(កំពត)៖ ធម្មជាតិបានផ្តល់ផលប្រយោជន៍ទ្រទ្រង់ជីវិត ហេតុអ្វីក៏មានចេះថែទាំ និងស្រឡាញ់ធម្មជាតិ? ម្ចាស់អាហារដ្ឋានមានឈ្មោះ «ម៉ាក់ឈូឈូ» ត្រូវបានរកឃើញថា ជាអ្នកបង្ហូរទឹកកខ្វក់ចូលទៅក្នុងទឹកព្រែក នៅរមណីយដ្ឋានទឹកឈូ ស្ថិតក្នុងស្រុកទឹកឈូ ខេត្តកំពត។
រមណីយដ្ឋានទឹកឈូ ជាកន្លែងលេងកម្សាន្តដ៏ទាក់ទាញមួយនៅលើទឹកដីខេត្តកំពត។ អ្នកទេសចរជិតឆ្ងាយ បានទៅដល់ខេតកំពតហើយ កម្ររំលងរមណីយដ្ឋានធម្មជាតិមួយនេះណាស់ ព្រោះមានទឹកសម្រាប់ងូត និងលេងកម្សាន្ត។ តាមរយៈរមណីយដ្ឋានធម្មជាតិនេះ បានផ្តល់នូវមុខរបរ និងចំណូលដល់ប្រជាពលរដ្ឋជាច្រើនគ្រួសារ។
នៅពេលថ្មីៗនេះ អ្នកទេសចរ ដែលទៅលេងរមណីយដ្ឋានទឹកឈូ បានឃើញការបង្ហូរទឹកខ្មៅកខ្វក់ចេញពីអាហារដ្ឋាននានានៅតំបន់នោះចូលទៅក្នុងទឹកព្រែកធម្មជាតិ។ ការបង្ហូរទឹកកខ្វក់ចូលទៅក្នុងទឹកធម្មជាតិ នឹងធ្វើឱ្យទឹកលែងស្អាត មានសភាពកខ្វក់ ក្លិនស្អុយក្នុងទឹក ប៉ះពាល់ដល់ភ្ញៀវទៅលេងកម្សាន្ត និងធ្វើឱ្យប៉ះពាល់ធនធានក្នុងទឹកថែមទៀតផង។
វីដេអូបង្ហូរទឹកកខ្វក់ចូលទឹកព្រែកធម្មជាតិ បានសាយភាយពេញបណ្តាញសង្គម ហើយក៏បានជ្រាបដល់អាជ្ញាធរខេត្ត រួមនិងលោក អ៊ាង សុផល្លែត រដ្ឋមន្ត្រីក្រសួងបរិស្ថានផងដែរ។ ក្រោយឃើញវីដេអូនោះ លោក អ៊ាង សុផល្លែត បានណែនាំបន្ទាន់ទៅកាន់ប្រធានមន្ទីរបរិស្ថានឱ្យចុះទៅពិនិត្យ។
នៅរសៀលថ្ងៃទី១ ខែកុម្ភៈ ឆ្នាំ២០២៥ ក្រុមការងារមន្ទីរបរិស្ថានខេត្តកំពត សហការជាមួយរដ្ឋបាលស្រុកទឹកឈូ មន្ទីរទេសចរណ៍ខេត្ត និងអាជ្ញាធរភូមិ-ឃុំ ចុះត្រួតពិនិត្យករណីបង្ហូរសំណល់រាវទឹកកខ្វក់នេះ។ អាជ្ញាធរបានរកឃើញថា ទឹកកខ្វក់នេះ បង្ហូរចេញពីទីតាំងអាហារដ្ឋាន «ម៉ាក់ឈូឈូ»។ ក្រុមការងារពិនិត្យឃើញថា លូបង្គន់បន្ទប់ទឹកអាហារដ្ឋាននេះ មានបរិមាណសំណល់រាវ ទឹកកខ្វក់ពេញហៀរចេញ ហូរចូលក្នុងព្រែកទឹកឈូ និងមានធុងសិបទិកចំនួួន១ធុងតែមិនដំណើរការ។
