(ភ្នំពេញ)៖ បុរសម្នាក់បើករថយន្ដ HYUNDAI Starex ពាក់ផ្លាកលេខ ភ្នំពេញ 2BW-9795 តាមបណ្ដោយផ្លូវ៦០ម៉ែត្រ ទិសដៅពីត្បូងទៅជើង បានរេចង្កូតបុកបុរសម្នាក់ដែលកំពុងបណ្ដើរម៉ូតូសណ្ដោងរម៉ក់តាមផ្លូវ បណ្ដាលឲ្យស្លាប់។
ក្រោយបង្កគ្រោះថ្នាក់ចរាចរណ៍ អ្នកបើករថយុន្ត បានព្យាយាមបើករត់គេច តែត្រូវបានប្រជាពលរដ្ឋដេញតាមឃាត់ រួចប្រគល់ឲ្យសមត្ថកិច្ចបន្តតាមនីតិវិធីច្បាប់។
ហេតុការណ៍នេះ បានកើតឡើងកាលពីវេលាម៉ោង ៧៖៤៥នាទីយប់ថ្ងៃទី២ ខែកុម្ភៈ ឆ្នាំ២០២៥ ស្ថិតតាមបណ្ដោយផ្លូវ៦០ម៉ែត្រ សង្កាត់ជើងឯក ខណ្ឌដង្កោ រាជធានីភ្នំពេញ។
ក្រោយពេលកើតហេតុ សមត្ថកិច្ចជំនាញចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ បានចុះមកធ្វើការវាស់វែងយករថយន្ត និងម៉ូតូសណ្ដោងរម៉ក់ទៅរក្សាទុករង់ចាំការដោះស្រាយនៅពេលក្រោយ។ ចំណែកឯសពជនរងគ្រោះ ត្រូវបានប្រគល់ឲ្យសាច់ញាតិយកទៅធ្វើបុណ្យតាមប្រពៃណី។
សម្រាប់អ្នកបើកបរ ត្រូវបាននគរបាលឃាត់ខ្លួន បញ្ជូនទៅកាន់ស្នងការដ្ឋាននគរបាលរាជធានីភ្នំពេញ ដើម្បីកសាងសំណុំរឿងបញ្ជូនទៅតុលាការចាត់ការតាមច្បាប់។ បើតាមសមត្ថកិច្ច ក្រោយការវាស់ជាតិអាកុល រកឃើញថាមានកម្រិត ០,៦៧មីល្លីក្រាមក្នុងមួយលីត្រខ្យល់។
សមត្ថកិច្ចបញ្ជាក់ថា អ្នកបើកបរជាមន្រ្តីរាជការម្នាក់ ដែលទើបទទួលបានការតែងតាំងកាលពីប៉ុន្មានខែ៕
