(ភ្នំពេញ)៖ លោក ថោ ជេដ្ឋា រដ្ឋមន្ត្រីក្រសួងធនធានទឹកនិងឧតុនិយម ប្រធានគណៈកម្មាធិការជាតិទន្លេមេគង្គកម្ពុជា និងជាប្រធានអាជ្ញាធរទន្លេសាប បានអញ្ជើញជាអធិបតីបើកសន្និបាតបូកសរុបលទ្ធផលការងារឆ្នាំ២០២៤ និងទិសដៅអនុវត្តឆ្នាំ២០២៥ នាថ្ងៃទី១២ ខែកុម្ភៈ ឆ្នាំ២០២៥នេះ នៅសណ្ឋាគារសុខាភ្នំពេញ។
ថ្លែងក្នុងអង្គពិធី លោករដ្ឋមន្ត្រីបានលើកឡើងថា រាជរដ្ឋាភិបាលនីតិកាលទី៧ នៃរដ្ឋសភា ក្រោមការដឹកនាំប្រកបដោយភាពឈ្លាសវៃ ព្រមទាំងចក្ខុវិស័យវែងឆ្ងាយរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា នៅតែបន្តយកចិត្តទុកដាក់ខ្ពស់លើវិស័យធនធានទឹកនិងឧតុនិយម តាមរយៈការដាក់ចេញនូវកម្មវិធីនយោបាយ និងយុទ្ធសាស្ត្របញ្ចកោណដំណាក់កាលទី១ ដោយបានកំណត់យកអាទិភាពគន្លឹះចំនួន៥ គឺមនុស្ស ផ្លូវ ទឹក ភ្លើង និងបច្ចេកវិទ្យា ដើម្បីកំណើន ការងារ សមធម៌ ប្រសិទ្ធភាព និងចីរភាព កសាងមូលដ្ឋានឆ្ពោះទៅសម្រេចចក្ខុវិស័យជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ និងជាប្រទេសមានចំណូលខ្ពស់នៅឆ្នាំ២០៥០។
ជាមួយគ្នានេះ លោករដ្ឋមន្ត្រីបានបញ្ជាក់ថា នៅក្នុងផែនការយុទ្ធសាស្ត្រអភិវឌ្ឍន៍វិស័យធនធានទឹកនិងឧតុនិយម និងផែនការយុទ្ធសាស្រ្តអភិវឌ្ឍន៍រយៈពេល៥ឆ្នាំ (២០២៤-២០២៨) របស់ក្រសួង-ស្ថាប័នទាំងបីបានដាក់ចេញយ៉ាងច្បាស់នូវសកម្មភាពជាអាទិភាព សូចនាករ និងពេលវេលាច្បាស់លាស់សម្រាប់ការអនុវត្តសកម្មភាព និងយន្តការត្រួតពិនិត្យវាយតម្លៃដោយផ្អែកលើក្របខ័ណ្ឌសមិទ្ធកម្មគន្លឹះ ហើយក៏បានកំណត់អំពីការទទួលខុសត្រូវរបស់នាយកដ្ឋានជំនាញនីមួយៗ ដើម្បីទទួលបានជោគជ័យក្នុងការអភិវឌ្ឍ ការគ្រប់គ្រង និងការអភិរក្សធនធានទឹកប្រកបដោយប្រសិទ្ធភាព សក្តិសិទ្ធិភាព និងនិរន្តរភាព។
លោករដ្ឋមន្ត្រីបានសង្កត់ធ្ងន់ថា ក្នុងបរិបទបច្ចុប្បន្ន វិស័យធនធានទឹក ពុំមែនជាវិស័យមួយ ដែលបម្រើឱ្យតែការស្រោចស្រពដំណាំកសិកម្មតែមួយមុខប៉ុណ្ណោះទេ ក៏ប៉ុន្តែវិស័យធនធានទឹកបាននិងកំពុងបម្រើឱ្យពហុវិស័យ ជាអាទិ៍៖ កិច្ចគាំពារបរិស្ថាន ឧស្សាហកម្ម ថាមពល ការដឹកជញ្ជូន ទេសចរណ៍ អភិវឌ្ឍន៍ជនបទ អាកាសចរណ៍ និងការគ្រប់គ្រងគ្រោះមហន្តរាយ ហើយដែលទាមទារឱ្យមានកិច្ចសហការគាំទ្រពីក្រសួង-ស្ថាប័នពាក់ព័ន្ធ៕
