(ស្ទឹងត្រែង)៖ កម្លាំងសមត្ថកិច្ច និងអាជ្ញាធរពាក់ព័ន្ធនៅខេត្តស្ទឹងត្រែង បានឃាត់ខ្លួនបុរសម្នាក់មកសួរនាំ និងបញ្ជូនទៅការសាលាដំបូងខេត្តស្ទឹងត្រែង បន្ទាប់ពីបានរកឃើញថា បុរសរូបនេះជាប់ពាក់ព័ន្ធនឹងការកាប់រំលំដើមឈើទាលធំៗនៅដែនជម្រកសត្វព្រៃ-ព្រៃឡង់ ស្ថិតក្នុងភូមិសាស្រ្តភូមិទាល់ ឃុំអន្លង់ភេ ស្រុកថាឡាបរិវ៉ាត់ ខេត្តស្ទឹងត្រែង។
លោក សរ សុពុត្រា អភិបាលខេត្តស្ទឹងត្រែង បានប្រាប់ Fresh News នៅរសៀលថ្ងៃទី២ ខែកុម្ភៈ ឆ្នាំ២០២៥នេះថា បុរសដែលបានឃាត់ខ្លួននេះ គឺជាអ្នករស់នៅតំបន់ព្រៃឈើដែលបានកាប់រង្គាលនោះ។ បុរសរូបនេះ បានអះអាងថា ដីដែលត្រូវបានកាត់រំលំឈើទាលជាដីរបស់គាត់។
លោក សរ សុពុត្រា បានបញ្ជាក់ថា ការកាត់រំលំដើមឈើទាលធំៗនេះ គឺគេធ្វើក្រោមរូបភាពដុតយកជ័រ បន្ទាប់មកកាប់ឈើ និងទន្ទ្រានយកដី។ បើតាមលោកអភិបាល នៅពេលសមត្ថកិច្ចកំពុងតាមរកចាប់ខ្លួនអ្នកពាក់ព័ន្ធមួយចំនួនទៀត តែពួកគេបានគេចខ្លួនបាត់អស់ហើយ។ អ្នកពាក់ព័ន្ធភាគច្រើនជាអ្នកដែលរស់នៅតំបន់នោះតែម្តង។
លោកអភិបាលខេត្តស្ទឹងត្រែង បានអះអាងថា លោកចាត់វិធានការច្បាប់លើក្រុមជន ដែលកាប់បំផ្លាញឈើនេះដោយគ្មានការលើកលែងនោះឡើយ។
សូមបញ្ជាក់ថា នៅប៉ុន្មានថ្ងៃមុននេះ គេបានប្រទះឃើញដើមឈើទាលមានទំហំធំៗ និងខ្ពស់សន្លឹមរាប់សិបដើម ត្រូវបានគេលួចកាត់រំលំ និងច្រៀកជាឈើធ្វើផ្ទះ។ ឈើទាលធំៗ ដែលគេលួចកាត់រំលំនេះ ស្ថិតក្នុងដែនជម្រកសត្វព្រៃ ព្រៃឡង់ ក្នុងភូមិសាស្រ្តភូមិទាល់ ឃុំអន្លង់ភេ ស្រុកថាឡាបរិវ៉ាត់ ខេត្តស្ទឹងត្រែង។
ឈើដែលបានកាត់អាជ្រៀកខាងលើនេះ ជាប្រភេទឈើទាល ចំនួនសរុប៥៦គល់។ ក្នុងនោះអារំលំថ្មីមានចំនួន៤៩គល់ និងអារចាស់មានចំនួន៧គល់។ ឈើទាំងនោះ មានអង្កាត់ផ្ជិតចាប់៤០សងទីម៉ត្រែ ទៅ១០០សង់ទីម៉ែត្រ ក្នុងប្រភេទដើមឈើនីមួយៗ។ ឈើអាច្រៀកខាងលើនេះ គឺជាដើមឈើច្បោះជ័ររបស់ភូមិ ហើយទីតាំងនោះមានចំការចាស់ព័ទ្ធជុំវិញ ហើយមានដាក់ឈើបាញ់ថ្នាំសម្គាល់ គ្រោងកាប់រុករានដីព្រៃ។
សេចក្តីសន្និដ្ឋានរបស់ក្រុមការងារ ករណីខាងលើនេះជាករណីកាប់រំលំ អារច្រៀកឈើ បន្ទាប់មកកាប់រុករានទន្ទ្រានយកដីព្រៃធ្វើជាកម្មសិទ្ធិ៕
