបានណែនាំ ឲ្យអាជ្ញាធរគ្រប់លំដាប់ថ្នាក់យកចិត្តទុកដាក់ ដល់បងប្អូនប្រជាពលរដ្ឋ​ ជាពិសេសបងប្អូនដែលជួបការលំបាក គ្រោះមហន្តរាយ គ្រោះធម្មជាតិ នានា។

បន្ថែមពីនេះ លោកអភិបាល ក៏បានលើកឡើង អំពីការយកចិត្តទុកដាក់របស់លោក ប៉ា សុជាតិវង្ស អភិបាលរាជធានីភ្នំពេញ ចំពោះបងប្អូនដែលទទួលរងគ្រោះ ដោយសារទឹកជំនន់ ដែលហូរធ្លាក់តាមបណ្តោយទំនប់សណ្តស្ទឹងព្រែកត្នោតនេះ។

ជាមួយគ្នានេះ លោកអភិបាលដង្កោ នុត ពុធដារ៉ា ក៏បានផ្តាំផ្ញើដល់បងប្អូនទាំងអស់ ឲ្យប្រុងប្រយ័ត្ន ក្នុងរដូវនេះ ជាពិសេសក្មេងៗតូច កុំឲ្យលេងទឹក ដែលបង្កគ្រោះថ្នាក់ និងត្រូវមានអនាម័យការរស់នៅ ហូបស្អាត ផឹកស្អាត និងការពារពីការយាយី របស់សត្វអាសិរពិសនានា។​

ក្នុងនាមរដ្ឋបាលខណ្ឌ លោកអភិបាល បានធ្វើការថ្លែងអំណរព្រះគុណ និងអរគុណយ៉ាងជ្រាលជ្រៅ ចំពោះព្រះទ័យយកចិត្តទុកដាក់ និងទឹកចិត្តសប្បុរសធម៌ របស់ព្រះសង្ឃ និងសប្បុរសជនទាំងអស់ ដែលបានជួបឧបត្ថម្ភ ជាគ្រឿងឧបភោគ បរិភោគ សម្ភារ ថវិកា ដល់រដ្ឋបាលខណ្ឌដើម្បីយកទៅចែកជូនដល់ផ្ទាល់ដៃបងប្អូនប្រជាពលរដ្ឋ ដែលរងគ្រោះដោយសារជំនន់ទឹកភ្លៀង តាមបណ្តាសង្កាត់ ដែលជាប់នឹងសណ្តរស្ទឹងព្រែកត្នោត។ មន្រ្តីសាលាខណ្ឌដង្កោ បានឲ្យដឹងថា អំណោយដែលយកទៅចែកជូនប្រជាពលរដ្ឋទាំង១០០គ្រួសារ រួមមាន៖ អង្ករ មី ទឹកត្រី និងទឹកស៊ីវអ៊ីវ៕