(សៀមរាប)៖ ក្នុងអំឡុងពេលដើមរដូវប្រាំងក្នុងខែមករានេះ អាជ្ញាធរជាតិអប្សរាបានផ្គត់ផ្គង់ទឹកជូនដល់ប្រជាកសិករ ដែលត្រូវការទឹកជាចាំបាច់សម្រាប់ស្រោចស្រពស្រែប្រាំងនៅតាមទីតាំងភូមិសាស្រ្តឃុំ-សង្កាត់នានា ដែលស្ថិតនៅខាងក្រៅប្រព័ន្ធស្រោចស្រពបារាយណ៍ខាងលិចលើទំហំផ្ទៃដីសរុបចំនួន១,៩៦៩ហិកតា។
ទីតាំងដែលទទួលបានទឹកស្រោចស្រពស្រែប្រាំងនោះ រួមមាន៖ ភូមិសាស្រ្តសង្កាត់សៀមរាប ក្រុងសៀមរាប លើផ្ទៃដីស្រែប្រាំងចំនួន១៣៥៤ហិកតា តាមស្ទឹងសៀមរាប, ភូមិសាស្រ្តតំបន់កូនក្អែក និងថ្នល់តាអេង ឃុំខ្នាត ស្រុកពួក លើផ្ទៃដីស្រែប្រាំងចំនួន៣០០ហិកតា តាមប្រព័ន្ធស្រោចស្រពបារាយណ៍ខាងលិច, ភូមិសាស្រ្តភូមិស្ទឹងព្រះស្រុក ឃុំល្វា ស្រុកពួកចំនួន៣១៥ហិចតា តាមទ្វារទឹកភូមិគោកត្នោតលើប្រឡាយអូរដំរីស្លាប់ និងទ្វារទឹកដូនកែវ ទ្វារទឹកភូមិប្រាសាទចារយ្យ ភូមិល្បេីក លើប្រឡាយអូរខ្លូត៕
