(ភ្នំពេញ)៖ លោកសាស្ត្រាចារ្យ គង់ សន្យា អគ្គនាយកមន្ទីរពេទ្យកាល់ម៉ែត និងជាងប្រធានគណៈកម្មាធិការគណបក្សមូលដ្ឋានមន្ទីរពេទ្យកាល់ម៉ែត, លោកសាស្ត្រាចារ្យ ញ៉ែម សូភឿន តំណាងគណៈកម្មាធិការគណបក្សក្រសួងសុខាភិបាល បានអញ្ជើញផ្សព្វផ្សាយលទ្ធផលសន្និបាតគណៈកម្មាធិការកណ្តាលលើកទី៤៥ អាណត្តិទី៥ របស់គណបក្សប្រជាជនកម្ពុជា ថ្នាក់ដឹកនាំ ជូនសមាជិក សមាជិកាគណៈកម្មាធិការគណបក្សមូលដ្ឋានមន្ទីរពេទ្យកាល់ម៉ែត ទាំង២៥សាខា មានសមាជិកវត្តមានសរុបចំនួន ៨៨២នាក់ ដែលរៀបចំឡើងនៅមន្ទីរគណបក្សប្រជាជនកម្ពុជារាជធានីភ្នំពេញនៅថ្ងៃទី៩ ខែកុម្ភៈ ឆ្នាំ២០២៥នេះ។

កម្មវិធីប្រជុំផ្សព្វផ្សាយខ្លឹមសារពិធីផ្សព្វផ្សាយលទ្ធផលសន្និបាតគណៈកម្មាធិការកណ្ដាលលើកទី៤៥ អាណត្តិទី៥ របស់គណបក្សប្រជាជនកម្ពុជាជូន មានរបៀបវារៈដូចជា៖

១៖ ការអាននូវរបាយការណ៍សកម្មភាពគណៈកម្មាធិការគណបក្សមូលដ្ឋានមន្ទីរពេទ្យកាល់ម៉ែតឆ្នាំ២០២៤ ដោយលោក យីត ស៊ុនណារ៉ុង សមាជិកអចិន្ត្រៃយ៍នៃគណៈកម្មាធិការគណបក្សមូលដ្ឋានមន្ទីរពេទ្យកាល់ម៉ែត

២៖ ការអាន និងផ្សព្វផ្សាយនូវរបាយការណ៍ស្ដីពីសភាពការណ៍ទូទៅ និងការងារគណបក្សឆ្នាំ២០២៤ និងទិសដៅភារកិច្ចឆ្នាំ២០២៥ ដោយ លោក ម៉ៅ រាសី អនុប្រធានគណៈកម្មាធិការគណបក្សមូលដ្ឋានមន្ទីរពេទ្យកាល់ម៉ែត

៣៖ ការអាននូវសេចក្ដីជូនដំណឹងស្ដីពីលទ្ធផលនៃសន្និបាតគណៈកម្មាធិការកណ្ដាលលើកទី៤៥ អាណត្តិទី៥ របស់គណបក្សប្រជាជន ដោយលោកសាស្ត្រាចារ្យ ញ៉ែម សូភឿន តំណាងគណៈកម្មាធិការគណបក្សក្រសួងសុខាភិបាល

ឆ្លៀតក្នុងឱកាសនោះដែរ លោកសាស្ដ្រាចារ្យ គង់ សន្យា ប្រធានគណៈកម្មាធិការគណបក្សមូលដ្ឋានមន្ទីរពេទ្យកាល់ម៉ែត បានមានមតិបូកសរុបលទ្ធផលនៃកិច្ចប្រជុំ ព្រមទាំងបានបង្ហាញជូននូវលទ្ធផលជោគជ័យសំខាន់ៗជាច្រើន ដែលគណបក្សប្រជាជនកម្ពុជាសម្រេចបានក្នុងការបម្រើជាតិ និងមាតុភូមិ ពិសេសសន្តិភាព ស្ថិរភាពនយោបាយ និងការអភិវឌ្ឍន៍ឥតឈប់ឈររបស់ប្រទេសកម្ពុជា។

លោកសាស្ដ្រាចារ្យបានសម្តែងការកោតសរសើរ និងវាយតម្លៃខ្ពស់ចំពោះប្រធាន អនុប្រធាន និងសមាជិក សមាជិកាក្នុងសាខាគណបក្សចំណុះគណៈកម្មាធិការគណបក្សមូលដ្ឋានមន្ទីរពេទ្យកាល់ម៉ែត ដែលបានរួមសាមគ្គីយ៉ាងរឹងមាំខិតខំអស់កម្លាំងកាយ កម្លាំងចិត្ត អនុវត្តកម្មវិធីនយោបាយ គោលការណ៍ គោលនយោបាយ និងសេចក្តីសម្រេចនានា របស់គណបក្សប្រជាជនកម្ពុជាឱ្យសម្រេចបានលទ្ធផលល្អជាប្រចាំ។

កម្មវិធីផ្សព្វផ្សាយទាំងមូល សូមសម្តែងនូវការដឹងគុណយ៉ាងជ្រាលជ្រៅបំផុតចំពោះ សមាជិក សមាជិកា នៃអង្គពិធីទាំងមូល ព្រមទាំងបងប្អូនជនរួមជាតិនៅគ្រប់ទិសទី ដែលមានការជឿជាក់ និងការគាំទ្រយ៉ាងមុតមាំដល់ការដឹកនាំរបស់គណបក្សប្រជាជនកម្ពុជារយៈពេល ៤៦ឆ្នាំកន្លងមកនេះ ធ្វើឱ្យគណបក្សមានលទ្ធភាពពេញលេញក្នុងការបម្រើជាតិ និងប្រជាជន ប្រកបដោយជោគជ័យយ៉ាងត្រចះត្រចង់។

ពីថ្នាក់ដឹកនាំនិងសមាជិកទាំងអស់នៃគណបក្សមូលដ្ឋានមន្ទីរពេទ្យកាល់ម៉ែត សូមអំពាវនាវដល់ សមាជិក សមាជិកា ទាំងអស់ រួមទាំង បងប្អូនជនរួមជាតិ សូមបន្តរក្សាសាមគ្គីគ្នាជាធ្លុងមួយ ដើម្បីសម្រេចសមិទ្ធផលធំៗថ្មីៗទៀតក្នុងការកសាង និងការពារមាតុភូមិកម្ពុជា ឆ្ពោះទៅរកអនាគតដ៏រុងរឿងលើមាគ៌ា សន្តិភាព ប្រជាធិបតេយ្យ នីតិរដ្ឋ និងអភិវឌ្ឍន៍៕