បន្ទាប់ពីពិនិត្យឃើញបែបនេះ ក្រុមការងារតម្រូវឱ្យម្ចាស់អាហារដ្ឋាន «ម៉ាក់ឈូឈូ» បញ្ឈប់ការបង្ហូរសំណល់រាវ ទឹកកខ្វក់ចូលក្នុងព្រែក និងត្រូវបូមលូស្តុកសំណល់រាវ ទឹកកខ្វក់ ចេញពីលូបង្គន់បន្ទប់ទឹកឱ្យបានរួចរាល់ នៅល្ងាចថ្ងៃទី១ ខែកុម្ភៈ ឆ្នាំ២០២៥។
ក្រុមការងារ ក៏បានណែនាំឱ្យបញ្ឈប់ជាបន្ទាន់នូវការបង្ហូរសំណល់រាវ ទឹកកខ្វក់ចូលក្នុងព្រែក និងត្រូវរៀបចំអាងចម្រោះ ឬធុងសិបទិកតាមលក្ខណៈបច្ចេកទេសចាប់ពីថ្ងៃទី៣ ខែកុម្ភៈ ឆ្នាំ២០២៥ និងឱ្យរួចរាល់យ៉ាងយូរត្រឹមថ្ងៃទី១ ខែមីនា ឆ្នាំ២០២៥។
ក្រុមការងារដែលបានចុះជាពិសេសអាជ្ញាធរស្រុកទឹកឈូក បានព្រមានថា បើមានករណីនេះបន្តទៀត ម្ចាស់ទីតាំងនឹងទទួលខុសត្រូវចំពោះមុខច្បាប់។
ក្នុងឱកាសនោះ ក្រុមការងារក៏បានចុះពិនិត្យទីតាំងអាហារដ្ឋាននៅក្បែរៗនោះទាំងអស់ពុំឃើញមានការបង្ហូរទឹកកខ្វក់ចូលព្រែកនោះទេ ព្រមទាំងបានណែនាំម្ចាស់ទីតាំងត្រូវរៀបចំអាងចម្រោះ ឬធុងសិបទិក តាមលក្ខណៈបច្ចេកទេសឱ្យបានឆាប់រហ័ស កុំឱ្យហៀរដូចករណីខាងលើ។
រដ្ឋមន្ត្រីក្រសួងបរិស្ថាន លោក អ៊ាង សុផល្លែត បានថ្លែងអំណរគុណដល់មន្ត្រីមន្ទីរបរិស្ថាន ក៏ដូចជាអាជ្ញាធរក្នុងស្រុកទឹកឈូ ដែលបានចាត់វិធានការឆាប់រហ័សលើសកម្មភាពបង្ហូរទឹកកខ្វក់ចូលក្នុងទឹកធម្មជាតិនេះ។
លោករដ្ឋមន្ត្រី ក៏បានអំពាវនាវដល់ម្ចាស់អាហារដ្ឋាន អ្នកប្រកបរបរបម្រើសេវាម្ហូបអាហារនៅគ្រប់ទីកន្លែងកម្សាន្តធម្មជាតិ ចូលរួមថែរក្សាបរិស្ថាន ដោយទុកដាក់សំរាម ឱ្យបានត្រឹមត្រូវ និងចៀសវាងការបង្ហូរទឹកកខ្វក់ចូលទឹកជ្រោះ ទឹកស្ទឹង ទឹកព្រែក ទន្លេ និងឆ្នេរជាដើម ដែលជាហេតុបង្កផលប៉ះពាល់ធ្ងន់ធ្ងរដល់បរិស្ថាន ដល់គុណភាពទឹក និងភាពស្រស់ស្អាតនៅតាមតំបន់ទាំងនោះ៕
