(កណ្ដាល)៖ កម្លាំងសមត្ថកិច្ចជលផលខេត្តកណ្ដាល នៅព្រឹកថ្ងៃទី២៤ ខែតុលា ឆ្នាំ២០១៦នេះ បានសហការជាមួយកម្លាំងអធិការកិច្ចចតុមុខ ផ្នែកបាសាក់ ផ្នែករកាកោង សង្កាត់ស្អាង កោះធំ លើកដែក កៀនស្វាយ និងគណបញ្ជាការឯកភាពស្រុកទាំងបួន បើកប្រតិបត្តិការ បង្រ្កាបបទល្មើសនេសាទ ហើយជាលទ្ធផល កម្លាំងសមត្ថកិច្ចរឹបអូសបាន ឧបករណ៍នេសាទ ខុសច្បាប់ជាច្រើន ដើម្បីដុតបំផ្លាញចោល នៅនឹងកន្លែង។
នាយខណ្ឌរដ្ឋបាលជលផលកណ្តាល លោក វ៉ិត ធារិទ្ធ បានថ្លែងប្រាប់ Fresh News នៅមុននេះបន្តិចថា បន្ទាប់ពីមានការណែនាំ ពីសំណាក់លោក ម៉ៅ ភិរុណ អភិបាលខេត្តកណ្ដាល រួចមក កម្លាំងរបស់លោក បានសហការជាមួយកម្លាំងអធិការកិច្ចចតុមុខ ផ្នែកបាសាក់ ផ្នែករកាកោងសង្កាត់ស្អាង កោះធំ លើកដែក កៀនស្វាយ និងគណបញ្ជាការឯកភាព ស្រុកទាំងបួន បានបើកប្រតិបត្តិការ បង្ក្រាបនៅតំបន់ល្មើសនេសាទខាងលើ បន្ទាប់ពីទទួលបានការរាយការណ៍ ពីសំណាក់ប្រជាពលរដ្ឋ ដែលកើតមានបទល្មើសក្នុងតំបន់របស់ខ្លួន។
លោកបន្តថា ជាលទ្ធផលសមត្ថកិច្ចជលផល បង្ក្រាបបានឧបករណ៍ នេសាទខុសច្បាប់ជាច្រើនរួមមាន សៃយ៉ឺនស្បៃមុង ១៣៥មាត់លូ, របាំងស្បែមុង ៧២០០ម ,បង្គោលតូចធំ ៤៣៥០ដើម, ចាក់លែងកូនត្រីចំរុះ ៤៩០គីឡូក្រាម ដោយវត្ថុតាងទាំងអស់ បានធ្វើការដុតបំផ្លាញចោលទាំងស្រុង នៅនឹងកន្លែង។
លោក វ៉ិត ធារិទ្ធ បន្តទៀតថា រាល់ឧបករណ៍នេសាទទាំងអស់ ដែលសមត្ថកិច្ចជលផលរឹបអូសបាន គឺត្រូវដុតបំផ្លាញចោលនៅនឹងកន្លែង បង្ក្រាបជាក់ស្ដែងតែម្ដង។ សកម្មភាពបង្រ្កាបនេះ គឺត្រូវបានធ្វើឡើងជាប្រចាំ ដូចភ្លៀងរលឹម មិនថាតែរដូវបិទនេសាទ ឬរដូវបើកនេសាទនោះទេ ព្រោះការប្រើប្រាស់សៃយ៉ឺនស្បៃមុង, របាំងស្បៃមុង និងឧបករណ៍ឆក់ ដើម្បីនេសាទត្រី គឺជាឧបករណ៍ខុសច្បាប់ ដែលអាជ្ញាធរ ត្រូវហាមឃាត់ទាំងរដូវបិទ និងរដូវបើកនេសាទ៕
