(ភ្នំពេញ)៖ លោក ផន សុភិន គឺជាម្ចាស់សិប្បកម្មកែច្នៃដូងមួយកន្លែង នៅក្នុងខេត្តបាត់ដំបង ដែលមានឈ្មោះថា យ៉ានី ដូងខ្មែរបាត់ដំបង។ ដំបូងឡើយ លោកគឺជាអ្នកលក់ដូងធម្មតា នៅតាមផ្ទះប៉ុណ្ណោះ ប៉ុន្តែចាប់តាំងពីឆ្នាំ២០១៧មក លោកក៏ចាប់ផ្តើមរៀនកែច្នៃដូងស្រស់ ទៅជាប្រភេទដូងផ្សេងៗ ពោល គឺបង្កើតសោភណ្ឌភាពថ្មីនៃផ្លែដូង ដើម្បីទទួលបានតម្លៃបន្ថែម។
មានស្រុកកំណើតនៅភូមិសំណាញ់ ឃុំភ្នំសំពៅ ស្រុកភ្នំព្រឹក ខេត្តបាត់ដំបង បច្ចុប្បន្ននេះលោក ផន សុភិន បានកែច្នៃផ្លែដូងធម្មតា ដូងក្រអូប ដូងតុកកែ ទៅជាដូងដុត ដូងគាស់ក្រវិល ដូចខាតស្អាត ដូងស្រោប និងចាហួយដូង។
ភាពស្រស់ស្អាតនៃដូងដែលបានកែច្នៃនេះ ទទួលបានការនិយមចូលចិត្តអ្នកទទួលទាន មិនតិចនាក់នោះទេ។ ហេតុដូច្នេះហើយ បានជំរុញឱ្យលក់របស់លោកបានកើនឡើងជាបន្តបន្ទាប់។ ធ្លាប់តែលក់ដូវធម្មតា បានមួយថ្ងៃបាន២០០ ទៅ៣០០ដូង ប៉ុន្តែបច្ចុប្បន្ននេះ លោកអាចលក់បានរហូតដល់១ម៉ឺនផ្លែក្នុងមួយថ្ងៃ និងបន្តចែកចាយទៅកាន់បណ្តាខេត្តផ្សេងៗដូចជា រាជធានីភ្នំពេញ បាត់ដំបង និងប៉ៃលិនជាដើម។ ការគាំទ្រនេះ លោក ផន សុភិន មិនត្រឹមតែមានមហិច្ឆិតា លក់នៅក្នុងប្រទេសនោះទេ លោករំពឹងថា នាពេលខាងមុខលោកក៏អាចនាំចេញ ទៅលក់នៅក្រៅប្រទេសផងដែរ។
លោក ផន សុភិន បានឱ្យដឹងថា ការកែច្នៃដូងនេះ គឺដើម្បីជួយដល់កសិករ និងបង្កើនតម្លៃបន្ថែមរបស់ដូង ជាក់ស្តែងដូងនៅលើដើម ដែលកសិករលក់ចេញបានតែមួយផ្លែ១ពាន់រៀល តែបច្ចុប្បន្ននេះឡើងថ្លៃជាងមុនគឺ ១ផ្លែជាង២ពាន់រៀល ដែលជាការជួយបន្ថែមទីផ្សារដល់អ្នកដាំដូង។
ដូងដែលលោក សុភិន បានយកមកកែច្នៃ ត្រូវបាននាំយកមកពីខេត្តបាត់ដំបង ពោធិ៍សាត់ និងខេត្តប៉ៃលិន ដែលមានប្រភេទដូងធម្មតា ដូងក្រអូប និងដូងតុកកែ។
ការវិវត្តិខ្លួនពីអ្នកលក់ដូងធម្មតា មកជាអ្នកកែច្នៃដូង មិនត្រឹមជួយធ្វើឱ្យជីវភាពគ្រួសាររបស់លោក ឱ្យកាន់តែប្រសើរជាងមុននោះទេ ក៏អាចបង្កើតការងារដល់អ្នកផ្សេងទៀតទាំងផ្ទាល់ និងប្រយោលផងដែរ។
ក្រៅការពីកែច្នៃផ្លែដូង បច្ចុប្បន្ននេះលោកក៏បានសហការជាមួយនិស្សិតនៃសាកលវិទ្យាល័យបាត់ដំបង ដើម្បីបង្កើនការកែច្នៃផលិតផលផ្សេងទៀត ទៅជាភេសជ្ជៈសុខភាព ដូចជាទឹកអំពិល ទឹកផាសិន ទឹកខ្ញី ម្ជូរព្រឹក និងទឹកស្លឹកគ្រៃជាដើម។
លោក តូច ចំរើន ប្រធានកម្មវិធីនៃសមាគមនិរន្តរភាពដី ដើម្បីជីវីត បានលើកទឹកចិត្តដល់កសិករ ឬអាជីវករ ឱ្យចេះកែច្នៃ និងវេចខ្ចប់ឱ្យស្របតាមស្តង់ដារ និងលើកសោភ័ណ្ឌភាពផលិតផល ដើម្បីទទួលបានតម្លៃបន្ថែម និងពង្រីកទីផ្សារ៕
