(កណ្ដាល)៖ អបអរសាទរចំពោះឃុំដីឥដ្ធ ស្រុកកៀនស្វាយ និងភូមិកំពង់សំណាញ់ នៃក្រុងតាខ្មៅ ខេត្តកណ្ដាល ទទួលបានជ័យលាភីលេខ១ សម្រាប់ការប្រឡងប្រណាំងផ្ទៃក្នុងខេត្តក្នុងវិស័យបរិស្ថាន។
ការប្រកាសនេះធ្វើឡើងក្នុងពិធីប្រកាសជ័យលាភី និងប្រគល់ពានរង្វាន់សម្រាប់ការប្រឡងប្រណាំងផ្ទៃក្នុងខេត្ត «ភូមិ-ឃុំ-សង្កាត់មានសុវត្ថិភាព» ក្នុងវិស័យបរិស្ថាន ខេត្តកណ្តាល ឆ្នាំ២០២៣ នាថ្ងៃទី២៧ ខែមករា ឆ្នាំ២០២៥ ក្រោមអធិបតីភាពលោក គួច ចំរើន អភិបាលខេត្តកណ្ដាល។
អភិបាលខេត្តកណ្ដាលបានជំរុញដល់ភូមិ ឃុំ-សង្កាត់ ដែលទទួលបានជ័យលាភីទាំងអស់ត្រូវយកចិត្តទុកដាក់ សហការជាមួយរដ្ឋបាលក្រុង ស្រុកនីមួយៗ ដើម្បីត្រៀមលក្ខណៈបានពេញលេញក្នុងការចូលរួមកម្មវិធីប្រឡងប្រណាំងថ្នាក់ជាតិ «ភូមិ-ឃុំ-សង្កាត់ មានសុវត្ថិភាព» ក្នុងវិស័យបរិស្ថានឆ្នាំ២០២៥ ដែលរៀបចំដោយក្រសួងបរិស្ថាននាពេលខាងមុខបន្តទៀត។
លោក ពៅ សោម៉ាណាក់ ប្រធានមន្ទីរបរិស្ថានខេត្ត បានឲ្យដឹងថា កម្មវិធីប្រឡងប្រណាំងផ្ទៃក្នុងខេត្តស្តីពី «ភូមិ-ឃុំ-សង្កាត់ មានសុវត្ថិភាព» ក្នុងវិស័យបរិស្ថាន គឺឈរលើមូលដ្ឋានវាយតម្លៃ និងដាក់ពិន្ទុផ្នែកលើលក្ខណៈវិនិច្ឆ័យចំនួន៣ សូចនាករចំនួន១០ មធ្យោបាយផ្ទៀងផ្ទាត់ចំនួន៩១ចំណុច ព្រមទាំងមាននីតិវិធី និងដំណើរការនៃការជ្រើសរើសជ័យលាភីចំនួន៥ជំហាន។
លោកបន្តថា ក្រសួងបរិស្ថានបានរៀបចំការប្រឡងប្រណាំងស្ដីពី «ភូមិ-ឃុំ-សង្កាត់មានសុវត្ថិភាព» ក្នុងវិស័យបរិស្ថាន ដោយផ្អែកលើលក្ខណៈសម្បត្តិទី៦ គឺមានអនាម័យ មានសោភ័ណភាពល្អ និងបរិស្ថានល្អ ដែលកម្មវិធីនេះបានរៀបចំឡើងក្នុងគោលបំណង ដើម្បីគាំទ្រនិងអនុវត្តគោលនយោបាយរបស់រាជរដ្ឋាភិបាលកម្ពុជា តាមរយៈការផ្ដល់តម្លៃ និងលើកទឹកចិត្តដល់ភូមិ-ឃុំ-សង្កាត់ ដែលអនុវត្តបានល្អនូវលក្ខណៈសម្បត្តិទី៦ នៃគោលនយោបាយ «ភូមិ-ឃុំ-សង្កាត់មានសុវត្ថិភាព» តាមគោលការណ៍ណែនាំស្តីពីការប្រឡងប្រណាំងភូមិ-ឃុំ-សង្កាត់មានសុវត្ថិភាព ក្នុងវិស័យបរិស្ថាន។
សូមជម្រាបថា ភូមិ-ឃុំ-សង្កាត់ដែលឈ្នះការប្រកួតប្រជែងក្នុងកម្មវិធីប្រឡងប្រណាំងថ្នាក់ខេត្តស្ដីពី «ភូមិ-ឃុំ- សង្កាត់ មានសុវត្ថិភាព» ក្នុងវិស័យបរិស្ថាន បានលើឃុំ-សង្កាត់៖
* ជ័យលាភីលេខ១ ឃុំដីឥដ្ឋ ស្រុកកៀនស្វាយ ទទួលបានពាន១ ប័ណ្ណសរសើរ១ អមដោយប្រាក់រង្វាន់៤លានរៀល។
* ជ័យលាភីលេខ២ សង្កាត់តាខ្មៅ ក្រុងតាខ្មៅ ទទួលបានពាន១ ប័ណ្ណសរសើរ១ អមដោយប្រាក់រង្វាន់៣លានរៀល។
* ជ័យលាភីលេខ៣ ឃុំសំរោងលើ ស្រុកអង្គស្នួល ទទួលបានពាន១ ប័ណ្ណសរសើរ១ អមដោយប្រាក់រង្វាន់២លានរៀល។
* ជ័យលាភីលេខ៤ ឃុំព្រែកអញ្ចាញ ស្រុកមុខកំពូល ទទួលបានពាន១ ប័ណ្ណសរសើរ១ អមដោយប្រាក់រង្វាន់១លានរៀល។
* ជ័យលាភីលេខ៥ សង្កាត់សំពៅពូន ក្រុងសំពៅពូន ទទួលបានពាន១ ប័ណ្ណសរសើរ១ អមដោយប្រាក់រង្វាន់១លានរៀល។
ភូមិដែលទទួលបានជ័យលាភី បានលើ៖
* ជ័យលាភីលេខ១ ភូមិកំពង់សំណាញ់ ក្រុងតាខ្មៅ ទទួលបានពាន១ ប័ណ្ណសរសើរ១ អមដោយប្រាក់រង្វាន់២,៥០០,០០០រៀល។
* ជ័យលាភីលេខ២ ភូមិព្រែកជ្រូក ក្រុងអរិយក្សត្រ ទទួលបានពាន១ ប័ណ្ណសរសើរ១ អមដោយប្រាក់រង្វាន់១,៥០០,០០០លានរៀល។
* ជ័យលាភីលេខ៣ ភូមិស្ដៅកន្លែង ស្រុកកៀនស្វាយ ទទួលបានពាន១ ប័ណ្ណសរសើរ១ អមដោយប្រាក់រង្វាន់១,០០០,០០០លានរៀល។
* ជ័យលាភីលេខ៤ ភូមិបឹងក្រោម ស្រុកលើកដែក ទទួលបានពាន១ ប័ណ្ណសរសើរ១ អមដោយប្រាក់រង្វាន់៥០០,០០០រៀល។
* ជ័យលាភីលេខ៥ ភូមិថ្នល់ទទឹង ស្រុកអង្គស្នួល ទទួលបានពាន១ ប័ណ្ណសរសើរ១ អមដោយប្រាក់រង្វាន់៥០០,០០០រៀល៕
