(ភ្នំពេញ)៖ កម្លាំងជំនាញមន្ទីរប្រឆាំងគ្រឿងញៀន បានបង្ក្រាបករណី រក្សាទុក ដឹកជញ្ជូន និងជួញដូរដោយខុសច្បាប់ នូវសារធាតុញៀន ដោយចាប់ខ្លួនជនសង្ស័យជាជនជាតិម្នាក់ និងថ្នាំញៀនជិត៥០គីឡូក្រាម ក្នុងភូមិសាស្ត្ររាជធានីភ្នំពេញ។

ប្រតិបត្តិការបង្ក្រាបនេះ អនុវត្តតាមបទបញ្ជារបស់ នាយឧត្តមសេនីយ៍ ស ថេត អគ្គស្នងការនគរបាលជាតិ និងឧត្តមសេនីយ៍ឯក ប៊ុន ប៉ាម៉ារីលុច អគ្គស្នងការរងទទួលដឹកនាំ មន្ទីរប្រឆាំងបទល្មើសគ្រឿងញៀន និងឧត្តមសេនីយ៍ឯក ព្រុំ សន្ធរ អគ្គស្នងការរងទទួលសហការដឹកនាំមន្ទីរប្រឆាំងគ្រឿនញៀន និងដឹកនាំបញ្ជាផ្ទាល់ពីឧត្តមសេនីយ៍ឯក ឃឹង សារ៉ាត់ នាយកមន្ទីរប្រឆាំងបទល្មើសគ្រឿងញៀន។

នៅថ្ងៃទី២៩ ខែមករា ឆ្នាំ២០២៥ វេលាម៉ោង១៣៖៣០នាទី កម្លាំងជំនាញ នៃមន្ទីរប្រឆាំងបទល្មើសគ្រឿងញៀន (ក១) សហការជាមួយស្នងការដ្ឋានរាជធានីភ្នំពេញ ដោយមានការដឹកនាំ និងសម្របសម្រួលពីព្រះរាជអាជ្ញារងអមសាលាដំបូងរាជធានីភ្នំពេញ លោក គឹម ហុងសាន បានចុះស្រាវជ្រាវស៊ើបអង្កេតរហូតឈាន ទៅបង្ក្រាបករណីរក្សាទុក ដឹកជញ្ជូន និងជួញដូរ ដោយខុសច្បាប់នូវសារធាតុញៀន ស្ថិតនៅទីតាំងចំនួន២ ទីតាំងទី១ ស្ថិតនៅផ្លូវ២៨៧ ក្បែរខុនដូរ SKY31 ក្រុម៥០ សង្កាត់បឹងកក់១ ខណ្ឌទួលគោក រាជធានីភ្នំពេញ។ទីតាំងទី២ ស្ថិតនៅ បន្ទប់ខុនដូរSKY31 បន្ទប់់លេខ១៣០៦ ជាន់ទី១៣ ផ្លូវ២៨៧ ក្រុម៥០ សង្កាត់បឹងកក់១ ខណ្ឌទួលគោក រាជធានីភ្នំពេញ។

ប្រតិបត្តិការនេះកម្លាំងជំនាញចាប់ខ្លួនជនល្មើស ១នាក់ ឈ្មោះ CHEN YAN CHENG ភេទប្រុសជនជាតិចិន-តៃវ៉ាន់ អាយុ ២៧ឆ្នាំ និងចាប់យកវត្ថុតាងរួមមាន៖ ១.គ្រឿងញៀនប្រភេទមេតំហ្វេតាមីន (ICE) ៤០៥៦៦.១១ ក្រាម, ២.គ្រឿងញៀនប្រភេទកេតតាមីន (Ketamine) ទម្ងន់ ៣៦៩៤ ក្រាម, ៣.គ្រឿងញៀនមេតំហ្វេតាមីន(MDMA) ទម្ងន់៣៤១៤,៣៩ ក្រាម និង៤.កញ្ឆាក្រៀម ទម្ងន់ ២៣០ ក្រាម។ សរុបរួមសារធាតុញៀនទម្ងន់ ៤៧៦៧៤.៥០ ក្រាម (៤៧គីឡូក្រាម ៦៧៤.៥០ក្រាម) និងចាប់យកសម្ភារកាំភ្លើងចំនួន ១ដើមផងដែរ។

បច្ចុប្បន្នជនល្មើស និងវត្ថុតាង ត្រូវបានកម្លាំងជំនាញរៀបចំកសាងសំណុំរឿងបញ្ជូនខ្លួន ទៅសាលាដំបូងរាជធានីភ្នំពេញ ដើម្បីចាត់ការតាមនីតិវិធី៕

សូមជម្រាបថា កម្លាំងជំនាញមន្ទីរប្រឆាំងគ្រឿងញៀន ដែលដឹកនាំដោយឧត្ដមសេនីយ៍ឯក ឃឹង សារ៉ាត់ នាយកមន្ទីរ បានប្តេជ្ញាចិត្ត និងខិតខំចុះបង្ក្រាបគ្រឿងញៀន តាមបណ្ដារាជធានី-ខេត្ដ យ៉ាងសស្រាក់សស្រាំដូចភ្លៀងរលឹម ធ្វើយ៉ាងណាបង្ក្រាបឱ្យដល់ឫសគល់នៃបទល្មើស។ មន្ទីរប្រឆាំងគ្រឿងញៀន តែងតែបង្ក្រាបបានបទល្មើសគ្រឿងធំៗជាច្រើនករណី និងឃាត់ខ្លួនក្រុមឧក្រិដ្ឋជនជាច្រើននាក់ បញ្ជូនទៅផ្តន្ទាទោសនៅតុលាការ៕