(ភ្នំពេញ)៖ លោក ហែម វណ្ណឌី រដ្ឋមន្រ្តីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានឱ្យដឹងថា នៅក្នុងឆ្នាំ២០២៤ វិស័យឧស្សាហកម្មសម្រេចបានកំណើនប្រមាណ៨.៥% ដែលជាកំណើនដ៏ធំមួយគួរឱ្យកត់សម្គាល់ និងព្យាករណ៍ថាវិស័យនេះនឹងកើនឡើងក្នុងរង្វង់៨.៦%។
ការសម្រេចបានកំណើនល្អប្រសើរនេះ ស្របពេលកើនឡើងនៃចំនួនរោងចក្រឧស្សាហធុនធំក្នុងឆ្នាំ២០២៤ បើទោះបីជាមានរោងចក្រខ្លះ បានបិទដំណើរការក៏ដោយ។ លោកបានឱ្យដឹងថា នៅក្នុងឆ្នាំ២០២៤ មានរោងចក្រឧស្សាហកម្មធុនធំបើកថ្មីមានចំនួន៣២៦ ជាពិសេសនៅក្នុងឆមាសទី២ ដែលបានកើនឡើងជាគំហុក បន្ទាប់ពីមានការរើទីតាំងមួយចំនួនពីប្រទេសចិន ដោយទទួលបានទុនវិនិយោគប្រមាណ ២០ពាន់លានដុល្លារ។
លោក ហែម វណ្ណឌី លើកឡើងបែបនេះ ធ្វើឡើងនៅក្នុងជំនួបសវនាការស្តីពីសមិទ្ធផលការងារឆ្នាំ២០២៤ ជាមួយគណៈកម្មាធិការទី៩នៃព្រឹទ្ធសភាកម្ពុជាដឹកនាំដោយ លោក អ៊ុ សារឹទ្ធ នៅថ្ងៃទី៦ ខែកុម្ភៈ ឆ្នាំ២០២៥។
បើតាម លោក ហែម វណ្ណឌី គិតមកទល់ដំណាច់ឆ្នាំ២០២៤ រោងចក្រឧស្សាហធុនធំដែលកំពុងដំណើរការ មានចំនួន២ ៤២៥រោងចក្រ។ តែនេះយ៉ាងនេះក្តី កាលពីឆ្នាំ២០២៤កន្លងទៅក៏មានរោងចក្រចំនួន២៦បានបិទទ្វារផងដែរ ដូចជារោងចក្រផលិតបន្ទះសូឡាជាដើម។ ជាមួយគ្នា តំបន់សេដ្ឋកិច្ចពិសេសបានកើនឡើង៣០ និងសួនឧស្សាហកម្មកើនឡើង ២០។
ដោយឡែកចំនួនផលិតកម្មទំនិញ ដែលបានផលិតក្នុងឆ្នាំ២០២៤ សម្រាប់ផ្គង់ផ្គង់ក្នុងស្រុក និងនាំចេញ មានចំនួនប្រមាណ ១៥ពាន់លានដុល្លារ។
រដ្ឋមន្រ្តីក្រសួងឧស្សាហកម្ម បានលើកឡើងផងដែរថា យ៉ាងណាមិញវិស័យនេះ ក៏អាចនឹងរងផលប៉ះពាល់នូវបញ្ហាមួយចំនួន នៅពេលដែលកម្ពុជាចាកចេញពីប្រទេសអភិវឌ្ឍន៍តិចតួចនៅឆ្នាំ២០២៩ ដែលនឹងធ្វើឱ្យកម្ពុជាបាត់បង់ប្រព័ន្ធអនុគ្រោះពន្ធ។ ដូច្នេះហើយវិស័យឧស្សាហកម្ម និងសិប្បកម្មនឹងជួបបញ្ហាប្រឈម ដូចជា ការកើនឡើងការប្រកួតប្រជែងជាមួយប្រទេសផ្សេង ការរិតបន្តឹងអនុលោមភាពច្បាប់ និងបទបញ្ញតិ្តនានា ការខ្វះខាតកម្លាំងពលកម្មជំនាញ បញ្ហាថ្លៃដឹកជញ្ជូន និងឡូជីស្ទិក ថ្លៃថាមពល ការវិវត្តនៃបច្ចេកវិទ្យាជឿនពេក ដែលតម្រូវឱ្យក្រសួងដាក់ចេញនូវទិសដៅការងារថ្មីក្នុងការដោះស្រាយ៕
