(ភ្នំពេញ)៖ យោងតាមច្បាប់ថវិកាជាតិ ឆ្នាំ២០២៥ រាជរដ្ឋាភិបាលគ្រោងប្រមូលចំណូលពីសារពើពន្ធ (ពន្ធដារ និងពន្ធគយ) ចំនួន ២៦ ៤១៨ ប៊ីលានរៀល ឬប្រមាណ ៦.៥ប៊ីលានដុល្លារ ដើម្បីទ្រទ្រង់ដល់ការចំណាយរបស់រាជរដ្ឋាភិបាល។
យោងតាមច្បាប់ថវិកាជាតិឆ្នាំ២០២៥ រាជរដ្ឋាភិបាលកម្ពុជា គ្រោងប្រមូលចំណូលចូលថវិកាជាតិ សម្រាប់ការប្រើប្រាស់លើការចំណាយផ្សេងៗឱ្យបាន ៣១ ៥៩៨ប៊ីលានរៀល ឬស្មើនឹងប្រមាណ ៧.៨ប៊ីលានដុល្លារអាមេរិក ដែលស្មើនឹង១៥.១១%នៃផ.ស.ស។ ក្នុងនោះរដ្ឋគ្រោងប្រមូលចំណូលពីសារពើពន្ធចំនួន ២៦ ៤១៨ ប៊ីលានរៀល ឬប្រមាណ៦.៥ប៊ីលានដុល្លារ និងចំណូលមិនមែនសារពន្ធចំនួន ៣ ៩៧១ប៊ីលានរៀល ប្រមាណជិត ១ប៊ីលានដុល្លារ រួមនឹងចំណូលផ្សេងៗទៀត ចំនួន១ ២០៩ប៊ីលានរៀល ឬប្រមាណជាង ៣០០លានដុល្លារ។
លើកឡើងនៅក្នុងវេទិកា ស្តីពីការគ្រប់គ្រងម៉ាក្រូសេដ្ឋកិច្ច និងច្បាប់ថវិកាឆ្នាំ២០២៥ នៅថ្ងៃទី១០ ខែកុម្ភៈ ឆ្នាំ២០២៥ លោក ហាវ រតនៈ ប្រតិភូរាជរដ្ឋាភិបាលទទួលបន្ទុកជា អគ្គនាយកនៃអគ្គនាយកដ្ឋានថវិកា នៃក្រសួងសេដ្ឋកិច្ច និងហិរញ្ញវត្ថុ បានឱ្យដឹងថា គម្រោងប្រមូលចំណូលក្នុងឆ្នាំ២០២៥នេះ គឺទាបជាងច្បាប់ថវិកាជាតិ ឆ្នាំ២០២៤ ចំនួន ២.៨% ឬជាង២២៤លានដុល្លារ។
លោក ហាវ រតនៈ បានពន្យល់ថា ការគម្រោងប្រមូលចំណូលទាបជាងឆ្នាំ២០២៤នេះ ដោយសារការប្រមូលចំណូលសារពើពន្ធមាននិន្នាការថមថយនៅឡើយ បើទោះបីជាសេដ្ឋកិច្ចកើនឡើង ប៉ុន្តែវិស័យដែលផ្តល់ចំណូលដល់រដ្ឋមិនងើបឡើងវិញ ដល់កម្រិតដែលចង់បាន។
ទន្ទឹមគ្នានេះ រាជរដ្ឋាភិបាលគ្រោងចំណាយថវិកាប្រមាណ ៣៧ ៩៥១ប៊ីលានរៀល ឬប្រមាណជាង៩ប៊ីលានដុល្លារអាមេរិកស្មើនឹង ១៨.១៤%នៃផសស។
ស្របតាមគម្រោងចំណាយ និងចំណូលនេះ លោក ហាវ រតនៈ បានអះអាងថា រដ្ឋាភិបាលនឹងរក្សាឱនភាពថវិកាជាតិ នៅក្នុងឆ្នាំ២០២៥នេះ ក្នុងទំហំ ៦ ៣៥២ប៊ីលានរៀល ឬប្រមាណ១.៥ពាន់លានដុល្លារ ដែលស្មើនឹង -៣.០៤% នៃផលិតផលក្នុងស្រុកសរុប (ផ.ស.ស) ប្រហាក់ប្រហែលនឹងឆ្នាំ២០២៤ ដែលស្ថិតក្នុងកម្រិត២.៩៧ %នៃផ.ស.ស។
លោកបានពន្យល់ថា ការរក្សាកម្រិតឱនភាពថវិកានៅឆ្នាំ២០២៥ ក្នុងរង្វង់ -៣.០៤%នៃផ.ស.ស នេះ គឺស្របតាមវិធានប្រតិបត្តិនៃវិធានហិរញ្ញវត្ថុអន្តរជាតិ ពោលគឺឱនភាពក្នុងរង្វង់-៣% គឺជាតួលេខល្អប្រសើរ ដែលលោកកត់សម្គាល់ថា មានតែក្នុងអំឡុងពេលនៃការរីករាលដាលនៃជំងឺកូវីដ ១៩ទេ ដែលឱនភាពថវិការបស់កម្ពុជាកើនឡើងខ្ពស់ ដោយសារតែពេលនោះ រដ្ឋាភិបាលចំណាយច្រើន។
បើតាម លោក ហាវ រតនៈ កាលពីឆ្នាំ២០២៤ កម្ពុជាបានព្យាករកម្រិតឱនភាពថវិកា -២.៤% ប៉ុន្តែការអនុវត្តជាក់ស្តែង បានឈានដល់២.៩៧%។
លោក ហាវ រតនៈ បានពន្យល់បន្ថែមថា ការកំណត់គោលដៅ រក្សាឱនភាពថវិកាត្រឹមកម្រិត ៣.០៤%នៃផ.ស.សនេះ កម្ពុជានឹងត្រូវការហិរញ្ញប្បទានបន្ថែម ៤.២%នៃផ.ស.ស ប្រហែល ៨ ៧៨០ ៤៥២ លានរៀល ឬស្មើប្រមាណ ២ ១៥៨ ដុល្លារ ដើម្បីបំពេញឱនភាព និងសម្រាប់ការទូទាត់លើការសងកម្ចី ដែលមានទាំងកម្ចីក្នុងប្រទេស និងក្រៅប្រទេស៕
